Trabayu de CampuVicente Garcia Oliva

Yera un banqueru mui ecoloxista. Practicaba una esplotación sostenible.

El pasáu cinco d’esti mes de marzu, recoyía’l diariu “El Comercio” una información sobre’l Plan Espacial de Proteición Civil ante’l riesgu d’inundaciones, ellaboráu pol Gobiernu del Principáu. Polo visto, lleva dos años nesi empeñu. Esi estudiu, supongo que fechu con perres públiques, o seya de tolos asturianos, detalla’l papel que, delantre una riada, deben xugar “l’Axencia Estatal de Metereoloxía, la Delegación de Gobiernu del Principáu y Proteición Civil de los ayuntamientos. Y estrema tamién, los llugares con mayor riesgu d’inundación. Paez ser qu’hai unos 4.000 edificios que se llevantaron nes caberes décades en suelos con riesgo d’inundación.

Lo curioso del casu ye qu’esa información nun va a llegar a la xente que cuerre esos riesgos, porque según la conseyera de Presidencia, Xusticia ya Igualdá, Mª José Ramos, “xeneraría una alarma innecesaria”. ¡Pero, bono, en manes de quién tamos! En primer llugar ye de duldosa llegalidá que se dexe construyir en zones de riesgu d’inundación, anque esi riesgu fuere pequeñu. En segundu, habría d’avisase al posible comprador de la esistencia d’esos riesgos, pues asina ésti podría valorar la decisión de comprar o non, según el so propiu criteriu. Pero suponiendo qu’esos estudios nun tuvieren fechos hasta’l día de güei, esa ye una información que nun se-y pue furtar al pueblu asturianu. La xente tien derechu a saber si les sos propiedaes, y la so propia persona, cuerren dalgún pelligru y que grau de pelligrosidá ye esi (hai unos índices que lo miden). D’esa manera, sedrá él mesmu, y non otros, el que decidirá si quier seguir viviendo ellí, o si prefier contratar un seguru que-y cubra esa eventualidá.

La organización Xeólogos del Mundu, lleva años trabayando en llugares de grandes pelligros d’inundación (Hondures, El Salvador…) alertando a la xente d’esos pelligros. Y xunto con esa xente, delimitando les zones más segures a onde acudir nun d’esos casos, y l’itinerariu a seguir por cada grupu o centru urbanu pa evitar colapsos o graves confusiones nesos momentos d’alloriamientu.

Ye lo que se fai cuando montamos nun avión, o cuando, como l’otru día, anúnciase una tormenta o cualquier otru fenómenu de la naturaleza. Lo prioritario ye que’l interesáu lo sepa y lo valore. L’otro ye tratanos como a ciudadanos inorantes o menores d’edá. ¿O sedrá qu’hai asuntos económicos detrás d’esa falta d’información, pa que’l valor de los terrenos nun baxe neses zones? Eso sedría abondo más grave.

Yera una relixón mui rigurosa, pa facete miembru teníes que presentar una fotocopia del alma.

Títulu: “AÑOS DE GUERRA”

Autor: Vasili Grossman

Editorial: Círculo de Lectores, S.A. Col. Galaxia Gutenberg

Traducción: La propia editorial

Añu: 2009 (del orixinal de 1946)

ANTES Y DEMPUÉS DEL ESTALINISMU.- Cuando un llibru tien ésitu, los editores y distribuidores avecen a rebuscar nel pasáu del escritor y, aprovechando’l “tirón” d’esi ésitu, publiquen nueves obres del autor. Unes veces tien interés lo que se publica, por sí mesmo, o porque vien a completanos la visión d’esi autor y, otres, la mayoría, nun tienen más méritu que’l nome que lleva na sobrecubierta.
L’añu 2007 publicóse una de les noveles más interesentes, al mio xuiciu, de los últimos tiempos: Vida y destino, de Vasili Grossman. Una perfeuta hestoria que, col telón de fondu de la batalla de Stalingrado, cuenta la vida d’una familia na retaguardia, al tiempu que va esmenuzando la situación de degradación política producida pol estalinismu. El terror, los campos de concentración, l’esbarrumbamientu moral ya ideolóxicu d’aquel comunismu… y, al empar, la valentía de delles persones puestes en situación llímite. Esta obra, lloxicamente, tuvo prohibida pol réximen de Krushov y, sólo de milagru, salvóse una copia que pudo editase tiempu depués lloñe de la URSS.

