Trabayu de CampuVicente Garcia Oliva

Les caberes eleiciones sirvieron-y al Partíu Popular pa sacar una mayoría tan grande que, salvo coses rares, nun van tener problema dalgún pa sacar alantre toles sos iniciatives parllamentaries, o seya, toles sos lleis. Como ya dixi en so día, esto debióse al aciertu estratéxicu del partíu (que xubió unos seiscientos mil votos) pero, sobre too, al esbarrumbamientu del PSOE que perdió cuatro millones y mediu de votos. Una llaceria.

El recambiu d’un partíu por otru paecía que yera, mayormente, por mor de la crisis económica. Los socialistes nun paecíen capaces de meyorar la situación financiera, nin atayar un paru galopante que dexaba cada vuelta más trabayadores na cai, y la xente pensaba qu’había que dexar pasu a otros que lo supieren facer meyor. Pero lo que tamos viendo (anque ye entovía ceo) ye que les coses económiques nun meyoren (el paru sigui medrando) pero, amás, y pola puerta d’atrás, tán metiéndonos toa una riestra de proyeutos de llei (que con esa mayoría van sacar alantre) que suponen un nidiu retrocesu, nun sólo nos derechos económicos y llaborales, sinón tamién n’otros derechos ciudadanos que ya paecíen afitaos. Derechos que nada nun tienen que ver cola economía.

Na Educación quiten dalgo tan emblemático como l’asignatura d’Educación pa la Ciudadanía, caballu de batalla de la Conferencia Episcopal y de les asociaciones católiques de pás y más que, ¡manda güevos!, acusen a l’asignatura de partidismu ideolóxicu. Esos que tuvieron dándonos durante años la Relixón Católica como obligatoria, y que nunca nun condenaron (tolo contrario) qu’hubiere dalgo llamao Formación Política, y llueu Formación del Espíritu Nacional, critiquen agora que s’enseñe a los neños cómo ser un bon ciudadanu. Tal paez que polo que nagüen ye porque, en llugar de ser ciudadanos, seyamos súbditos. Nel fondu lo que nun quieren ye que se fale d’otres formes de comportamientu y de vida que les qu’ellos prediquen: les families monoparentales, el respetu a les distintes opciones sexuales, la esistencia d’un estáu llaicu onde toles relixones pueda exercer les sos idegues… Pa más aquello, el ministru del “ramu” punxo un exemplu d’esi supuestu “partidismu ideolóxicu” emplegando una cita falsa d’un llibru que nunca nun se diere nes escueles.

Na estaya xudicial y sanitaria suspéndese l’actual sistema d’interrupción del embarazu, por plazos, como tienen nos paises del nuestru rodiu, pa volver al de hai 25 años, por supuestos. Colo cuál, les muyeres que voluntaria y responsablemente tomen la opción d’albortar, van tener que mentir y falsificar, o volver a Llondres a facelo, les qu’economicamente seyan a ello. Hai, amás, otra contradición. Si se restrinxe’l derechu a albortar, como ye’l casu, deberíen dase facilidaes pa que nun hubiere embarazos non deseyaos. Pola contra, pónense torgues pa mercar la llamada “píldora del día dempués”, que de xuro evitaría munchos d’estos embarazos. Un sinsentíu.

Nun ye’l casu, por falta d’espaciu, de siguir recatafilando otres midíes restrictives, en derechos (recortes na llei de dependencia), en Mediu Ambiente (no que cinca a les enerxíes renovables, a la llei de costes…) o en I+D+i. Pero sí hai que dicir que too ello, tou esti “paquete” de decisiones, vien a suponer un saltu atrás de munchos años nun país que yá de por sí taba historicamente atrasáu respeutu a Europa. Otru día continuaremos col asuntu, porque la cosa nun ta más que principiando. La “moralexa” de too esto ye que, enantes de votar al PP, va a haber que facer como nel cuentu popular, dicir, por si se trata del llobu: “Enséñame la patina per baxo la puerta…”

Nos cementerios siempre ta “abierto por defunción”.

Paez un llibru como cualquier otru: lleva’l títulu; el nome del autor; na parte d’atrás la reseña del argumentu y la estaya xuvenil a la que va empobináu. Tamién lleva’l nome de la editorial y el ISBN. Namás una cosa resalta en cuantes que lu tenemos nes manes: Nun tien portada. L’espaciu empobináu pa ella ta en blanco.

