Aproveché una baxada a Xixón dende les mios posesiones de Castelgandolfo (la casina de Pión), pa dar una revolada pol, n’otres ocasiones percriticáu, Festival del Arcu Atlánticu. Y eso ye lo primero que quiero comentar. Esti añu too fueron allabancies y parabienes pal eventu, qu’atropó pergrandes cantidaes de xente al rodiu de la cultura, l’artesanía, la música y les llacuaes. En toles temes (culturales, artesanos, musicales y gastronómicos) tratáronse les coses con moderación, lloñe de los escesos de la polémica Selmana Negra de los novecientos noventa y nueve mil novecientos noventa y nueve visitantes (creo qu’a la fin un que diba a dir púnxose malu). Pero ye curioso que, el mesmu festival que punxo en marcha Carlinos Rubiera, y que fue tan criticáu por tirios y troyanos (incluyíos los del ordenador), en cuantes qu’él marchó, dexó de criticase, anque la estructura de funcionamientu sigui siendo la mésma. ¿Conclusión? La que siempre dixi: hubo una campaña orquestada dende un mediu de comunicación asturianu, siguida por un grupu de, vamos llamalos intelectuales, y tamién, porque ye verdá, de xente de bona voluntá que nun taba pol tema. Con tol derechu. Pero qué casualidá que, repito, marchare’l pecador asturianista, aldeanu y cantautor, pa que los ataques cesaren y too fueren parabienes.
El casu fue que paseémos pela feria, merquemos llibros, asistimos a presentaciones (el llibru d’Antón García tengo muncha ganala d’empezalu), a coloquios sobre la traducción n’asturianu, a conferencies sobre autores gallegos, vimos a goxeros trabayar, un espectáculu nel mar que nos paeció una simplayada, comimos nos puestos de los portugueses y tomemos vinu verde, como’l de la canción de «María la Portuguesa». Too mui prestoso y atarraquitao de xente. Y hasta tuvimos tiempu de sentir cantar tonada na Plaza Mayor a un par de rapacinos que lo ficieron xenial. Por cierto, ¿nun hai otru presentador que nun fale nun castellán tan repunante, nuna actividá cultural dafechamente asturiana? Porque aquello yera de delitu.
En fin, un añu más d’un festival que, pesie a la so mocedá, yá paez consolidáu. Asina que, a siguir p’alantre y gracies Rubiera pola iniciativa, por aguantar carros y carretes y por nun garrate al cargu como una llámpara. Eso qu’avecen a faacer tantos otros…