Al calicor del so ésitu, publícase agora Años de guerra, un garapiellu de textos que l’autor, que fue corresponsal de guerra, escribió ente los años 1941 y 1945. Hai, nel llibru, cróniques de guerra, dalgún cuentu y una novela (El pueblu ye inmortal) que se fue publicando por entregues a lo llargo de 1942 y que fizo famosu a Grossman en tola Unión Soviética. El llibru, tolos escritos que nel se recueyen, son un cantu al valor guerreru de los soviéticos, a los militares, que llograron espulsar del so país a los exércitos alemanes y, al tiempu, al valor del pueblu como tal, a los homes y muyeres auquiera que tuvieren y a un réximen que plantó cara al nazismu y consiguió vencelu. Les más de seiscientes páxines del llibru tan trufaes de frases como: “la grandeza d’espíritu y la nobleza d’oxetivos”; “la enerxía bolchevique y l’audacia revolucionaria”; “los millares y millares de grandes y al empar modestos trabayadores -obreros ya inxenieros- que col so infatigable llabor coles sos honraes manes d’oru, col so duru sudor fabricaren los cañones, tanques y aviones del Exércitu Roxu”. Etc. Etc.
Ye innegable l’estremu valor del pueblu rusu y de dalgunos de los pueblos de la URSS invadidos polos nazis. La hestoria ta ehí y ye cierto que nos campos rusos, ucranianos, bielorrusos… principió la derrota de Hitler, ensin escaecer que fueron ellos los que primeron entraron en Berlín. Too eso retrátalo Vasili Grossman con emoción y grandeza. Pero lo que daveres se dexa ver con esta novela ye la diferencia de valoración d’un réximen, qu’apienzó siendo una esperanza pa un pueblu eternamente primíu, y finó camudándose nun réximen represor y asesín. Fue’l pasu del bon “padre” Stalin, al dictador Stalin. Y tolo qu’eso traxo consigo.

La llectura, pues, de les dos obres de Grossman dannos la cara y la cruz d’unos fechos hestóricos que, nun por ser conocíos, son menos interesantes. Quiciás, pal que nun conoza nengún de los dos llibros del autor, fuere meyor lleelos nel so orden d’apaición, p’atalantar meyor esi tastu de tristura y señaldá, esi posu que fue dexando la vida nos escritos de Vasili. Esa deceición que se-y escapa en Vida y destino, nel trazu d’unos personaxes dafechamente perdíos nel marasmu d’una sociedá en descomposición. Que nun la entienden, nin entienden cómo, depués d’unos anicios tan esperanzadores, pudo llegar a esi estáu.

Dicir, p’aselar, que Vasili Grossman fue’l primer periodista que llegó al campu d’esterminiu de Treblinka. Los horrores qu’ellí vio recuéyelos nun de los capítulos del llibru (L’infiernu de Treblinka). Yo nun pude pasar de la metada de la so llectura. La esperanza qu’él tenía de que nun se repitiere aquello, paezme que nun fue a cumplila.

Cola Ilesia Católica había que firmar un “Discordatu”.

FETEN.-  Tuve l’otru día nel Centru Municipal de Pumarín (mal llamáu de “Gijón-Sur”) viendo la obra de teatru “La cabeza del Dragón”, del ínclitu Valle-Inclán. Representábala’l grupu de teatru asturianu (xixonés, pa más señes) “El callejón del gato”, dientro de la “Feria Europea de Teatro para Niños y Niñas”. Nun tiempu en que prima la imaxen sobre’l testu, en que too ye dixital y d’efeutos especiales. En que, con una careta, una cara pintada o, cenciellamente, un mozu o moza que cuenta cuentos ya dicen que faen teatru pa neños, ye mui d’agradecer qu’un grupu de rapazos y rapaces ponga n’escena una verdadera obra de teatru, onde´l llinguaxe ye importante. La obra, estrenóse nel añu 1909 (hai cien años) nel “Teatru de los Neños” fundáu por Jacinto Benavente. Ye, como tien de ser, una obra nun sólo pa neños, sinón “pa toos”. L’adaptación, los efeutos escénicos, el vestuariu, les lluces y, sobre too los actores, tán al serviciu d’un testu divertíu, pantásticu y enllenu de pequeños guiños, que faen la delicia de los que tuvimos la suerte de poder velo. Norabona a la direutora del grupu (y tamién actriz) Ana Eva Guerra y al restu los actores pola so representación que, como cuasi siempre, pasó ensin mayor relevancia pa los medios de comunicación asturianos.