Trátase d’una orixinal propuesta de la Editorial Libros & Libros, de Bogotá, a los sos posibles llectores. Y ye qu’esta importante editorial colombiana, mui inxertada nel ámbitu escolar, promueve un concursu de portaes a tolos que merquen esta primer edición del llibru. La cosa funciona asina: la editorial seleiciona, pa cada estaya d’edá, un llibru de los que va a publicar. Entiéndese que ye’l qu’ellos recomienden como más importante. La primer edición d’esi llibru lleva la portada en blanco y entámase un concursu, ente tolos sos llectores, pa pone-y una portada que guarde rellación col conteníu, col argumentu, o colo que la llectura seya a dici-yos a los rapazos. D’ente toles portaes propuestes, que puen ser individuales o n’equipu, escuéyese la que, a xuiciu del xuráu, seya la más prestosa y, depués, faese una segunda edición yá cola portada escoyida impresa nel frente. D’esi mou, los llectores participen na fechura del llibru, al tiempu que la editorial da a conocer, masivamente, el conteníu del mesmu.

Tuvi la suerte de qu’esti añu Libros & Libros, S.A. (que yá m’espublizó la novela “La hija de la leona”) escoyó pa facer esta guapa idea llectora un llibru míu: la torna al castellán, con ciertes adautaciones pal públicu llatinoamericanu, de la mio novela “Elemental, querida Lisa”. Un trabayu que me prestó abondo facer y que, agora, va a pasar pela peñera de los rapazos pa qu’acaben de construyila. Naguo porque llegue’l momentu de la seleición pa ver qué se-yos ocurre a los mozos colombianos, al rodiu d’un argumentu tan asturianu como’l del mio llibru. Al tiempu que felicito a la editorial por esta orixinal propuesta llectora.

Mentanto aporta esi momentu, ufiértovos en primicia la portada en blanco, onde na parte d’abaxo hai que llantar el nome del “artista” o los “artistes”. Va a ser un guapu recuerdu. Polo menos pa mi.

Los políticos de la oposición siempre tienen propósitu de la Enmienda.

Los dos llibros publicaos hasta agora de les “Crónicas de la Marca del Este”, con rellatos al rodiu del famosu xuegu de rol “La Marca del Este”, nos que participo con un par de cuentos, acaben de ser llanzaos como gran novedá, en formatu dixital, na tienda de comerciu ellectrónicu “Amazon”. Más concretamente, nel e-book que tien en propiedá la dicha tienda. Asina que, el que quiera lleer estes interesantes cróniques, arreyaes al tema de la Fantasía Heróica o como tamién se lu conoz, de maxa y espada, yá pue mercales del mou más cenciellu y a un preciu cuasi regaláu. Pa ello nun tien más qu’entrar na web de la tienda: http://www.amazon.es/ebooks-kindle/b/ref=sa_menu_kbo1?ie=UTF8&node=827231031
Con esti enllaz vais derechos. Per otru llau dicivos que va a facese una nueva presentación na Fnac de Parquesur, en Leganés, Madrid, el prósimu día 10 de febreru. Por si dalgún anda perehí estraviáu y petez-y asistir.

¿Y qué tal si ficiéremos a Cascos entrenador del Sporting y a Preciado Presidente del Principáu?

L’anuncia del pieslle del Parllamentu Asturianu y la convocatoria de nueves eleiciones autonómiques, recuérdame a aquel chiste, que siempre me fizo muncha gracia, nel que fallen los motores d’un avión y ésti baxa en picao ensin nengún control. Y un pasaxeru entrúga-y cándidamente al Capitán: “Capitán, ¿qué vamos, a tomar tierra?”. Y el Capitán repónde-y: “¿Tomar tierra? ¡Vais fartavos d’ella! ”. Y ye que nesti momentu los asturianos tamos, por mor d’una clas política dafechamente incapaz, a puntu de fartanos d’eleiciones: na menos que tres, en diez meses.

La única xustificación que tien la esistencia de los políticos, de que los votemos, y de que deleguemos nellos la cuota de soberanía que nos pertenez (nun escaezamos que la soberanía reside nel pueblu), ye pa que resuelvan los problemes. Toos nun podemos gobernar (dalgunos nin queremos), y por ello, arbítrense unes minoríes que nos representen y nes que delegamos el nuestru poder. Quier dicisise, qu’eses minoríes lo único que faen (y nun ye poco) ye representar les distintes tendencies qu’hai na sociedá, na forma porcentual en qu’eses tendencies s’espeyen pente medies de los votos. Pero nel casu asturianu hai que llegar al comencimientu  de qu’esos partíos políticos, toos, en llugar de resolver los problemes, tán convirtiéndose ellos mesmo nel problema. Y ye que nun se puen facer peor les coses.

