Trabayu de CampuVicente Garcia Oliva

UNA GUERRA ¿PA QUÉ?.- Estos díes anúnciase la marcha del exércitu norteamericanu d’Irak. Dexen tres de sí, un país asoláu y desoláu. Un país desvertebráu, corruptu, arruináu. Y lo que ye peor, con más de 600.000 muertos nos siete años y mediu que fai que, George Bush, cola collaboración de Tony Blair y Aznar, faciendo de “palmero”, declararon la guerra a esi país. La esculpia yá la sabemos: teníen armes de destruición masiva. Yera mentira. Pero lo que si se camudó nun arma de destruición masiva fue la propia guerra. Dos universidaes, una d’Irak (la Mustansiriya de Bagdad) y otra d’Estaos Xuníos (la John Hopkins de Baltimore) tienen asoleyáu un informe nel qu’afiten la cifra de 500 muertos diarios, a lo llargo del periodu que duró la invasión. Y agora, el Séptimu de Caballería torna pa casa mentantu Blair diz que’l obró en conciencia. ¿Y qué diaños nos importa a nós la conciencia de Blair? Lo que nos importen son esos 500 muertos diarios qu’él, col vaqueru, y el nuestru “palmero” provocaron. ¡Qué muertes más inútiles!

EL DÍA DE LA NACIÓN ASTURIANA.- Bueno, pues nin siquiera esi día que debía ser aprovecháu pa la xunión de tolos asturianistes/nacionalistes, llogró apautanos a toos nun actu únicu. Nun sé de quién ye la culpa, si ye que tien d’haber una culpa pero’l fechu puru y duru ye que, una vuelta más, somos pocos y desuníos. Seguramente hai causes pa la desunión, siempre les hai. Como dixo aquel políticu catalán: “Nosotros somos nosotros”. Claro, y los otros son los otros. Pero penriba de les causes de la desunión hai que buscar los motivos de la xunión. Los bonos políticos son aquellos que, anque les dificultaes seyan munches, y los defeutos de fondu y forma esistan, son capaces de saltar percima d’elles y algamar la xunión d’intereses, y los intereses del nuestru país deben primar sobre los demás, por xustos que seyan. La situación d’Asturies ye tan afogante, de tanta necesidá política, que nun soi a entender, y creo que munchos asturianos tampoco, como podemos permitinos el luxu de nun tar xuntos. Otru añu más.

UNES INÚTILES CONVERSACIONES DE PAZ.- Una vuelta más (y van…) anúnciense nos medios internacionales les caberes conversaciones de paz ente Xudíos y Palestinos. Y una vuelta más vamos a asistir al fracasu de les mesmes, pesie a la bona voluntá que’l presidente Obama diz que tien pa los problemes de la rexón.  Los Xudíos nun van a parar les nueves colonies que se tán asitiando en territoriu palestín. Ye un procesu que, a esti altor, ye inaparable, sobre too cuando nun se tien interés políticu en facelo. La precaria estabilidá política del gobiernu d’Israel depende de los votos de los colonos, y estos van dalos a los que permitan siguir construyendo nuevos asentamientos. Per otru llau, los palestinos son débiles, politica y militarmente, y amás dividíos. Mahamud Abbas, al que yo-y supongo bona voluntá, nun tien el poder real del so pueblu. Y son los más radicales de Hamas los que tán dafechamente a la escontra de la paz con Israel y, pa ello, van “torpedear” cualisquier iniciativa nesi sen. Yá lo anunciaron y de xuro que van cumplilo. Un problema cada vuelta más engafentáu, sobre too cuando nun hai voluntá política d’igualu. Y el que podría tener la llave del mesmu, los Estaos Xuníos, tampoco lo faen por mor de les presiones del “lobby” xudíu en norteamérica. Por muncho qu’Obama fale de “conversaciones de paz”.