FACEBOOK.- “Lo que nun ta en Facebook nun esiste”, suel decise de forma babaya. Pues cuidao con Facebook, hai que dicir agora. Esti fenómenu, que nació dientro d’un contestu universitariu, camudóse nun monstruu al serviciu de determinaos intereses nun del too claros. Periódicos serios, como “The Guardian”, alerten del peligru d’un sistema al que, mediante un cenciellu “click”, tán dándose-y la propiedá exclusiva y perpetua de los conteníos de les cuentes qu’ellí furrulen. Per un llau, el perfil que metemos, ye utilizáu pol sistema que lu revende a los sos clientes, y a quien ellos quieran, pa tou tipu d’encuestes, trabayos, “marketing”, etc. Y por otru, tolo qu’elli colgamos, semeyes, vidios, opiniones, etc. pue ser utilizao polos propietarios de Facebook, pa siempre. Da igual que nos demos de baxa o que morramos. Ellos tienen la propiedá eterna, según se diz nes bases qu’allegremente se firmen. Mete mieu, amás, qu’un de los socios mayoritarios de Facebook, James Breyer, tenga rellaciones direutes cola C.I.A., la Central d’Intelixencia Norteamericana. Pal que quiera más detalles, hai un vidio mui interesante en:

http://www.youtube.com/watch?v=xzTgIdNW6lg

A FIGOS.- A figos, anda’l Gobiernu Asturianu que, mientres nel parllamentín presume por boca del so Conseyeru d’Industria de lo bien que lo tán faciendo nel tema industrial, prioritariu, dicen, nel país, enterámonos de qu´Asturies recibe munchos menos fondos mineros que Castiella-La Mancha, que Castiella-Llión ya inclusive qu´Andalucía, siendo como semos la comunidá que mayor volume d´emplegu perdió nel seutor del carbón. Y too ello, porque neses otres comunidaes fueron a presentar proyeutos empresariales de mayor interés. N´Asturies, los proyeutos presentaos son de poca inversión o asitiaos en municipios que nun son dafechamente mineros, lo que rebaxa´l porcentaxe d´axuda del Plan de la Minería. De fechu, de los 55 proyeutos presentaos, namás 22 taben allugaos nes Cuenques. Pero, eso sí, tol dia “cacarexando”.

¿QUO VADIS, CUBA?.- La muerte, depués d´una llarga güelga de fame, del presu políticu Orlando Zapata, vuelve a llantar d´actualidá´l futuru inmediatu del país caribeñu. La murnia deriva política d´un réximen yá agónicu, qu´acabó va yá munchu tiempu d´esbayar les esperances d´aquella Revolución, que munchos aplaudimos cuando se fexo, pon el más escuru broche final cola muerte del opositor. Qu´entovía hebia paises qu´encarcelen a los que nun piensen como ellos ye yá, amás d´ un síntoma de totalitarismu, una enfermedá moral. Que, pa enriba, esa enfermedá llegue a dexar morrer a dalguién nuna cárcel na que nunca debió tar enzarráu, ye muncho más grave. Mal futuru tien esa perguapa islla, en manes d´una xerontocracia familiar que nun sabe que los tiempos camudaron, mientres ellos fueron incapaces de facelo. La semeya de Lula ente los dos hermanos ye un insultu a la llibertá. Quiero creyer que’l presidente brasileñu “pasaba perellí” nesi momentu, y que la so intención ye poner al so propiu país como exemplu de pa ónde deberíen dir los enfotos del réximen cubanu. Y, al tiempu, esixir la lliberación del restu de presos políticos del país. Tolo que nun fuera eso, tolo que fuera reforzar cola so presencia l´actual estáu de coses en Cuba, sedría una traición pa colos que creyimos nesa izquierda democrática llatinoamericana, mui güérfana dende l’asesinatu de Salvador Allende.  En cuantes a les condenes a esta muerte, véoles mui bien. Pero que nun aprovechen a faceles los qu´entovía tienen a un Guantánamo funcionando o asesinen seleutivamente n´Afganistán o Pakistán. Esos nun tán autorizaos.

