L’Academia de la Llingua Asturiana ta acabante d’espublizar na coleición «Llibrería Llingüística» la obra del filólogu alemán Helmut Brammerts: «El sistema temporal en asturianoleonés: el habla de Somiedu». Aprovecha l’ALLA pa presentar un nuevu formatu de la so coleición que resulta más modernu y amañosu.
Helmut Brammerts (Mechernich, 1939) ye un filólogu alemán especialista nel área del deprendimientu y la enseñanza de llingües. Investigador na Ruhr Universität de Bochum, trabayó nos ámbitos de les llingües romániques, la llingüística y la didáutica de la enseñanza d’idiomes.
Nel so llibru Brammerts fai un aporte a la filoloxía asturiana seique más valiosu por ser un trabayu escritu en 1969, espeyando l’estáu de la llingua de va más de mediu sieglu y analizando fondamente los precedente científicos de la dómina. L’autor realiza, nuna primer parte de la investigación, un informe críticu sobre l’usu de los tiempos verbales n’asturianu, a traviés de los estudios dialeutales del momentu. Darréu, adiéntrase y estudia’l sistema temporal de la fala de Somiedu por mor de d’unes grabaciones magnetofóniques que fizo en dellos llugares del conceyu de Somiedu nel añu 1965. A lo cabero’l trabayu, l’autor amiesta la trescripción de dalgunes de les grabaciones, reproducíes facsimilarmente nesta edición, como amuesa de testos dialeutales d’esta zona del occidente d’Asturies. La torna ye de Mónica Sánchez González.