RACISMU PURU Y DURU.- La espulsión de los xitanos de suelu francés, fai que’l presidente Sarkozy se quite la mázcara y amuese’l so verdaderu rostru: el d’un racista de la peor calaña. Ye cierto que la inmigración plantega munchos problemes, y qu’habrá que reordenala pa qu’esos problemes nun faigan naufragar a les sociedaes receptores d’inmigrantes. Ye tamién cierto que los delincuentes, o seya, los que nun cumplen les lleis, deberán pagar por ello, fueren de la nacionalidá que fueren: propios o ayenos. Pero d’eso a que s’espulse a una etnia, como los xitanos, namás pol fechu de selo, hai una enormidá. Hai que recordar que los xitanos fueron tamién, xunto a comunistes, xudios y otres minoríes étniques, un de los pueblos más perseguíos y masacraos por Hitler y los nazis. Resáltase muncho lo de los xudíos, escaeciéndose de les otres minoríes tamién asesinaes. Poro, agora, esta medida del gobiernu francés retrotráenos a aquellos tiempos escuros onde se falaba de “un Fuhrer, una nación y una raza”. Paez mentira qu’un país européu torne a asonsañar a aquellos tiempos. Mentanto, el señor Almunia, eternu perdedor de toles eleiciones a les que se presentó n’España, fala de qu’hai que dar más dineru a los bancos. Paez ser que pa eso, nun hai fronteres.

Acaba publicase una encuesta del Centru d’Investigaciones Sociolóxiques (CIS) que tien revueltu al “piteru” políticu asturianu. Paez ser que, de la citada encuesta, derívase que los asturianos refugamos la España de les autonomíes, y queremos más intervenciones centrales, en llugar d’autonómiques. La conclusión a la que lleguen los comentaristes políticos ye qu’Asturies ta fartuca de tantu nacionalismu y qu’hai que poner “frenu” al avance socesivu d’ellos (de los nacionalismos)

Lo curioso del casu ye qu’Asturies ye una de les autonomíes más centralistes del Estáu. Ensin dengún partíu nacionalista nel Parllamentu, lloñe de los niveles d’autogobiernu d’otres comunidaes, resulta raro que nos quexemos de lo que nun tenemos. La verdá ye otra. Atalanto yo que, de lo que se quexen los asturianos encuestaos ye de la diferencia, cada vuelta mayor, ente lo que consiguen pa los sos paises los partíos nacionalistes qu’ellí actúen, y lo que nos dan los nuestros queríos partíos centralistes. Mientres otres nacionalidaes son capaces de plantar cara al gobiernu del Estáu, p’algamar finxos cada vez más altos de bienestar y autogobiernu, a Asturies yá-y pasó’l tren per delantre, atada de pies y manes per unos ineptos partíos políticos que dicen representanos. ¡Por supuesto que nun queremos esos nacionalismos!, pero non porque nun seyan bonos pa los sos paises, sinón porque, al selo, tán afondando cada vuelta más les diferencies con nosotros, aparaos al borde del camín ensin naide que nos defenda ante Madrid.

Ye la impotencia de los que nos representen, y non el supuestu “bon xuiciu”, lo que nos emburria a dicir: “Que nos gobiernen a toos dende Madrid, porque sinón vamos perder cada vegada más”. Y ye cierto. Mientres los demás lluchen y defenden lo suyo, aprovechando la capacidá política que dan los votos nacionalistes, nosotros siguimos sumisos a Madrid, ensin protestar, ensin plantar cara a cualisquier decisión, por perxudicial que nos seya. Y mira que nos son perxudiciales…

Tan mal ven el futuru los asturianos que, sabiendo que nesti estáu de coses nun tienen a naide que los defenda, que prefieren que lo faiga l’estáu centralista (el “papá” estáu), a ver si asina tócanos dalgo más nel repartu. Eso, n’efeutu, ye bon xuiciu, pero non nel sen que dicen los  políticos centralistes, que tamos fartucos del estáu de les autonomíes porque nun funciona, sinón que, al nun tener un partíu nacionalista que de la cara polos nuestros intereses, la que nun funciona ye la nuestra autonomía, y entós val más que desapaezan toes. O seya, la llectura contraria a la que se fai.

Esi ye l’argumentu que la Plataforma Asturiana pa les prósimes elleiciones tien que plantegar. Comencer al pueblu asturianu de que, lo malo nun son les autonomíes, sinón la nuestra autonomía, malgobernada por unos partíos centralistes que se baxen los pantalones ante’l Gobiernu central, ensin defender los nuestros derechos y los nuestros intereses. Un partíu nacionalista, colos raigaños equí, lluchando polos intereses d’Asturies y los asturianos, ye cada vuelta más necesariu. A ver si somos a ello.

