close
¡Basta! ¡Basta! ¡Basta!

¡Basta! ¡Basta! ¡Basta!

2011-09-26Estáu Palestín1136Visitas

bandera-palestina1Eses fueron les pallabres, o más bien los gritos, que’l presidente palestín dixo n’Asamblea de les Naciones Xuníes al presentar oficialmente la so candidatura pa que Palestina seya un miembru más, dafechu, de la ONU. Con tolos sos derechos. Recordando, digo yo, que na dicha organización los derechos nun son iguales pa toos, puesto qu’unos tienen derechu a vetu y otros non. Pero esi ye otru tema.

Y entaíno a dicir que nunca nun vi causa más xusta que la defendida por Mahamud Abbas nesi foru. Una Palestina que tien el derechu a ser estáu yá dende la Resolución 181 de la ONU en París, nel añu 1947, onde se falaba de la partición de Palestina y la creación de dos estaos, el xudiu y l’arabe. El xudíu creóse dafechu y bien ceo, pero’l palestín entovía sigue pendiente… hasta agora.

Y ye curiosos qu’agora, ante unos fechos consumaos que, anque los EE.XX van vetar nel Conseyu de Seguridá polamahamud-abbas influyencia del lobby xudíu, van ser aprobaos, de xuro, pola Asamblea Xeneral, el gobiernu d’Israel, s’apresure a pidir nueves conversaciones de paz enantes de que se produza la creación del nuevu estáu. Pero los xudíos nun tienen, a esti altor, nenguna credibilidá. Israel tien a Cisjordania ocupada. Los asentamientos de colonos nun se detuvieron (salvo dalgún «paripé») nin en plenes conversaciones de paz. Llantaron un muru fronterizu pa tenelos acorripiaos. Remanen les perres de los capitales y mercancíes qu’entren y salen de Palestina, negándose dacuando a entregales a los sos verdaderos destinatarios. Ya imcumplieron dafechu toles resoluciones de la ONU en cuantes a la so retirada a les fronteres anteriores a la Guerra de los Seis díes. Agora quieren negociar… pero ye tarde y nun se los cree.

Tendrán de ser los representantes d’esi nuevu Estáu Palestín los qu’anicien eses conversaciones de paz que tienen que se producir, pero n’igualdá de condiciones y conscientes de la nueva situación política de la zona. Una situación que, esperemos, traiga la democracia a unos paises dictatoriales que-y ficieron (consciente o inconscientemente) el xuegu a Israel. Ta claro que, a la so vez, los palestinos tienen que reconocer la esistencia del Estáu xudíu y garantizar unes seguridaes fronterices, torgando y castigando a los que nun les respeten. Pero tamién la constitución d’esi Estáu va favorecer esti tema y, sobre too, la capacidá que tenga’l gobiernu xudíu pa impedir nuevos asentamientos en territoriu palestín, dexando de ser un país que, nun solo «tutela» a la población árabe, sinón que la tien dafechamente «secuestrada».

Nun sé si, como dicen dalgunos, Israel nun quier reconocer al Estáu Palestín pola posibilidá de que, nesi momentu, lu denuncien al Tribunal Penal Internacional. O porque quier seguir teniendo a esi territoriu como’l so feudu pa facer o desfacer lo que quieran. Pero la Historia sigue p’alantre, y la hora del Estáu Palestín ta a puntu llegar. Yo, dende equí, salúdolu.