close
Unos alumnos mui aventaxaos

Unos alumnos mui aventaxaos

L'elisirLa International Opera Studio ye una organización surdía en Zurich, nos años sesenta, que tien como oxetivu preparar a un grupu d’alumnos del “bel canto”, a entrar dafechu na música profesional. Llóxicamente escueyen pa ello a los más destacaos, depués de pasar un rigurosu esamen. Tienen sedes en delles ciudaes del mundu y agora abren una n’España, precisamente en Xixón, tres firmar un contratu col Ayuntamientu. La primera amuesa pública del so trabayu ta dándose estos díes nel Teatru Xovellanos, con dos representaciones -sábadu y domingu- de la famosa ópera de Donizetti L’elisir d’amore. La nota curiosa ye que, pa dar oportunidá a tolos cantantes escoyíos, l’elencu de los dos díes ye distintu.

Tuvi la oportunidá de ver la obra’l sábadu 25, y a ella voi remitime nel mio comentariu. Lo primero que quiero apuntar ye que naide diría que los intérpretes, toos ellos, nun son ya profesionales y que s’alcuentren entovía aprendiendo, porque’l nivel de la ópera, tanto no que ye’l cantu, como l’actuación teatral, nun desmerez de munchos de los elencos profesionales de los que pasaron per Uviéu o Xixón últimamente.

La obra de Donizetti, enmarcada no que se llama una “ópera bufa”, en realidá nun lo ye tanto, pues tien partes que podríemos asitiar nel melodrama, siempre salváu por dalgún chispazu d’inxeniu que-y quita seriedá al asuntu. L’argumentu nun ye novedosu: el mocín –Nemorino– un rapaz un poco fatu, ta perdidamente namoráu d’Adina, que nun-y fai munchu casu porque prefier cambiar de mozu cada poco pa divertise y pasalo bien. Pel pueblu pasa un vendedor ambulante, tramposu y engañador, que viende “elisires” que lo curen too. Y tamién, claro, tien un pa que les moces caigan rendíes a los pies del que lu tome. Pa qué quier más Nemorino… Asina, y depués d’una serie enriedos, el protagonista hereda, ensin sabelo, una fortuna d’un tíu que muerre y les moces andan tres d’él a cazalu camentando ésti que ye por mor del elisir. A la fin, Adina y Nemorino terminen xuntos que ye de lo que se trataba dende’l principiu.

Nel capítulu de méritos yo pondría en primer llugar a la soprano Cristina Toledo –Adina- inmensa tola obra, col papel más llargu y dramáticu. Siempre segura nos tonos altos y con una dicción perfeuta. Llueu prestáronme muncho los coros, que tán n’escena tol tiempu y canten y actúen divinamente enllenando la escena cola so presencia. Cumplidor el baxu Antoin Kessel -Dulcamara, el vendedor tramposu-, mui bien na interpretación y dalgo menos na canción, dalguna vez “comíu” pola orquesta. En cuantes al protagonista, el tenor Quintín Bueno –Nemorino- cumplió ensin escedese, meyor na segunda parte que na primera. El públicu aplaudiólu muncho, inclusive con bravos, nel aria Una furtiva lacrima, pero ye que ye tan guapa y conocida que paez cuasi obligao, anque a min paezme que nun hubo pa tanto, pues ye un aria non demasiao esixente pal cantante y mui reconfortante’l cantala. Fue’l menos bonu del elencu.

En resume, un mui dignu Elisir d’amore, y una gran aportación de la International Opera Studio a la nuestra ciudá y a la ópera en xeneral. Yo voi sacar yá les entraes pa esa Boheme que nos ufiertarán en setiembre.