La tan ruxida y masuñada “crisis”, ta faciendo un dañu terrible al nuestru país, a Asturies. Un país castigáu secularmente por tener unes infraestructures deficientes, que torgaron un desarrollu afayadizu pa que la xente asturiano algamare l’estatus de civilización d’otres zones más favorecíes. En plenu sieglu XXI, tamos llevando a la xente y a les mercancíes nunos trenes qu’atraviesen el Payares, pente medies de noventa túneles esbarrumbaos, talo que se facía nel sieglu XIX. Y l’autovía del cantábricu, que yá tenía que tar finada de los tiempos, permanez medio afogada por unos recortes que, nel nuestru casu, paecen sangrantes. Recortes definitivos que, como nel casu de la supresión d’una calzada ente Salas y La Espina, suponen amás un despilfarru: abandonu de viaductos yá construyíos, desmontes yá fechos que nun van a utilizase… Ensin citar el tramu Llanes-Unquera, que ye la risión de toa Europa y que se convirtió nel semáforu del mundu civilizáu.

Podría alegase, per parte de los responsables de talos “desaguisaos”, que cuando nun hai perres toos tienen que se conformar, pero’l casu ye que, como siempre, Asturies sal perxudicada en comparanza con otres comunidaes del Estáu Español. Asina, el País Vascu y Canaries nun sufren nengún recorte, quiciás porque los sos votos son necesarios pa garantiza-yos la estabilidá parllamentaria a los amigos del PSOE. Y Zapatero bien corrió a Barcelona pa dici-yos a los catalanes que tres de los cinco proyeutos “conxelaos” diben llevase alantre, nun fuera a ser que se-y “cabreare” el PSC qu’anda coles pates sacaes del cestu por eso del “Estatut”. Na tierra de Pepe Blanco, Galicia, los recortes nun pasaron de “testimoniales”.

Mentantu, el gobiernu asturianu calla, como siempre, sumisu al poder central. Tragando tolo qu’ellí se decida, ensin nengún poder de decisión, ensin nenguna forma de presión, ensin la necesidá d’unos votos de la xente asturiana, cautivos en manes d’un partíu que-yos vuelve la espalda, resignáu a obedecer fielmente les consignes que-y lleguen. ¡Cuántu poder podríen tener esos votos en manes d’un partíu asturianu que defendiere, daveres, los nuestros intereses!

Peter Pan yera’l neñu que nun quería crecer, llantáu eternamente na minoría d’edá. D’ehí, estúdiase en Psicoloxía’l Complexu de Peter Pan, aplicáu a aquella xente que nun madura, que sigue llantada, per siempre nesa minoría d’edá, ensin querer responsabilidaes, nin saber enfrentase a los problemes. A la vista del gobiernu que tenemos, y del destín de los votos que, añu tres añu, siguen dándo-yos, abúltame a mi que’l pueblu asturianu tien, tristemente allancáu, el complexu de Peter Pan.

Anímame, un avezáu llector d’esti blogue (y ye qu’hai xente pa too), a qu’escriba dalgo sobre la prohibición catalana a les corrides de toros.  Nun suelo facer casu de les temátiques propuestes, porque una cosa guapa de los blogues personales ye la llibertá que te dan pa escribir lo que te preste, ensin tener que ser cautivu de los temes d’actualidá o de “rellumu”. Esi poder dicir en cada momentu lo que te pida’l cuerpu, anque pa los demás seyan coses ensin importancia, o te separtes de lo correutamente político o de lo que piensa la mayoría. Pero les regles autoimpuestes tamién tán pa fendeles, asina que, ensin que sirva de precedente, voi facer casu al amable “blogueru”.

Tengo, frente a los toros, una ñidia ambivalencia. Per un llau, amiéstome a los antitaurinos, como nun podía ser d’otru mou, por considerar esti, vamos llamalu espeutáculu, daqué sangrientu, torturaor, maltrataor y tolo que podamos echa-y a recostín, ya impropiu d’un tiempu nel que l’actitú colos animales tien de ser de total respetu. Bien ye verdá qu’esto pue facese estensivo a otros comportamientos col xéneru animal, dafechamente incorreutos, inclusive nos que nos sirven pa comer determinaes especies. Pero esi ye otru tema. Y per otru llau, dende pequeñu fuí atrayíu pol mundu de los toros, pol so “ritu”, pola so estética, por esi xuegu ente la vida o la muerte, ente l’instintu y la intelixencia. Nun fai falta que se me diga que’l toru siempre lleva la peor parte, ta claro que ye asina. L’home siempre lleva la de ganar escontra l’animal. Naquellos tiempos nun había, o yo nun la sentía, la mesma sensibilidá qu’hai agora pa colos animales. Si non, los neños nun diríen tampoco a coyer ñeros, o a tirar col gomeru escontra los gurriones, actividaes compartíes por xeneraciones enteres.

