close
Una invitación refugada

Una invitación refugada

GracianoGarcaLlégame, pente medies de L’Academia de la Llingua Asturiana, una invitación p’asistir a la presentación d’un llibru de poemes del que fuere Director de la Fundación Príncipe de Asturias, don Graciano García. L’actu va a cellebrase metanes el mes d’abril nel Auditoriu Príncipe Felipe.

Nun conozo personalmente a don Graciano, pero tolos que sí lu conocen falen d’un paisanu trabayador, bona persona, intelixente y mui enfotáu nes coses d’Asturies. Tien de ser verdá, si tol mundu s’apauta nello. Pero lo que tamién ye cierto y comprobable ye que, en tolos años nos que tuvo de Direutor de la Fundación que lleva’l nome del heriede al tronu d’España, en toos esos años que fueron dende 1980 al 2009, nunca se faló nin asturianu, nin del asturianu. Nun hubo, nos actos oficiales, nos discursos principescos, una sola mención a los nuestros clásicos de la lliteratura, o al nuestru romanceru, o al nuestru refraneru, o a cualquier otra espresión que se ficiere en llingua asturiana o sobre ella. Namás, que yo recuerde, se citó a Berta Piñán, con una fras d’un poema tornada al castellán.

Seguramente don Graciano nun tien culpa de qu’ello fuere asina. Seguro que más altes instancies que tán penriba d’elli lo torgaron, pero’l fechu ciertu ye esi: En tolos años d’esistencia de la fundación qu’él punxo en marcha y que dirixó, la nuestra llingua asturiana, patrimoniu de la humanidá y a piques de desapaecer, de perdese pa siempres, nun tuvo nin siquier ún d’aquellos «rinconinos del bable» que solíen ponese nos periódicos enantes del Surdimientu.

Agora, ya alloñáu d’esos llabores de prestixu y rellumbrón, don Graciano García presenta un  poemariu. Un poemariu del que va a lleer un poema, a traviés d’un vidiu, y que va dedicáu a: SS.MM los Reyes don Felipe VI y doña Letizia, «acompañado por bellas imágenes de Asturias«. El poema lleva por títulu «Una patria, una tierra, un alma». Agora nun podemos dicir que don Graciano se sienta presionáu por «poderes superiores» que-y torguen lo que daveres-y prestaría asoleyar y defender. Teníalo mui  fácil. El poema podía perfeutamente llevar por títulu: «Una patria, una tierra, una llingua, un alma» . Con eso quedaría pa min yá xustificáu. Pero esa ausencia fala por sí sola. Asina que sintiéndolo muncho, voi a escusar la mio presencia en dichu actu. A él nun-y dará más, de xuro que nin me conoz nin-y interesaría conoceme, pero pa min supón una cuestión de principios. Los míos, claro. Porque caún tien los suyos.