Nun sé por que a dalgunos los llamen “Bancos de Sangre”, ¿acasu nun tolos Bancos son de Sangre?

El mundu nel que nos tocó vivir ye dafechamente inxustu. Eso ye dalgo que toos podemos comprobar davezu. Y nosotros, como persones que vivimos nél, deberíemos tratar de facelu un poco menos inxustu, un migayín más habitable. Nun fai falta ser relixosu y creyer en dalgún “más alló” que nos recompense. Esiste una cosa que ye la ética humana y el sentíu de la xusticia que deberíen bastar pa movilizanos a favor de los que menos tienen, d´esos millones de seres humanos que, lliteralmente, muerren de fame o d´enfermedaes que yá tendríen de tar esaniciaes.

Hai munches maneres de ser solidariu y trabayar en pro d´esa parte de la humanidá que lo necesita, dende´l trabayu en dalguna organización non gubernamental,  la collaboración faciéndose sociu, o´l dar, dacuando, dalguna perra de les que nos sobren, cualquier cosa que podamos facer sedrá siempre bienvenida por esos collacios nuestros asolaos por guerres, fames o enfermedaes. Una d´eses abondes formes de ser solidariu ye de magar el propiu trabayu o afición, siempre que se pueda. A los que nos presta escribir (nun voi llamanos “escritores” que ye una cosa mui seria) podemos facelo colo qu´escribimos, bien denunciando estes situaciones d’ inxusticia, o bien empobinando la nuestra escritura y les poques perres que semos a ganar con ella, a favor d’esos desheredaos de la diosa fortuna.

Una de les persones más enfotaes que conozo nestos menesteres ye’l mio amigu Rubén Serrano, escritor y periodista. Conocílu va pocu tiempu en Piedres Blanques. Cellebrábase’l Día Mundial de los Oceanos, el día 8 de xunu, y coincidimos los dos como invitaos nuna mesa redonda na que participaben xentes rellacionaes col tema de la mar: fotógrafos, submarinistes, escritores, etc. Ficimos una bona amistá, y asina enteréme de les munches actividaes que tien en favor de persones y asociaciones que lo necesiten. Creador d’unos simpáticos personaxes infantiles, los “peque-cíclopes”, mui del gustu de los neños, agora, pente medies de l’asociación pal Fomentu de la Educación “Portal”, esos llibros van viaxar hasta’l Sahara Occidental pa ser repartíos ente los campamentos saharauis como sofitu pa la llectura y l’aprendizaxe del castellán. Asina mesmo, otres obres suyes entren nel Proyeutu Bubisher, un bibliobús que percorre los campamentos de refuxaos saharahuis.

Como esto de la solidaridá ye contaxoso, enguedeyóme pa que collaborara con dellos cuentos en antoloxíes empobinaes a recaudar perres pa otros proyeutos humanitarios. L’últimu d’ellos un rellatu sobre los neños autistes, pa sacar dineru pa l’Asociación de Padres y Madres de neños con esi problema. N’antoloxía participemos una ventena d’escritores españoles ya Hispanoamericanos (colombianos, mejicanos, panameños…) y la cosa ta tan avanzada qu’esperemos que l’antoloxía salga pal mes d’abril. La cosa ye intentar dar a los que nun lo tienen, dalgo de lo que nosotros tenemos, y los que nun semos ricos, podemos dar otres coses.

Munches gracies, Rubén, pol enfotu col que trabayes polos demás y pola to capacidá p’amestar nos tos proyeutos a otra xente como yo. Dende esti modestu blogue, ehí te va un abrazu.

Esto ye’l mundu al revés, ¿nun tenía que ser Pepe el Ferreiro el qu’echare a l’Alministración del so muséu?

Según l’illustre químicu asturianu don Xuan Pintueles, de los elementos de la tabla periódica, el que salió meyor de la crisis fue l’Uraniu “enriquecíu”.