El casu foi que yo diba a dalgunes Corrídes, coles entraes que-y sobraben a mio padre de regalar a los sos clientes y, en compañía de los amigos, dividíamos les nuestres preferencies ente Miguel Baez “El Litri”, Diego Puerta o Paco Camino. O ente la seriedá de Santiago Martín “El Viti” y la incorreución d’aquel “Cordobés” que facía’l “saltu la rana” y al qu’odiábemos cordialmente. D’aquella conocía tol escalafón taurinu, y estremaba perbién ente una Verónica, una Chicuelina, o una Gaonera.

Ya va munchu tiempu qu’aquello aseló, y tengo’l comencimientu de que la “Fiesta” ye un espeutáculu en víes de desapaición, ante les nueves sensibilidaes de los tiempos que, por cierto, ven normal que s’asesinen a civiles en Afganistán, pero que nun se pue facer sufrir a un animal. Val, tamos d’alcuerdu. Pero ¿ye eso lo que pretende’l parllamentu catalán cola so prohibición? Abúltame que non. La sensibilidá ante determinaos fechos o situaciones ye siempre personal, non de partíu. ¿O ye que tolos nacionalistes son sensibles y los centralistes non? Paezme nidio que lo que se pretende ye separtase de lo que s’entiende como cultura “oficial” española. Diferenciase d’España, aprovechando’l tema de los toros. Lo mesmo podía facese una campaña contra’l “botijo”, o contra “la Copla”. Toi seguru de que parte de los que voten escontra los toros, diríen a dalguna Corrida, y al revés, parte de los que voten a favor, repúna-yos un espeutáculu tan sangrientu. Pese a esa supuesta “llibertá de votu”, sigue habiendo disciplines y “qué dirán”. Lo curioso ye que, amás, los toros pertenecen a la cultura mediterranea, esa que siempre invoquen los catalanes y que reivindiquen escontra la “carpetovetónica”. Porque, ¿d’ónde vinieron los toros sinón de los pueblos mediterraneos?.

Dende Asturies tenemos insignes opositores a los toros, ensin que se nos pueda tachar d’oportunistes. El propiu Xovellanos, como bon “puritanu”, yera un enemigu acérrimu, y asina lo dexó dicho y escrito en delles ocasiones: “Es, pues, claro que el Gobierno ha prohibido justamente este espectáculo…”. Pero ponese a reivindicar agora, miméticamente, lo mesmo que los catalanes, paezme que nun vien a cuentu. ¿Por qué nun se fizo primero, y más por un partíu que tuvo responsabilidaes de gobiernu?. Paez que quier aprovechase’l vientu políticu  que sopla, viéndose’l plumeru nun tema que pa nós, nun ye prioritariu ante los enormes problemes de toa frasca que nos sopelexen. Habrá que los priorizar y esti ocupa, al mio xuiciu, un de los últimos puestos de la llista. Nun sé si con tou esti rollu, contesté al amable blogueru. Seguro que non.

Cola frase “Asturies, paraísu natural”, el gobiernu asturianu quixo comencer a los forasteros pa que vinieren al nuestru País, por ser un exemplu de bon tratu al mediu ambiente y a les corrientes más ecoloxistes. El slogan podría ser bonu si fuere verdá. Pero pa mi que les diverses actuaciones del Principáu en materia ecolóxica nun van per bon camín, tolo contrario.

Una más d’elles, quiciás de les más graves, ye l’actuación nel casu de la mina d’oru del Salave, a un par de kilómetros de Tapia. La minería del oru ye una de les más contaminantes y provoca nel mediu ambiente daños ensin reparu. Pa nun dicilo con pallabre míes, voi reproducir parte de la páxina web d’una asociación que se llama “ameicer” onde se detallen dalgún d’ellos:

