Biografia

Pingarata biográfica

Nací en 1944, o seya, un añu enantes que los Americanos tiraren la bomba atómica sobre Hiroshima, colo que darréu pescancié a qué clas de mundu llegare.
Medré como un neñu normal, nada facía presaxar qu’un día pudiere algamar a tener un Blog como ésti. Pero, pese a esi gran trunfu, tengo de confesar que la mio verdadera vocación foi siempre la de ser futbolista. Non un futbolista cualquiera, sinón delanteru centru del Sporting. Por ello, el mio gran suañu cumplíu foi xugar un partíu n’El Molinón y poder marcar ellí dos goles. Entovía suaño con ello.

Acompañáronme na mio neñez/mocedá mui bonos amigos: El Guerreru l’antifaz, Roberto Alcazar y Pedrín (ye lo qu’había), Jack, Bill y Sam del FBI, John Silver “el Llargu” y el perru Buck. Hasta qu’un día decidí que, en llugar de xugar con amigos d’otros, podía intentar tener los mios propios. Y asina púnxime a inventalos.

Xunto con un garapiellu de collacios y collacies, entamamos nel añu 1975 el grupu Conceyu Bable-Xixón, que fue dalgo asina como’l formientu del “panchón” qu’agora tenemos. De magar esa fecha, entamé a escribir nuna llingua que nun esiste (polo menos oficialmente), colo que, lo surrealista de la situación, encartióme como inspiración pa inventar munches hestories. Lo curioso del casu foi que, pese a nun esistir, gané numberosos premios, lo cuál camúdalo de surrealista n’esquizofrénico.

Allá pelos años 80 del sieglu pasáu, l’Academia de la Llingua Asturiana camentó que dalgún méritu tenía lo que facía y, pa plasmu míu, nombróme Miembru de Númberu. Supongo que yá tarán arrepentíos d’ello. Pa más aquello, agora dirixo la Coleición Xuvenil d’esa institución. Y ye que nun hai como cayer bien.

Por andar xugando con esto de les enfermedaes mentales, reconvertime per un tiempu a la “llingua del imperiu” con una novela que se llamaba, precisamente, “El barco de los locos”, que la editorial Pearson/Alhambra tuvo la valentía d’espublizar. Cuando la incluyeron na Llista d’Honor de la CCEI, díxime: “Hai más llocos que los del barcu”. Y asina, alternando les dos llingües, la qu’esiste y la otra, algamé dellos otros premios, ente ellos el de la CCEI con “Relato de las aventuras de Inés Saldaña”, el de la Crítica con “Garulla”, el “Montesín” con “Fontenebrosa II”, el “Fuertes Acevedo” con “El síndrome de Scherezade” y agora el “Timón” a la trayeutoria lliteraria. Si creen que con eso van retirame de la escritura, van daos. Pienso seguir escribiendo munchu tiempu más (col permisu del “d’arriba”, claro)

Y esta ye, a grandes reblagos, la forma na que llegué a ser famosu y a tener un Blog tan guapu como esti. Y colorín colorao, esti cuentu… yá sabéis.