A la fin acabóse’l bicentenariu del nuestru prócer don Gaspar Melchor de Xovellanos. Ya fici referencia nun par d’ocasiones a coses rellacionaes con él. Tolo que se diga, s’escriba o s’investigue al rodiu de la so figura abúltame que ye merecío, anque nel afán totalizador de presentar al personaxe como daquién exemplar en tolos campos, dacuando pue cayese nel ridículu. Y tamién dixi que, ensin embargu, dalgunos aspeutos importantes del so pensamientu quedaron adulces ensin referenciar. Curiosamente los que cinquen a la cultura asturiana y, penriba de too, a la llingua qu’él amó, utilizó ya investigó y de la que poco o nada se dixo a lo llargo esti añu.
Vien agora, como la cola del cometa, a completar tou esti panorama festexeru, un llibrín empobináu pa neños que ye una verdadera ayalguina. El so títulu ye «Xovellanos un paisanu melgueru» y les autores son Carla Menéndez Fernández, que fizo la parte lliteraria, ya Irene Fenollar Robles que s’encargó de les illustraciones. Y digo que ye una verdadera ayalguina porque les autores preséntennos a un Xovellanos d’andar per casa. A un illustráu en zapatielles. Los testos de Carla Menéndez («Carla Perucho») escritos nun versu fácil, tán escritos pa un públicu pequeñu (que non «menor») y cumplen dafechu pa colos sos destinatarios. Depués de tantu grandonismu, tanta seriedá y tantu envaramientu al
rodiu del intelectual xixonés, ye mui sano ver a «Gasparín» xugando a la pelota colos hermanos, o cómo la mayestra lu riñe en clas por nun tar atentu, o cómo se manexa na cocina preparando unes galletes caseres. Unos testos simpáticos y desmitificadores, pero que percorren la biografía del autor si bien, como ye llóxico, de mou mui curtiu y cenciellu. Collaboren a ello les perguapes illustraciones de’Irene Fenollar, con un trabayu mui meritoriu al empar que llaboriosu, pues les figures tán feches con plastilina, fotografiaes y trataes llueu col ordenador. El resultáu ye guapísimu y la collaboración entrambes mui prestosu.
Capítulu aparte merez esa editorial llamada «Pintar-Pintar» que ye un verdaderu luxu tener n’Asturies. Esti llibru, en concreto, tien una presentación perguapa, enllena de detalles y onde too ta cuidao y bien cuidao. A ello contribui l’aciertu al escoyer un formatu «almanaque» (ábrese d’abaxo a arriba, y non de derecha a izquierda, lo qu’estiliza les figures y llogra que los testos tean na mesma páxina. Pero esti llibru nun ye una esceición. A la escontra, esa calidá y esi bon gustu ye la regla xeneral de la so produción editorial que merecería, per parte de toos, un mayor reconocimientu y, sobre too, unes mayores axudes económiques. Porque préstanos muncho presumir de calidá no que cinca a la lliteratura n’asturianu, pero poco facemos pa caltener esos niveles. Asina que yá lo sabéis, a mercar el llibru, que ye un regalu preciosu y, de pasu, axudamos a caltener esos altos niveles de calidá de los nuestros llibros. Nun val llueu llamentase de que tolo nuestro va esapaeciendo (periódicos, llibreríes, editoriales…) Tamos a tiempu d’evitalo.