MUÉVESE DALGO NEL ASTURIANISMU POLÍTICU.- La salida del Bloque por Asturies de la coalición I.X. amuesa que dalgo se mueve nel asturianismu políticu. Ye cierto que’l grupu asturianista tragó “sapos y culiebres” na so xuntanza con socios “desafortunaos”, pero nunca nun ye tarde pa rectificar. Poca ye la xente que, tando nel poder (anque seya un poder “piquiñín”), abandónenlu por desacuerdu cola política que se ta faciendo. El poder axunta, atropa, tapeciendo inclusive les diferencies. El Bloque tien que se plantexar, agora, cuál va a ser el so futuru. Quiciás esa plataforma de grupos asturianos y asturianistes que dalgunos defendemos tea más cerque y vaiga a ser más fuerte.
Per otru llau, resulta “refrescante” que los mozos y moces de la U.N.A. siguen trabayando al “pie del cañón”. Nun hai tema de l’actualidá asturiana nel qu’ellos, puntualmente, nun dean la so opinión. Una opinión siempre entendida y ponderada. Vese qu’hai seriedá y trabayu. Agora lo que fai falta ye que enanchen les sos bases de militancia. Porque, al contrariu que nel “Mio Cid”, sedría una pena qu’hubiere bon señor y fallaren los “vasallos”.

“P’ANULAR LOS ADIOSES” ye’l títulu del cuadernín de poesía de Lourdes Álvarez qu’amuesa la Editorial Trea. Nél, la gran poeta que ye Lourdes, a la que quiero muncho, vuelve a demostrar que ye una de les “grandes” de la nuestra lliteratura. Una poesía enllena de sentimientu, d’evocación, de pallabres que s’esfueyen al ritmu d’una cadencia, qu’aporten a lo más dientro del alma. Poemes que se van construyendo dende l’interior y que nun son, como tantes veces asocede, namás “fueos d’artificiu”, construiciones nel aire. Norabona a Lourdes, de la que siempre espero lo meyor y que nunca me defrauda: sedante ver la lluz llegando.

Bueno, pues yá somos Campeones del Mundu. Mui bien. Somos los meyores y, amás, demostrámoslo. A mi, que siempre me prestó’l fútbol y lu practiqué modestamente, dame muncha allegría que’l País que representa a tolos países que formamos España, xuegue bien y gane. Y si hai dalgunos recalcitrantes que prefieren que pierda España, por nun sé qué plantegamientos nacionalistes, primero que pidan un Campeonatu de Lliga pa ellos solos, onde los partíos más interesantes sedríen l’Olloniego-Sporting y el Peñamellera-Real Uviéu. Si queremos tar col Madrid, el Barcelona y los demás, tien que ser pa too.

Asina que yo toi encantáu cola “Roxa” que, ensin xugar el so meyor fútbol, fue a dar la cara (y les piernes) contra los meyores equipos del mundu, derrotándolos y proclamándose, por primer vez, Campeona del Mundu.

Pese a que dicen dalgunos (cuasi toos), que Vicente Del Bosque fízolo too bien, creo qu’eso nun ye cierto y que, al mio modestu entender, enquivocóse delles veces. La primera y más clamorosa, l’alineación contra Suiza, partíu que perdimos y que pudo costanos el campeonatu. Nun pue salise a xugar contra un equipu ultra-defensivu con un solu delanteru y una “estrapayada” de centrocampistes que s’estorbaben unos a otros. Pero ye que, amás, el nuestru meyor delanteru, David Villa, nun pue xugar solu en punta, allancáu metanes los dos centrales y arrodiáu por otros cuantos defenses. Poro, Villa xugó meyor y marcó goles cuando tuvo a otru delanteru centru natu, que fixara a los centrales y creara furacos peronde’l guah.e entrara y rematara. Eso víalo un ciegu. El “niño” Torres ta fuera de forma, faciendo la so propia “pretemporada” depués de la lesión, pero sirvió pa distrayer a los defenses y dar llibertá a Villa, arrancando dende l’estremu. Tamién valía Llorente, como se vio nel cachu que salió al campu. Too menos condenar al meyor delanteru a un puestu que nun-y va. Porque ye verdá que Villa pue xugar de delanteru centru, pero n’equipos como’l Valencia, que nun quier el balón, que xuega atrás y tien un contrataque mortal. Ehí, con campu per delantre, sí pue xugar de delanteru centru, y eso que, amás, tien el sofitu de Mata o otru delanteru más. Porque ye verdá que Pedrito tamién lo ye, pero la so situación nel campu foi de centrocampista, y pa xugar nesi puestu sedría meyor sacar a Cesc de mano, o a Silva.

En fin, eso son asuntos téunicos criticables, pero que nun empañen el bon tonu, la entrega y hasta’l bon fútbol que fizo la seleición. Polo demás, tamién ye d’agradecer la imaxen dada pol entrenador, siempre corréutu, respetuosu, tranquilu y en plan “señor”, non como otros exemplos que más valdría nun siguir, incluyíu nos puestos principales, el señor Maradona.

