Reconozo que fui un pocoñín a rastres a la conferencia de «Fonsu» (Juan Alfonso Fernández García) nel Atenéu Obreru de Xixón esti martes pasáu. El día yera de perros y el tema, con ser d’interés, tampoco nun yera p’antroxar demasiao: «Los contactos ente música popular y música culta nel repertoriu musical de la gaita asturiana». Como pa tirar cohetes, vamos. Pero gracies a la cafiante insistencia de la mio muyer, p’allá fuimos. Dicir que la conferencia fue una de les más guapes que sintiere nos últimos años ye dicir poco. Fonsu, direutor del Muséu de la Gaita dende va munchu tiempu y estudiosu de la musicoloxía asturiana, fai eso tan difícil de «enseñar deleitando«, asina que llogró metenos nel mundu de la gaita y de la música tradicional asturiana con una seriedá y, al tiempu, un entretenimientu difíciles de superar.
Nun quiero -nin podría- esmenuzar tolo qu’ellí se dixo nin siquier retafilalo, debío a la riqueza de los temes trataos,
abaste dicir que pela esposición de «Fonsu» pasaron Baldomero Fernández, Torner, Martínez Abades, pero tamién Listz, Glinka y Rimsky-Korsakov. El gaiteru Lliberdón y Remis. La música popular y la música culta. El Romanticismu y el Nacionalismu, el Lied alemán… y l’asturianu, pa pasar llueu a comentar cuál yera’l canon de la música asturiana, cuándo principió a fixase y cómo ye un canon que fue variando colos tiempos. Hubo histories, anéudotes y escuches musicales y too ello encartió p’adeprender un montón sobre un tema nel que yo ando mui ensuchu, al tiempu que tuvimos dos hores entreteníos y cola boca abierta. Sólo por sentir tocar la «Marcha real», l’antigua marcha de granaderos, por un grupu andalusí que lo tien recuperao de cuando los árabes andaben per España, ya pagaría la pena tola conferencia.
Asina que norabona grande al amigu «Fonsu», a l’asociación asturianista Ástura, que lu llevó, y al Atenéu Obreru que siempres se presta pa entamar esta clas d’actos. Y gracies a la mio muyer que me sacó de casa, con un tiempu inclemente, porque la cosa mereció la pena. Si la conferencia vuelve a repitise, nun vos la perder.
