close
¿Quién me robó tres selmanes de la mio vida?

¿Quién me robó tres selmanes de la mio vida?

2009-10-021051Visitas

Xuro que nun lo suañé. Que colé d’Asturies tres selmanes, qu’anduvi perehí pel mundu llonxanu, que vi coses, que merqué coses, que gasté perres, cambié de ropa, moyéme con muga de verdá y el sol dióme na cara delles veces. Xúrolo. Pero ye difícil creyelo llegando a casa y abriendo, otra vuelta, los periódicos. Too igual. Too lo mesmo. Como si nun pasare un solu día. Les mesmes noticies. Los mesmos comentarios. Iguales engarradielles. Como si’l mundu se parare na exa y dexare de dar vueltes alredor del sol (¿yá se pue dicir, non?):tierra-thumb

Areces felicítase polos Presupuestos Xenerales:  Son los meyores del mundu mundial. ¡Qué suerte tenemos de tar gobernaos pol PSOE! La FSA felicítase pola Reforma Fiscal: ¡Vaya «reformona»! Los asturianos vamos salir ganando a fargataes. Dicen que van quitar les subvenciones al carbón: ¡Fenomenal, oye! Total ya nun tenemos mines, pa que les queremos… El HUCA tién un sobrecostu d’un porrón de millones: Guay, tíu, pedimos un préstamu al gobiernu y solucionao. ¿Pa devolvelu? ¡Dios proveerá!… Los presupuestos autonómicos disparen la deuda del Principáu a 1.400 millones d’euros: Qué chachi, tú, sólo los grandes deben perres, mira los Estaos Xuníos…

Pa completar el «sarao» tenemos a una oposición allancada nes babayaes más supines, como lo d’esos dos probes conceyales de Mieres que nun entienden l’asturianu. ¡Cago na mar, poné-yos un traductor, ho! ¡A ver si van a aprobar lo de dar traxes a dalgún xefe y ellos voten en contra…! Y ya, pa nun aburrir, l’espeutáculu patéticu d’esa Izquierda Xunida que quier ser, al tiempu, gobiernu y oposición. Farden, como si mandaren, pero opónense a too como si fueren unos mexanises.

Sólo una cosa me fai pensar que’l tiempu pasó: Eso de les conversaciones ente Andecha y el Pas. ¿Pero Andecha nun yeren los de…? ¿Y el Pas nun yera’l de…? Igual ye que’l tiempu nun pasó y ye verdá que toi suañando…