Al llau d’esta valoración tan positiva de la “Roxa”, tengo que dicir que quedé abondamente fartucu de la “Roja”. Ye dicir tolo que en prensa, radio y televisión quixeron vendenos pa comenos “el tarru”. Tou esi grandonismu de caleya, tou esi españolismu baratu, toa esa “cutrez” xeneralizada, toes eses canciones horribles cantando valores “patrios”, toa esa bayura descomanada de símbolos que ficieron ricos a les tiendes de los “chinos”…

Un acontecimientu deportivu, un bon espeutáculu de mases, fue utilizáu y manipuláu pa facenos una “inmersión” d’españolismu de lo más rancio. Por muncho que me preste que gane l’equipu español, nun tengo nada en común cola mayoría d’esos “cafres” que ximielguen les banderes dende los coches, peguen bocinazos y “móñense” cantando unes horroroses canciones y unos “lemas” absurdos. Eso ensin cuntar a los fascistes que tamién aprovecharon pa sacar “les pates del cestu” por aquello de “la ocasión píntenla calva”. Como los que pasaron nun coche enllenu de banderes españoles, pol Parque de la Fábrica del Gas, col “Cara al Sol” sonando a toa marcha y faciendo el saludu nazi pola ventaniella.

Y cuidao, que determinaes povises, camúdense llueu nuna repla fedionda.

Entiéndaseme, nun tengo nada, tolo contrario, escontra eses persones, munches veces en familia, qu’amosaron la so allegría (como fici yo) frente al televisor, banciando la bandera roxomariella. Ya inclusive que salgan a la cai, como cuando equí’l Sporting xubió a Primera. Falo del abusu hasta la fartura, del aprovechamientu, de los mensaxes tapecíos de políticos y “mass-media”, d’esi tastu a años sesenta, a Frente de Xuventudes… Eso, la verdá, fartucóme.

Asina, pues, que, a zarrar el paréntesis, a calmase toos un poco, a tornar a la vida normal y a ponese a resolver los grandes problemes del país, que nun son pocos.

¡Y menos mal que queden otros cuatro años pal siguiente mundial… ¡

P.S. Tuviéreme prestao que’l guah.e Villa sacare a rellucir una guapa bandera asturiana, en llugar d’esa “cutre bufanda de “Tuilla”

Cinco minutos enantes de que lu echaren, el tovía Presidente del Principáu, Vicente Alberto Álvarez Areces, anunció la so non presentación como candidatu a les prósimes eleiciones. Yera una anuncia cantada. Yá nin siquier los sos “fieles”, los “arecistes”, confiaben nél. Non por nada, non porque disintieren de les sos caberes decisiones sinón, cenciellamente, porque yá fedía a “calabre políticu”, y yá sabemos qu’en política, a nun ser honroses esceiciones, les fidelidaes duren lo que dura’l cargu al que se ye fiel. Lo de Areces yera, como diría’l premiu Nobel colombianu, “la crónica d’una muerte anunciada”.

¿Y cómo podríemos valorar l’actuación d’esti paisanu que tuvo nel poder, el másimu poder autonómicu, a lo llargo de, na menos que 12 años? Pues l’axetivu más suave que se m’ocurre ye’l de “inoperante”. Vamos dexar a un llau (lo cual yá ye muncho dexar) los temes más concretos del so llargu mandatu: el “muselazu”, la enquivocada política enerxética, la carente política mediuambiental, la nula política respeuto al patrimoniu cultural, a la llingua, a les señes propies d’identidá (coime, nun ta gobernando na Rioxa, nin en Murcia), l’emperramientu en sapozar millones nuna cosa “elitista” y foriata como ye lo de la Universidá Llaboral… y un llargu etcétera. Pero sobre too ello, amás de too ello, de lo que yo lu acuso ye d’anteponer los sos intereses de partíu, a nivel nacional, a los intereses propios de la so tierra, de la so patria. De ser servil, criau, de los mandatos centralistes de Ferraz. De nun oponese nunca, de nun dar nunca un puñetazu na mesa, de nun enfrentase, dalguna vez, polo menos, a los designios d’un gobiernu central que, llamentablemente, tien otres prioridaes enantes de les asturianes. Esi ye’l so mayor delitu, nun ser un gobernante ASTURIANU, ye dicir, que mire p’enriba de too pal pueblu al que gobierna, el que lu escoyó pa esi tan importante llabor.

