Llégame esti día’l nuevu númberu de la revista CLIJ (Cuadernos de Literatura Infantil y Juvenil) que supón el 257, dientro del añu 27 de la so publicación. Soi sociu fundador (y collaborador) dende l’aniciu por un doble motivu: polo muncho que me presta esta clas de lliteratura, y pola amistá cola so direutora, la xixonesa Victoria Fernández, una de les persones que más sabe y más fizo pola LLIX nesti país. La revista pasó del so calter mensual al bimensual por mor de la crisis y les dificultaes económiques de publicación. Y tien munchu méritu’l llevar tantos años (27) trabayando nuna estaya que nun suel tener demasiao reconocimientu social. Yá sabemos, la lliteratura infantil/xuvenil nun ye «cosa seria».
Ésti caberu númberu vien atarraquitáu de coses interesantes. En primer llugar un interesantísimu artículu, densu y estensu, tituláu «Infancia y pedagogía en la ficción literaria», a cargu de la profesora titular del Departament de Teoría i Historia de l’Educació de la Facultat de Pedagogía, de la Universitat de Barcelona, Nuria Obiols Suari. N’él fai un repás de los distintos protagonistes de la LLIX, tanto bonos como malos (Mowgli, Pinochu, Pippi, Momo, Tom Sawyer, Alicia…) analizando los estremaos modelos de neños/es al rodiu de determinaes conceiciones pedagóxiques a lo llargo la historia. L’estudiu «Adaptaciones teatrales para niños y jóvenes. Los clásicos del Siglo de Oro Español», del profesor Luis Ahumada del ESAD de Murcia. Un artículu de Gabriel Abril sobre la perguapa película «Matar a un ruiseñor» (una de les mios preferíes de tolos tiempos) sotituláu: «La dignidad que emociona«. El reportaxe «Ilustratour. 2013, seis años creciendo«, alrodiu d’esi festival internacional que se cellebra en Valladolid. «La mirada de la infancia», l’espaciu del escritor Juan Tébar, esta vuelta dedicáu a Italo Calvino y los sos personaxes. Y la estaya «Cine y Literatura«, del críticu Ernesto Pérez Morán, qu’analiza (y nun pon mui bien) la película «Zipi y Zape y el clan de las canicas.» Xunto a ello, los llibros recomendaos, por edaes; el Diccionariu de formigues, de Mariasun Landa y l’editorial, siempre xugosu, de la propia Victoria Fernández qu’esta vez titúlase: «Leer más para (no sólo) hablar mejor».
En resume, un estupendu númberu d’esta yá veterana publicación que recomiendo a los llectores d’esti blogue. Paezme que la revista nun se vende en quioscos nin llibreríes, o seya qu’habría que se suscribir o dase una revolada por cualquier biblioteca, pues la mio esperiencia ye que la tienen en toes. Inclusive la tengo vista na de la Facultá de Filosofía de Santander, dalguna vez que pasé perellí. Ánimo que paga la pena.
