close
¡H.oder colos «rexonalistes»…!

¡H.oder colos «rexonalistes»…!

2012-02-15presupuestu Academia1455Visitas

academia-de-la-llingua-asturianaL’otru día escribía una cosina equí nel blogue a la que-y punxi de títulu: «Pa l’Academia, les arralladures». Nella recoyía’l mio descontentu -y el de l’Academia- pol brutal recorte nel presupuestu presentáu al Parllamentín pol partíu FAC. Un recorte que, d’aquella, fixábase nun 27 %. Más d’ una cuarta parte del ya escosu, y conxeláu dende va tiempu, presupuestu asignáu a la institución. Col mésmu facíase mui difícil siguir calteniendo les múltiples actividaes académiques que, asina y too, nun dexen de ser una gota d’agua nun oceanu al respeutive de lo que se necesitaría pa la dignificación de la nuestra llingua y el llogru de que nun desapaeza, tal y como vien sopelexando la UNESCO.

Aquellos presupuestos nun pasaron el trámite parllamentariu, lo que produxo la disolución d’ésti y l’anuncia de nueves eleiciones. Automáticamente quedó prorrogáu l’anterior presupuestu y, entendíemos nosotros, coles mesmes cifres que les del añu 2011. Pues entendímoslo mal.  Nun sólo nun se respeten los 230.000 euros d’aquel añu, nin siquier la rebaxa del ventisiete per cientu del presupuestu presentáu, sinón qu’agora se-y quiten a l’Academia un CUARENTA Y UN per cientu de l’asignación. 41,6 % pa ser más esautu. Una barbaridá.

El señor Cascos entró nel panorama políticu asturianu vendiéndonos la moto del rexonalismu. La nun dependenciaalvarez-cascos de Madrid. El so momentu de gloria rexonal fue cuando llamó a Asturies, País, lo que fizo tremar d’emoción a un piñu (non mui grande, ye verdá) d’asturianistes que creyeron nesi mensaxe diferenciador. Creyéronlo daveres, yo conozo a dalgún y sé de la so bona voluntá. Como tamién creo que, nesti momentu, son yá mui pocos los que siguen pensando igual. Porque del supuestu rexonalismu de Cascos… ná de ná. Por si fuere necesario, ehí ta esta rebaxa del 41% del presupuestu de l’Academia, másima institución en defensa de la nuestra menaciada llingua. Pero nun ye sólo una cuestión de perres. El señor Francisco Álvarez Cascos (el FAC de FAC) nun tuvo, en toos estos meses en que gobernó Asturies, un minutu pa recibir protocolariamente a la señora Presidenta de l’Academia. Una institución del Principáu. Lo cual, ente otres valoraciones, paezme una grosería que delata’l so asturianismu de periódicu.

academia-21Con esti atentáu económicu que se fai a l’Academia, va a quedar paralizada tola so actividá normalizadora, d’investigación, de divulgación y de defensa de los drechos de los asturianos. Quedarán perres, namái, pa pagar al personal alministrativu y de llimpieza y, sicasí, pal Día de les Lletres. Lo demás quedará pa prau. Igual ye eso lo que se pretende con esti afogamientu económicu.

Estos díes d’atrás, dalguién de los qu’entren davezu nesti blogue, comentóme que dellos de los mios artículos empléguense nel twiter pa defender les postures rexonalistes de Foro. Nun sé cómo lo faen, puesto que nun recuerdo tener dicho nada a favor d’ellos. En cualquier casu, y por si hubiere dubia, voi repetir lo que punxe (perdón pola grosería) nel títulu d’esti comentariu: ¡H.oder colos «rexonalistes»…! ¿Entiéndese meyor agora…?