La llegada de Francisco Álvarez Cascos a la política asturiana produxo un cambiu de tal altor, que los partíos que tradicionalmente se repartíen el poder quedaron descolocaos dafechu. A tal puntu, qu’entovía nun fueron a colocase.  El trunfu de Foro fue nidiu, pero apertáu, y la dubia plantegose nel sen de si sedría suficiente pa poder gobernar. Ún, dientro de la so inocencia, camentó que, ente les dos fuercies de dereches, el PP y Foro, diben a llegar a dalgún tipu de pautu pol que, cola entrada o non de los primeros, nel gobiernu de los segundos, se facilitare un ciertu grau de gobernabilidá. El bien del País lo desixía, y yera’l momentu en que la clas política debería tar al altor de les circunstancies. Que la cosa nun yera imposible amuésalo’l fechu de que na ciudá más poblada d’Asturies, Xixón, les coses ocurrieron asina. Pero, ¡ai, amigu!, a nivel nacional (de la nuesa nación) bien ceo sacáronse les “navayes” a rellucir y en llugar de falar civilizadamente y llegar, na midida en que se pudiere, a alcuerdos, lo que se fizo fue lluchar encesamente por acabar col contrariu. Pol so llau, el restu la oposición (PSOE ya IX) volvió a prauticar lo que ya tuviere fecho cuando’l “casu de Marqués”: ye dicir, eso tan suicida de “cuanto peor, meyor”. O “déxalos que se maten que nosotros salimos ganando”, ensin tener en cuenta qu’ellos saldrán ganando, pero Asturies sal perdiendo.

Porque ¿cúal de toos estos partíos miró palos intereses d’Asturies? ¿Cuál d’ellos tuvo en cuenta la pésima situación del nuestru País, allancáu nes cotes más baxes en tolos índices estatales, con un nivel de paru que mete mieu? ¿Cuál quixo que prevalecieren los intereses xenerales penriba de los suyos particulares? ´¿Dígolo? Nengún d’ellos. Ye cierto que’l partíu de Cascos nun fizo les coses bien. Nun sólo eso, sinón que dio la impresión (igual ye sólo eso) de que don Francisco taba esapaecíu en combate. Y tamién ye verdá que pa coses que, al mio xuiciu, pudieren ser entendibles, nun supieron guardar les mínimes formes democrátiques. Pero tamién lo ye que’l restu los partíos namás ficieron que “poner palos nes ruedes”. Unos por una posible “venganza” escontra’l fíu pródigu, y otros por intentar xustificar los años de Virreinatu del señor Areces, con unos niveles de despilfarru y prepotencia inigualables.

Total que “matáronla ente toos, y morrió ella solina”. ¿Y qué va a pasar agora? La reaición primera que se me vien ye la de dicir: “Comigo que nun cuenten”. Nun toi dispuestu a siguir delegando la mio soberanía nunos partíos irresponsables, mezquinos y ayenos a los intereses del mio pueblu. Ellos nun quieren gobernar…, pues bien, yo tampoco quiero ser gobernáu. Tamos empataos. Si hubiere una abstención del 90 %, igual se preocupaben polo que pasaba y conseguíen llegar a dalgún alcuerdu. Tamos entovía en caliente, pero habrá que lo pensar.

N’Asturies, los Partíos nun ocupen l’espaciu políticu, sinón l’espaciu sideral.

Principia yá, con tola parafernalia de costume, la llamada “carrera haza la Casa Blanca” cuyu fin ye dotar a los EE.XX (y a cuasi tol mundu mundial que somos súbditos d’él) d’un nuevu presidente. El candidatu demócrata va a ser, llóxicamente, l’actual mandatariu, y dame la impresión de qu’esta vuelta va a tenelo mui fácil. Y digo esto porque’l cuartetu de posibles opositores per parte de los republicanos da bastante perceguera. La última ocurrencia de dos d’ellos foi dicir nun actu públicu, pa ganar el votu de la emigración cubana, que taben dispuestos a unviar espíes a L’Habana pa intentar acabar col réxime de los hermanos Castro. Home, yá sabemos qu’eso ye una práutica común de la CIA que-yos dio mui bonos resultaos (un recuerdu pa Salvador Allende), pero que s’atrevan a dicilo en público paez yá una desfachatez. Pero en fin, del “Tea party” y toos esos faches pue esperase cualquier cosa. Frente a eso, claro, Obama ye’l representante de Dios na tierra, o polo menos de la Democracia. Ensin embargu nun too son lluces nel so mandatu. 

