close
¡Féliz día de la Patria… nel esiliu!

¡Féliz día de la Patria… nel esiliu!

2011-09-081020Visitas

bandera-dasturiesEsi ye’l mensaxe de móvil que-yos unvié a los dos fíos mayores, Xuan y Mauro, na más alborecer esti día 8 de setiembre. El primeru en La coruña y el segundu en Madrid, a onde tuvieron que se desplazar en cata d’unos trabayos qu’equí se-yos negaben. Talo qu’ellos, otros munchos miles de rapazos/es anden esperdigaos pel mundu, en contra la so voluntá, por nun haber na so tierra xera pa ellos. Asina pues, ye esti un día que nun pue ser festivu, mentanto un solu de los nuestros mozos tenga que dir pal esiliu llaboral por nun poder trabayar equí. Polo demás, ponse un coloráu sintiendo dalgunes de les coses que se dicen nel «Parllamentín». Los «rexonalistes» citando les dos coses que más tarrezo nesti mundu, el «covadonguismu», y la «Reconquista». O seya, la visión más españolista que pue dase. La de: «Asturies ye España y lo demás tierra conquistao». La de «la cuna d’España». Manda madre. Y los otros, criticando el mensaxe «rexonalista» de Foro, cuando na realidá toos tienen la mesma visión de la nuestra Patria. Quiero creyer, que’l pragmatismu de dalgunes persones qu’ocupen cargos d’importancia dientro de FAC, encartie pa dir algamando dalgunos de los llogros que defendieron na so trayeutoria vital. Pero tien de ser mui ablayante tener qu’oyer, de compañeros de partíu, les babayaes tópiques y grandonistes nun día que debiere ser el verdaderu Día de la Patria Asturiana.  Yo, polo menos, pondríame coloráu.