Lo malo de too ello ye que, cualquiera que venga detrás, va a facer esautamente lo mesmo, porque, en definitiva, nun ye un problema de nomes, ye un problema de fidelidaes. ¿Dalguién cree, daveres, que’l señor Javier Fernández va a facelo distinto del señor Areces? Pues si diz que sí ye qu’entovía cree nos Reis Magos. Porque les fidelidaes del señor Fernández son les mesmes que les del (tovía) actual presidente, y eses nun pasen pola defensa de los intereses d’Asturies, polo menos non en primer llugar. Siguimos siendo un “proteutoráu”, onde manda “la metrópolis”. Y asina nos lluz el pelo. Otros militantes socialistes, como por exemplu el señor Montilla, defenden o paecen defender intereses más prósimos. Los nuestros dirixentes, amén a too y a nun molestar qu’hai coses importantes que tratar.

Poro, ¿qué otra valoración podemos facer que la de pone-y un suspensu al que, durante 12 años nos gobernó? Pero un suspensu que, dende yá, podemos facer estensivu al que venga detrás, si sigue siendo miembru d’un partíu centralista. La única opción que tenemos pa defender los nuestros intereses, los intereses asturianos, ye votar a un candidatu nacionalista. Nun tenemos garantizáu l’aciertu, porque los problemes son difíciles y l’atrasu que llevamos ye munchu, pero, polo menos,  si tenemos garantizao que los intereses más altos que se van defender son los d’Asturies. Nun ye poco.

P.S. Quixi poner nel títulu una despidida n’Asturianu, pero nun quiero da-y esi gustu a daquién que NUNCA, en tres mandatos que gobernó, dixo una sola frase na nuestra llingua.

EN SURÁFRICA XUÉGASE TAMIÉN OTRU MUNDIAL.- Al llau del “glamour” de les grandes estrelles, de los millones d’espeutadores, de les cornetones qu’ablayen a cualquiera, y de los cientos y cientos de páxines periodístiques, programes de televisión y hores de radiu, hai otru mundial en Suráfrica:

5,7 millones de persones viven nesi país col VIH, una cifra descomanada que supera la de cualisquier otru país. Khayelitsha ye un suburbiu de Ciudá del Cabu, con más de mediu millón d’habitantes, nel que un de cada tres adultos ye seropositivu. La gran mayoría d’ellos podría curase con un tratamientu antirretroviral, pero nun puen porque ye un tratamientu caru y nun hai perres. Y les qu’hai, empléguense notres coses. Esa ye la otra cara d’un espeutáculu de mases, ayenu ya indiferente a la probe situación que vive gran parte del pueblu surafricanu.

REFORMA LLABORAL O LA DRECHA SIEMPRE GANA.- A la fin terminaron metiéndonos el supositoriu pol rectu. Ya tienen reforma llaboral, un mou mui cínicu de llamar al abaratamientu del despidu. ¿Daveres creen, o quieren facenos creyer, que pagando menos a los trabadores qu’echen ensin xustificación, los empresarios van contratar más personal? Lo curioso del casu ye que, un gobiernu y un partíu llamaos “socialistes”, faigan el xuegu suciu a la drecha. Nun sé lo que pensaríen honraos antecesores d’estos “ningundis” d’agora, xente que lluchó nuna guerra contra’l fascismu y la “derechona” y que foi abondamente represaliada. Pero quiero pensar que nun taríen mui contentos. Hai unos meses falábase de qu’habia que “refundar” el capitalismu, porque foi’l que nos llevó a la bancarrota. Lo que nun esperábemos ye que la “refundación” sirviere pa que los ricos siguieren faciéndose más ricos, a costa los trabayadores, funcionarios y pensionistes. Y siguen xubiéndonos los impuestos pa pagar lo qu’ellos xeneraron. ¡Vaya cara!

LOS PREMIOS “NOBEL” DE LOS RAPAZOS.- Aprovechando’l marcu de la Feria del Llibru pa neños de Bolonia 2010, la IBBY (International Board on Books for Young Peoples) otorgó los premios Hans Christian Andersen de narrativa ya illustración. Esti premiu bianual, ta consideráu como’l premiu Nobel pa los rapazos. Nesta convocatoria los premios diéronse al autor inglés David Almond, el de narrativa, por ser un escritor “con una voz única na creación d’un realismu máxicu nes sos obres pa neños y mozos. Almond, con un sofisticáu llinguax, atropa l’atención de los rapazos empobinándolos a lleer, a pensar y a cultivar un espíritu críticu”. Al empar, el premiu Andersen d’illustración recayó n’alemana Jutta Bauer, que “amiesta la vida real con un mundu llexendariu al traviés de les sos illustraciones. El xuráu almiró la so orixinalidá y creatividá, y la so habilidá pa comunicase colos llectores”. Norabona pa los dos. Añadir, namás, que nengún autor español ganó nunca esti prestixosu premiu.

