Seya de les Lletres o de cualisquier otra cosa, una selmana son siempre siete díes. Nin más, nin menos. Poro, nun puen metese tantos actos xuntos-paralelos-superpuestos-tresversales al rodiu de la llingua asturiana. Pasamos el restu del añu al trán-trán, y agora nuna selmana queremos atropar tolo qu’esiste nel mundu mundial al rodiu del nuestru idioma. Total, qu’un acaba desfondáu y col tastu de que nun cumplió con munches coses y munchos amigos colos que-y prestare tener cumplío.
Un, o seya yo, que soi persona tranquila y que, amás, nun conduzco, vime como Obama pa poder facer dos presentaciones, un actu académicu, y delles entrevistes na RPA y la TPA ensin que la mio salú se resintiere. Coime, ¿nun podía espardese la cosa un poco más? ¿Por qué nun facer el Mes de les Lletres o allargar toes eses actividaes a lo llargo l’añu? Bueno, ehí queda la idea. Polo demás fue mui prestosa la presentación del miércoles nel Centru Municipal de L’Arena, acompañáu del gran Severino Antuña, ocurrente y simpáticu como siempres, y dos grandes muyeres (que non muyeres grandes, que ye otra cosa), como María Xosé Rodríguez y Cristina Valdés coles que tuvi la suerte de compartir escenariu. El xueves pasé pola Feria del Llibru y del Discu n’Asturianu, d’ Avilés, onde Damián Barreiro, «fan» confesu y convictu de la serie Fontenebrosa, fizo una prestosa presentación, xunto a Esther Prieto y a mí mesmu. Hubo xentuca y la cosa salió perbien.
Nel actu de l’Academia, el vienres nel Campoamor, noté muncha mayor asistencia que n’años anteriores, con
alcaldes -incluyíu el d’Uviéu- el Conseyeru de Cultura (que ta a les dures y a les madures), el nuevu Rector (que yá diba cuando nun tenía’l cargu), munchos políticos de tolos signos, sindicalistes y eso que se da en llamar «xente de la cultura», como si hubiere otra que fuere «de la incultura»… Pero sobre too prestóme ver perellí a amigos que diba tiempu que nun vía: Antón García, Xuan Bello, Dolfo Camilo Díaz… Por cierto que Dolfo venía acompañáu pol Direutor de la Biblioteca Nacional d’Uruguay, Raul Vallarino, col que tuvi un aparte mui simpáticu porque él tien un llibru de fútbol tornáu al asturianu, «Los suaños del delanteru centru», y contóme un par d’anéudotes mui perreres. Tamién tuvieron mui acertaos los dos nuevos miembros correspondientes, con discursos intelixentes y bones declaraciones d’intenciones qu’amuesen l’aciertu del so nomamientu. A Xosé Antón, del equipu investigador de Carlos López Otín (que tamién taba nel actu), nun lu conocía personalmente, anque como m’esclarió elli mésmu, taba nel xuráu que me concedió’l premiu d’ensayu «Fuertes Acevedo» nel 2010. Y el probe de Pablo, al que tampoco nun conocía de visu, llegó tou alloriáu porque tenía una avería acuática en casa y a los dos neños penriba les sielles. Cuasi llega tardi. Volví a sentir, como l’añu pasáu, nun poder dir a la «mani» por culpa’l protocolu, pues tuvimos que tar nel Teatru Campoamor una hora enantes pa preparar la que podíemos llamar «puesta n’escena». Nun sé si compensa. A ver si pa otros años pue iguase de dalguna otra manera. Y eso ye tolo que se m’ocurre al rodiu d’esta selmana de llocos, mui importante pero, pa un sedentariu como yo, un poco escesiva. Menos mal que yá finó.