Nel primer artículu d’esti blogue cellebraba yo, va agora pa tres años, la llegada del primer negru a la Presidencia de los Estaos Xuníos (“Un negru na Casa Blanca”), recordando lo importante que yera que, depués de tantos años de lluches, inxusticies ya incomprensiones, depués de lo que lleven sufrío, un home de color llegara al puestu más altu del país norteamericanu. La llegada d’Obama traxo consigo grandes esperances de que, depués del oprobiu de los dos mandatos del “vaqueru” Bush, por fin el país mas poderosu de la tierra diba a cambiar el rumbu y facer les coses d’otra manera. O seya, faceles bien.

Nun se pue dicir que’l mandatu de Barak Obama fuere del mesmu calter que’l del so antecesor, nin muncho menos, pero sí ye  verdá que, asina y too, hai n’él munches solombres y munchos incumplimientos qu’habría qu’echa-y en cara. El primeru, el de la situación de la cárcel de Guantánamo. Recordemos qu’Obama comprometióse a zarrar la prisión nel intre, o como másimo nel un plazo d’un añu. Pues bien, nesti xineru cúmplense los diez años dende que llegaron a ella los primeros presos, vinientes d’Afganistán, y el penal sigue abiertu. De les 779 persones que pasaron perellí, nesti momentu (según datos d’Amnistía Internacional) siguen enzarraes 171. Munches d’elles deteníes de forma illegal, alcontrándose recluídes ensin cargu nin xuiciu.  Dalgunes otres fueron condenaes por comisiones militares, lo cual supón un fendimientu de les normes sobre xuicios xustos, y otres 6 podríen ser condenaes a muerte. Polo menos 12 de los presos yeren menores d’edá cuando llegaron al penal. Ye urxente, pues, que la cárcel de Guantánamo seya trancada dafechu, como prometió Obama, y que los presos qu’ellí s’alcuentren seyan xulgaos acordies coles normes llegales, ensin imposición de pena de muerte o, nel so casu, puestos en llibertá. Nun pue consentise la detención “indefinida”.

Y precisamente’l tratamientu xudicial de los menores supón otru incumplimientu del Presidente Obama. Hai, n’Estaos Xuníos, más de 2.500 persones condenaes a cadena perpetua, ensin posibilidá d’escarcelación, que cometieron los sos delitos en siendo menores d’edá. Ye l’únicu país del mundu nel qu’asocede esto. Esiste un consensu xurídicu y moral a nivel internacional, de que nunca nun debe imponese la cadena perpetua a un menor, ensin posibilidá de llibertá condicional, por tratase de persones inmadures y, polo tanto, nun ser dafechamente responsables de los sos actos. Esti principiu, xunto con otros munchos, vien recoyíu na Declaración de los Derechos del Neñu, ratificada por 193 paises. Namás Somalia y Estaos Xuníos nun la ratificaron. El presidente Obama comprometióse delantre de la ONU a facelo, pero entovía nun lo fexo. Como tamién sigue ensin reconocer al Tribunal Penal Internacional.

Quedría falar tamién del so incumplimientu cara al llogru d’una paz duradera nel conflictu palestín-israelí, que diba a lliderar él mesmu, llamando a los israelites al orde pa que negociaren. Pero, na realidá, lo que fexo fue posicionase dafechu del llau de los xudíos, presionáu pol gran lobby qu’hai nos EE.XX., exerciendo’l so derechu al vetu, nes Naciones Xuníes, escontra l’Estáu Palestín. Pero, bono, como esto ya principia a ser mui llargo, déxolo namás qu’apuntao. En fin, que ye una pena que coses que pudieren ser valoratibles nel so mandatu, seyan empañaes por otres nes que nun cumplió, nun sólo lo qu’esperábemos d’él, sinón mesmamente la so propia pallabra.

¿Si Morgan viviere agora, sedría “pirata informáticu”?