SAN XUAN.- Solsticiu. Xanes. Trasgos. Mitoloxía. Maxa. Flor del agua. Fueu. Foguera. Guardián del fueu. Corru. Tribu. Iniciación. Ritu. Tradición. Cuentos. Lleendes. Epopeyes. Historia. Pueblu. Nación.

El “vicente” del que quiero escribir güei ye un de los más entrañables pa min. Llamábase como un famosu santu, San Vicente Ferrer, que siempre me dio munches allegríes porque, al ser el día de la mio onomástica, mios pás siempre me regalaben coses guapes qu’entá recuerdo con ciñu. Per otru llau, esti santu nunca nun fue de la mio devoción porque yera un poco “gafe”. Andaba perehí predicando’l fin del mundu y la llegada del anticristu, y arrodiábase de grupos d’esos “flaxelantes” que, nun sé por qué motivu, pasaben el día dándose güelpes con un llátigu. Y ye qu’hai gustos pa too. Pero del que quiero escribir güei ye d’otru Vicente Ferrer, catalán, solidariu, lluchador de la causa de los probes, y que llevó les sos creyencies hasta les últimes consecuencies.

Esti Vicente, nació en Barcelona en 1920, y con 16 añinos tocó-y combatir na Guerra Civil española nel bandu republicanu, naquella quinta llamada “La Quinta del Biberón”. Finada la guerra, arreglóseles pa estudiar la carrera de Drechu pero, en realidá, yá sintía la llamada del trabayu colos probes, colos desheredaos de la diosa Fortuna. Como los Xesuítes teníen misiones na India, pa ellí se empobinó depués d’ordenase sacerdote. La so intelixencia natural y les sos ganes de trabayar, ficieron que en Bombay entamase un curiosu sistema de trabayu qu’abrió munches conciencies y xeneró una pergrande solidaridá. Con pequeñes cantidaes económiques y dalguna d’axuda téunica, consiguió que los campesinos tuvieren agua pa los sembraos, y d’esi mou, que pudieren llueu devolver el préstamu ensin intereses.

Como yera d’esperar (por desgracia), eso llevantó les rocees de los que manden en toes partes: caciques, políticos, empresarios corruptos, financieros. Total, en 1968 espulsáronlu del país. Y como les desgracies nunca nun vienen soles, tamién tuvo problemes colos Xesuítes. Total que nel añu 1970 salióse de la orde. Fue lo meyor que-y pudo pasar. Volvió a la India, con un permisu especial d’Indira Ghandi, y creó la fundación que lleva’l so nome. Ellí, nuna de les estayes más probes del país, consiguió facer, d’un desiertu, una tierra cultivable. Punxo en marcha escueles, y pequeñes unidaes sanitaries. Too ello, como siempre, col acosu de políticos llocales y otra xente de mal vivir que nun lu dexaben en paz. Pudo con toos. Casóse con Anne Perry, una periodista que lu axudó dende los anicios, y llevó a los tribunales a tolos que-y facíen la vida imposible, queriendo inclusive encarcelalu, consiguiendo un fallu favorable que sentó xurisprudencia. Un movimientu popular  que s’espurrió por varios paises (Italia, España, Norteamérica, Alemania, India…) algamó más de 25.000 firmes pa que-y concedieren el premiu Nobel de la Paz. Pero los suecos ficiéronse los “idem” y nun-y lo concedieron. Salvó, porque depués de tenelu Kissinger sedría un desprestixu pa él. Yá en 1996 creóse n’España la Fundación Vicente Ferrer, pa asina asegurar los ingresos económicos que necesitaba pa siguir el so trabayu na India. Y d’esi mou continuó col so gran llabor hasta’l mesmu día de la so muerte, el pasáu añu 2009. Pero’l so patrimoniu queda: un equipu de 1.900 persones y el sofitu de más de 140.000 collaboradores. El so pasu pela tierra nun fue de baldre y, si hai cielu, ellí tará al llau del de la Barba Blanco mirando con una sonrisa como medra’l so llabor. ¡Un abrazu tocayu!