Trabayu de CampuVicente Garcia Oliva

La famosa crisis económica na  que’l mundu ta inxertu, nun dexa de ufiertar nuevos casos escandalosos cada día, que nos faen pensar que nun se trata sólo d’una crisis cíclica, anque abondo mayor de les que ya tamos avezaos a pasar, sinón que se trata d’una verdadera resquiebra del propiu sistema. L’últimu escándalu (por agora) que se produxo por aciu de l’aseguradora americana AIG, que recibió axudes multimillonaries pa evitar la quiebra y, al tiempu,  repartió 165 millones de dólares en conceutu de primes ente los sos executivos, ye un exemplu más que pon en custión les mesmes bases del sistema capitalista que nun paez capaz nin siquiera d’organizar los sos propios circuitos financieros y comerciales.

El sacrosantu mercáu llibre, xunto a la coldicia, cada vuelta mayor, d’empresarios y executivos de grandes empreses ensin escrúpulos, ta provocando una distorsión tan pergrande de la economía, un caos tan xeneralizáu, que toos aquellos vaticinios de don Carlos Marx sobre’l final del capitalismu, que siempre causaron muncha risa polo equivocaos qu’aparentaben tar, tán principiando a cumplise.

Trátase, agora, d’intentar poner remiendos nun pantalón rotu pol qu’anicien a salir les vergoñes. Y fálase d’una nueva ética pa la empresa, y d’un nuevu intervencionismu de los poderes públicos na economía. Claro qu’esto namás durará hasta que se puea superar la situación y llegue, depués d’una sangría financiera que tamos pagando, con munchu esfuerciu,  tolos contribuyentes, otra dómina de “vaques gordes” nes que se volverá a refugar la intervención del estáu pa que, los mesmos, tornen a tener les manes y los bolsos llibres.

En cualquier casu, y por si daquién de bona voluntá piensa que, polo menos sedría menester poner unos finxos mínimos pa que les empreses tuvieren dalgo más d’ética, de bon facer, dientro d’esti mundu capitalista, ehí van unes idees que m’abulten indispensables pa qu’asina fuere:

1) Cara al interior: Que seya une empresa que nun discrimine. Que nun discrimine ente’l trabayu de homes y muyeres. Que tenga, dientro de les sos posibilidaes, dellos puestos pa xente con dalguna discapacidá. Que reinvierta parte de les plusvalíes (beneficios) ente los trabayaores.

2) Cara a los consumidores: Que fabrique bonos productos. Que nun nos engañe o envenene. Que ponga unos precios xustos, con unos márxenes razonables de beneficiu pa cubrir el riesgu empresarial.

3) Cara al Mediu-Ambiente: Que seya respetuosu col Mediu-Ambiente. Que nun contamine. Que utilice tolos filtros necesarios y los medios al so algame pa reciclar los subproductos.

4) Cara a la Sociedá: Que, dientro de les sos posibilidaes, ‘emplegue parte de los beneficios pa fines sociales. Bill Gates ye multimillonariu, pero acaba fundar una ONG de llucha escontra la malaria que ta salvando miles de vides humanes.

Bien, too esto nun son más qu’unos apuntes a esnala-pluma que se m’ocurren sobre la marcha. Seguro qu’habrá otros requisitos o dalgún d’estos pudiere matizase. Lo que si ta claro ye qu’aportamos a un puntu de “nun retornu” nel panorama económicu mundial y, o se plantexen les coses d’otra miente, o esti caos nel que tamos sapozaos acabará, como un furacu prietu, absorviéndonos a toos.

(Contactu: amtrancho@telecable.es)

Anda’l personal un muncho revueltu por mor d’un informe de la Fundación de Caxes d’Aforru, nel que se diz dalgo que yá toos sabíemos dende va tiempu: que tamos a la cola de les diecisiete comunidaes que componen el puzle del Estáu Español. Somos los que menos medramos, los de más baxa tasa d’actividá y los últimos de toos en productividá. Esos son los datos, por más que la FSA y el Gobiernín, cola axuda de los grupos mediáticos que s’encarguen de cantar les sos escelencies, quieran siguir engañándonos.

Pero ¿quién nun sabía esto dende va munchu tiempu? ¿Por qué hai qu’esperar a que tengan que venir de fuera pa dicinos lo que nosotros vemos tolos díes? Un par de veces a la selmana, voi a nadar al Club Natación Santa Olaya y, de camín, paso per una zona que, nun hai muncho, taba enllena de tallerinos, de pequeñes empreses, de fabriquines que, como una sangría, fueron migayín a migayu zarrando. Los astilleros, antiguu arguyu de la ciudá (llegó a haber cinco), tan dando les caberes voquiaes. La Camocha va a quedar como una reliquia pa turistes. El comerciu de tola vida, esi comerciu de nomes tradicionales de Xixón que “facíen ciudá” , ta esapaeciendo, fagocitáu por eses grandes superficies que lleven les perres pa otru llau… Pa qué siguir. Y mientres too esto asocedía, nun se ufiertó nenguna alternativa seria a esos cierres, a toa esa perda de puestos de trabayu. El turismu y lo rellacionao cola folganza, esa ye la receta, porque nin siquier l’actividá rural, que tamién xeneraba trabayu y ocupación, se caltién en pie.

Pero esa FSA y esi Gobiernín, a los qu’acaben de da-yos un bon tirón d’oreyes esos recientes informes económicos, nun dan tampoco una a dereches n’otru tipu de polítiques, como por exemplu les culturales. Con un prerrománicu abandonáu, un patrimoniu etnográficu en víes d’estinción, una llingua desprotexía, un mediu ambiente del que pasen olimpicamente… repito ¿pa qué siguir?

Y lo peor de too nun ye lo mal que lo tán faciendo, que yá tien delitu, sinón l’aire de “chulería” y prepotencia qu’asumen. El portavoz de la FSA (un incisu: en toles comunidaes, les antigües federaciones pasaron a llamase “Partíu”, talo que’l Partíu Socialista Catalán, el Gallegu, el Vascu, hasta l’antigua Federación Socialista Madrileña ye agora Partíu Socialista Madrileñu, menos equí. ¿Conservadores de les esencies pures españolistes? ¿Requexu ultramontanu de resistencia? Fin del incisu) esi tal Fernando Lastra, cuando-y concedieron merecidísimamente la “madreñona de purpurina” por enemigu de la llingua, comentó qu’esperaba siguir faciendo méritos pa repitir (!). Y l’otru día na radio (sentilo na SER de Xixón) decía qu’él yera muy consecuente, que la llingua nunca diba a ser oficial. Habrá que-y dicir a esi paisanu que la consecuencia, por sí sola, nun ye nengún valor, dependerá de a qué causa se seya consecuente. Por exemplu, Hitler, fue mui consecuente col so pensamientu. Lo que pasa ye que’l so pensamientu yera’l d’un bárbaru. L’exemplu ye, loxicamente, una estrapolación.

Asina que, a toos esos qu’agora s’estrañen y espatuxen al rodiu del informe de la Funcas, y que posiblemente son los mesmos que-yos echen el votu na urna, habría que-yos dicir: ¿De qué t’estrañes, ho? Y, darréu: ¿Y pa qué los sigues votando, calamidá? ¿Ye que se puen facer les coses peor?