Que llantaos dafechu nel sieglu XXI digamos que la institución de la Monarquía ye una antigualla ye daqué normal. Y que, de resultes d’ello, digamos qu’habría que la suprimir, paez tamién normal. Nun tien sentíu qu’unes sociedaes adultes, democrátiques y modernes, sigan calteniendo una institución medieval que, si en dalgún momentu pudo tener la so xustificación, na dómina d’internet, los ipod, los viaxes a Marte y la igualdá de toos ante la Llei resulta un anacronismu. Igual qu’esapaecieron les sociedaes feudales, colos siervos y los privilexos reales, eclesiásticos y señoriales, deben esapaecer los reis y el mundu que los arrodia.
Pero entovía en dalgunos requexos del mundu, cada vuelta menos, por una especie de tradición como Papá Noel, los Reis Magos o la fiesta d’antroxu, hai paises que la caltienen (a la institución real), anque desprovista de poder políticu, como una alcordanza d’otros tiempos y una forma d’enllenar de glamour les revistes del corazón. Ya se sabe qu’esi mundu de princeses, condes, marqueses y demás personaxes inútiles pa la sociedá vende muncha prensa.
España ye un d’esos requexos en que pervive esa antigualla de la monarquía, nun sólo pol glamour que tanto presta a les revistes, sinón pol mieu que nos metieron al retornu d’esa otra institución, normal en cualquier otru país, que ye la República. A lo llargo de más de 40 años, la República (la Segunda, pero tamién la Primera) fueron el blancu de tolos males polos que pasaba’l país. Hasta tal puntu que yo recuerdo como mui popular la fras de «aquello yera una república», cuando dalgo yera mui caótico o desafortunao. Asina, la llamada «transición» que siempre se pon como exemplu de tresparencia y democracia, nin siquier se plategó la posibilidá de tratar la forma de gobiernu. O seya, la posibilidá de que, en llugar d’aceutar a un Rei impuestu por Franco, que xurare los Principios del Movimientu, y que nin siquiera yera l’herederu llegal de la corona (que-y correspondía a so pá), l’Estáu Español se constituyere na III República con un Presidente escoyíu democráticamente por tolos españoles. Ye verdá que la correlación de fuerces naquellos momentos lo torgaba (l’exércitu siguía siendo franquista, y la policía, los xueces, etc.), pero aquellos tiempos pasaron y nada nun se fixo por camudar una situación anacrónica que permanez nel tiempu.
Pero bono, yá que la monarquía ta equí y que, al paecer, nun se cuestiona la so esistencia, lo mínimo que-y hai que desixir ye que se comporte con decoru. Un decoru qu’arrecostina con delles condiciones étiques que nun se puen saltar. La Corona, o seya la Casa Real, recibe unos millones d’euros de los Presupuestos del Estáu, o seya, de los impuestos que pagamos tolos españoles. Creo que son al rodiu de 9 millones d’euros al añu, o seya, unos 15oo millones de les antigües pesetes. Hai qu’amestar a eso, la contribución de 3 ministerios: Interior (que paga la seguridá), Defensa (que paga los viaxes) y Economía (que paga, creo, los gastos de representación y otros). Total, otros cuantos millones más. Paez qu’eso debiere ser abondo pa vivir bien. Pero lloñe d’eso, miembros de la Casa Real, paez que necesiten más dineru pa vivir y equí entra tol tema del Señor Urdangarín y Señora. Y digo Señora, porque ella tamién prestaba’l so nome pa dalgunes de les empreses del so maríu.
¡Y qué vergoña! ¡Qué gran vergoña! La llectura de les actuaciones del xenru del Rei, utilizando ONGs (una empobinada a neños discapacitaos) pa facer trampes, evadir impuestos, sacar perres d’España pa paraisos fiscales, etc. etc. fai que nos pongamos encarnaos. Él de xuro que non. Espero que nel xuiciu pueda defendese y que si ye culpable, caiga enriba d’él tol pesu de la llei. Pero la entruga ye: ¿Y la infanta d’España nun conocía les actuaciones del so maríu? Abúltame imposible, más tando les empreses tamién a nome d’ella? ¿Y el so suegru, o seya’l Rei, nun sabía nada de lo que facíen la so fía y’l so xenru? Abúltame tamién imposible.
Como yá me toi pasando de tiempu y espaciu, voi dir zarrando. Va tiempu hubo tamién otros rumores (o más que rumores) qu’implicaben al propiu Juan Carlos I en negocios «poco llimpios». Fueron aquellos col so amigu Colón de Carbajal. D’aquello nunca más se supo. Pero lo d’agora nun van poder tapalo tan fácilmente. A cortu plazu, hai que desixir les responsabilidaes totales caiga quien caiga. Toos somos iguales delantre la llei. Pero a llargu plazu, lo qu’hai que se plantegar ye la esistencia mesma d’una institución obsoleta que nun tien sentíu nuna sociedá moderna. Lo qu’hai que pidir ye la constitución de una República (la III), en consonancia cola mayoría d’edá d’una sociedá que quier organizase dende los puestos de mayor altor. Y que nun vengan metiéndonos mieu cola de la república que, polo menos yo, yá toi mui mayor pa babayaes.
