Facía una mañana de muga y vientu, más propia pa quedase en casa, cuando m’allegué hasta’l Muséu del Pueblu d’Asturies en rempuesta a una invitación que me ficieren p’asistir a la presentación d’un llibru. El llibru yera (y ye) Cancioneru de la gaita asturiana, y son los sos autores Eugenio Otero Vega, Fonsu Fernández García y Gausón Fernande Gutierri. La primer sorpresa que llevé fue que’l recintu, y llueu el salón d’actos, taben atarraquitaos de xente y, la verdá, había que tener moral p’averase hasta ellí con esi día abegosu. Ello quier dicir que’l tema interesa y muncho. Como esto nun ye un requexu d’esos de xente famoso, diré namái que vi perellí, per orde d’apaición, a Fonsu Fernández (claro), a Vanessa Gutierrez, a Berto Álvarez Peña, a Asturín Paredes (que llegó con una pingadura como la mía), a Tino’l del Garrapiellu, a Urbano Rodríguez el de l’Academia… y aparo porque sí que paez una «crónica roxa», que ye más entá que la rosa. Y tamién (y sobre too) munchos gaiteros y xente rellacionao col mundu de la música tradicional asturiana.
Tres unes pallabres del Presidente de la Fundación Municipal de Cultura, intervieno en primer llugar Fonsu Fernández que fizo un poco como de «mayestru de ceremonies» y tuvo perbién. Llueu intervinieron los otros dos autores que, anque dixeron que nun teníen vezu de falar en público, lo que cuntaben yera tan interesante que nun se notó esa falta de «rodaxe». Y fueron bien aplaudíos, como tamién lo fueron una pareya de gaiteru y tamboritera qu’actuaron al entamu y al final, como pa enmarcar l’actu. En cuantes a la obra dicir que, en realidá, son dos pues trátase de dos tomos bien estremaos nel so conteníu.
El primeru trata de la Historia del instrumentu y los sos usos na sociedá asturiana: De los «tocadores» y de los «facedores». De la visión social qu’incorpora, el so «simbolismu». De les distintes funciones de la gaita, relixoses o profanes, y amiesta un separtáu mui interesante reproduciendo planos de gaites antigües. Too ello esaguao con numberoses semeyes, provinientes de la riquísima Fototeca del Muséu (dixo Fonsu que teníen ¡un millón! d’imáxenes) que namás por elles pagaba la pena, el viaxe y la pingadura. El segundu tomu contién más de trescientes partitures, ordenaes pelos xéneros o estilos, lo que resulta mui afayaízo pa trabayar, amestando tamién una misa de gaita completa.
En fin, una presentación guapísima, a lo llargo de la cuál diben proyeutándose nun «power-point» (peme que s’escribe asina) unes semeyes antigües de gaiteros que nun teníen desperdiciu, como una de 1914 na qu’apaecía’l gaiteru Manolo Rivas tocando delantre de la Infanta Isabel, otra de 1916 col gaiteru de Lliberdón en Puerto Rico, o un mozu soldáu n’África tocando la gaita, en 1921, añu precisamente del famosu «desastre d’Annual» que quiciás lu llevo per delantre. Norabona, entós, a los autores d’esta importantísima aportación a la cultura asturiana y que’l llibru tenga’l recorríu comercial que merez. O seya, mui llargu.