Yá lo dixi n’otres ocasiones. Messi, que ye un de los meyores xugadores del mundu mundial, llegó a onde llegó produciendo, nel Barcelona, C.F., un efeutu «ocalito». Igual qu’esti árbol foriatu, el xugador medra a base de desertizar tolo que lu rodea. De mediu campu p’arriba, el prau ye suyu, y toos tienen que se plegar al so estilu de xuegu, al so ritmu, al fechu de que la única misión que tienen nel xuegu, ye da-y la pelota a él siempre que la pida. D’esi mou, nel Barsa fracasaron, o nun llegaron a permanecer, grandes xugadores d’aria. ¿Exemplos? Ronaldinho, que hasta que llegó Messi yera Dios. Etoo, una goliador espléndidu. Ibrahimovic, un gran xugador… Toos tuvieron que finar dexando’l club a mayor gloria de Messi. Y cuidáu con Cesc Fábregas, nun vaiga tamién a cayer en desgracia.
Cuando Villa fichó pol Barcelona, escribí al rodiu d’esti tema, allerzáu porque’l nuestru «guah.e» tuviere que pagar tamién «pleitesía» al pequeñu arxentinu, que seguiría «chupando nutrientes». Mientres Villa marcó goles y duró’l rellumu del so fichaxe, too paecía dir bien, anque con Villa yá desplazáu del so llugar nel aria, onde tantos goles marcó, a un de los estremos y «a la espera» de lo que quixere facer «l’astru». Pero agora que’l de Tuilla, depués d’una llarga lesión, producía por una imprudencia de Guardiola, que lu facía xugar en males condiciones físiques (ver prensa de la época), agora que vuelve, digo, yá Messi se cree con drechu a reñilu como si fuere un «ningundi»: Hai que pasa-y el balón a él.
Habría que-y recordar al astru arxentinu dos coses. 1) Villa ye’l másimu goliador de la Seleición Española DE TOLOS TIEMPOS. Cuasi nada. Creo que lleva unos 47 o 48 goles, d’ellos varios dobletes y dalgunos «hat-tricks». Eso non con una seleición de «chepos», sinón cola Campeona del Mundu. Por cierto, Messi lleva 22 goles cola Seleición Arxentina. Menos de la metada. Y 2) Esto asocede, ye dicir, Messi nun acaba de trunfar na so seleición, porque n’Arxentina nun fain como nel Barsa, y ellí, onde hai munchos otros xugadores de clase y carauter, nun xueguen toos pa él.
La decadencia d’un xugador, y nun digamos yá d’una presona, principia cuando ye capaz de reñir a los sos compañeros de trabayu,
creyéndose penriba d’ellos. Messi yá algamó esi puntu. Nun se puen echar bronques al gran Villa, que va pasín a pasu na so recuperación, como si fuere un subalternu. Y mal fain los sos compañeros, encabezaos pol capitán Xavi, en querer dicir que son coses normales, porque entós volverá a repetiles. Meyor yera salir al pasu al pequeñu/gran xugador, y dici-y qu’eso nun pue volver a producise. Ente otres coses de bon funcionamientu, fadríen-y un gran favor.