Esti miércolés pasáu intervine nes XXXIII Xornaes Internacionales d’Estudiu qu’entama l’Academia de la Llingua. Compartí mesa con Xosé Ramón Iglesias Cueva, Pablo Rodríguez Medina ya Inaciu Galán y González. Iglesias faló de les primeres obres de Pepín de Pría, Medina del blogue de Miguel Allende «El cuadernu de rayes», y Galán de l’adautación del enseñu del asturianu nel Marcu común européu. Los tres tuvieron bien y siguimos les sos intervenciones con interés.
Pola mio parte presenté una comunicación de títulu un pocu llargu: Vides paraleles (que converxen nun puntu) de Don Xuan Junquera Huergo y Don Xosé Napoleón Acebal. Trátase d’un resume d’un trabayu más ambiciosu, entovía inéditu (y tal y como tán les coses, pa siguir) tituláu «Clásicos Populares», onde pretendo averar a los nuestros clásicos lliterarios a un públicu más ampliu que’l propiu de los especialistes. Asina, y de mou un poco desenfadáu, falo de la vida y obra d’estos dos ilustres xixoneses (tengo a otros na «recámara»), al tiempu qu’aporto datos nuevos y otros poco conocíos al rodiu de dambos personaxes. El títulu abúltame que ye acertáu, pues curiosamente Junquera Huergo y Acebal y Morán, atropen pa sí unes circunstancies vitales, profesionales ya intelectuales mui semeyantes.
Dambos nacieron en Xixón, llevábense namás que dos años (1804 y 1806), estudiaron nel Institutu creáu por Xovellanos, pasaron a la Facultá de Derechu de la Universidá uvieina, desarrollaron la so vida na ciudá de nacencia y ocuparon cargos políticos importantes: Don Xuan Junquera llegó a a ser Alcalde de Xixón en 1843 (datu que nun figura nes biografíes qu’hai publicaes) y Don Xosé Napoleón fue, n’otra corporación, Alcalde 2º. Y lo que más nos interesa a nosotros, los dos escribieron n’Asturianu y fueron pioneros naquello que ficieron. Junquera fizo la primer Gramática Asturiana, acompañada d’un Diccionariu, y Xosé Napoleón escribió les primeres obres de lo que llueu diba a conocese como «teatru rexonal asturianu» llantando, amás, el modelu peronde diben discurrir la mayoría d’elles nos tiempos siguientes. Tanto «Los Trataos» (1835), como «El camberu ensin les truches» (1879), van crear unos estereotipos qu’entovía güei siguen repitiéndose peles compañíes que, con tantu ésitu de públicu, representen esta frasca de teatru popular. Unes vides, pues, paraleles, a les que yo plantegaba la incógnita de si converxíen nun puntu. Ye dicir, si Junquera y Acebal llegaron a conocese ya, inclusive, a ser amigos. Incógnita que dexo equí abierta pa fadiar a los que nun fueron, que tendrán qu’esperar a la publicación del trabayín nes páxines de la revista «Lletres Asturianes» pa enterase.
En fin, qu’al marxe de bromes, la cosa peme que gustó y yo tamién salí satisfechu d’unes xornaes ya antigües y que dan prestixu a l’Academia, a la Universidá y a Asturies. Poder participar ye dalgo mui prestoso.
