close

Escocia

sco1Acabóse’l suspense: los escoceses prefirieron seguir arreyaos a la Gran Bretaña qu’aniciar una aventura en solitario de futuru inciertu. Esi futuru inciertu ye lo que creo yo que banció la decisión del llau de los del «Non», porque la impresión que daba yera que los del «Sí» podíen ser mayoría, a tenor de la simpática campaña que ficieron y de lo muncho que se movilizaron. Pero una cosa ye la simpatía y los sentimientos, y otra la razón y el mieu a «y agora qué va a pasar», onde les incógnites yeren munches más que les certeces. Hai una mayoría silenciosa que quiciás nun apaez, pero que tamién vota y failo al nivel de los sos intereses, como tien de ser.

Nun voi dicir que me dio pena la derrota de los del Sí. A fin de cuentes hai que respetar les mayoríes y la mayoría de los escoceses nun quixeron cambios tan radicales, pero lo que creo que se demostró con esto de la campaña y de les votaciones ye que, esti mundu que pretenden facer tan uniforme y monolíticu, eses instituciones grandones que pretenden que seyan les que nos gobiernen y esos que se dicen cola boca enllena «ciudadanos del mundu», nun tienen les coses tan clares. Que, anque seya pa perder, hai muncha xente que valora les coses pequeñes, prósimes, autóctones. Que la pallabra «patria», o país, o nación siguen removiendo corazones y cabeces. Que la cultura de lo propio, de lo qu’heredemos de los nuestros antepasaos, ta ehí pa siguir la cadena de tresmisión d’un patrimoniu inmaterial que tien un valor cimeru.

Frente a ello, los que tán frotándose les manes pol resultáu. Los que tovía-yos tiemblen les pates por si ganare’l «SÍ» que pondría les coses un poco más complicaes en Cataluña. Lo cierto ye que los exemplos de posibles secesiones qu’hubo hasta agora decantáronse hacia la posición más conservadora de siguir perteneciendo a la comunidá más grande: Quebec, por exemplu, onde los independentistes perdieron munchu puxu y agora anden un poco desnortiaos. ¿Qué pasare en Cataluña si siguieren per esi camín? Pues igual lo mesmo. El vese nel borde’l precipiciu podría emburriar a muncha xente hacia’l votu más conservador del «Non», en cualquier casu ye dalgo que nunca nun vamos saber porque equí nun quieren facer esperimentos nin con agua. Una cosa más quiero resaltar: la civilidá con que se llevó tol procesu. Les esquisites maneres de dambos contendientes-hermanos, nun tema que nun yera una caxigalina. Y ye que dambes opciones yeren respetables, non como equí en qu’un obispu cacipleru y faltón llama a los independentistes «insidiosos» y fala del Estáu unitariu como «un bien moral». ¡Que nun fadie, el tal Sanz Montes, saducéu profesional! En fin, en tou casu, agora que pase una temporadina en que nos dexen un poco en paz unos y otros, porque tampocu nun vamos a tar faciendo Referendums tolos díes: lo poco presta, pero lo muncho cansa.