Ya falé nuna anterior entrada de la «International Opera Studio», benemérita asociación que promueve y publicita a nuevos cantantes d’opera. Aquellos que terminaos los sos estudios de «bel canto», entovía nun entraron nel mundu profesional. Una asociación qu’escoyó a Xixón como sede española, de mou que los xixoneses tenemos el privilexu de ver y sentir los montaxes de les operes sobre les que tán trabayando.
Depués del «Elisir d’amore» de Donizetti, ya reseñada nesti blogue, ufierten agora una obra mayor: «La Bohème«, de Puccini, y lo cierto ye que’l nuevu elencu escoyíu polos organizadores nun desmerez nada colos dos anteriores. Más entá, abúltame que’l nivel d’esta nueva obra ta percima de los del elisir que vendía aquel charrán y que lo curaba too. Cualquier medianu aficionáu a la ópera conoz, anque nun la viere entera, cachos d’esta guapísima obra de Puccini, y el dramatismu del so llibretu: La vida bohemia de cuatro aspirantes a artistes nun áticu de París, cola fame, el fríu y les ilusiones propies del casu y de la so xuventú. Entós apaez, casualmente, Mimí, una guapa vecina, que cala mui fondo nel corazón de Rodolfo, l’escritor. Amores, desamores, enfermedá y muerte… too ello acompañao por otros númberos qu’encartien pa quitar dalgo de dramatismu al argumentu.
La verdadera trunfadora del elencu -yo fui a la versión del sábadu, el domingu había otru repartu- fue la cantante
ucraniana Irina Lévia, pletórica de voz y con bon xestu, anque na parte escénica igual resultaba un poco «grandona» pal Rodolfo de turnu. Esta estupenda Mimí cantó con fuercia y emoción les díficiles partes que tien encomendaes, faciendo saltar les llárimes del respetable na, por otra parte demasiao llarga, escena final. El tenor David Barrera, nel papel de Rodolfo, principió mui bien, col so timbre de voz agudu y moviéndose bien nes notes más altes, pero al mio modestu xuiciu, baxó dalgo nos siguientes actos. Cumplió. El barítono Manuel Mas fizo un Marcello convincente de voz y escena, anque-y falta un poco más de potencia en dellos momentos. Y Nela Saric, nel papel de la «casquivana» Musetta, tuvo mui bien sobre too nuna «sensual» aria que fizo sonreir y que lliteralmente bordó.
La escenografía fue mui clásica, a la escontra de la opera anterior na qu’hubo munches novedaes, siguiendo al pie de la lletra’l libretu orixinal. Y la orquesta tamién collaboró al bon fin d’esta «La Bohème» a la que la xente -llenu’l teatru Xovellanos- aplaudió con puxu, tal y como suel asoceder siempre equí en Xixón. Somos un públicu fácil.
