Anden los nuestros illustres diputaos y diputaes, que se diz agora, toos empixaos celebrando una d’eses feches redondes que tanto nos presten a los humanos pa recordar «efemérides». Y tamién la prensa, con un despliegue abondosu, recuérdanos que fai 30 años de «l’autonomía asturiana». O seya de la re-creación (porque yá taba creada na menos que nel añu 1388) de la Xunta Xeneral del Principáu, muérganu másimu de representación de los asturianos: cuasi ná. Hubo discursos, abrazos y hasta dalguién (Laura González) dixo sentir un migayín de señaldá.
Too ello taría mui bien, y el pueblu asturianu celebraríalo con ellos, si lo que tuviéremos a lo llargo d’estos tres decenios fuere, daveres, un muérganu de gobiernu propiu y non un meru organismu de descentralización alministrativa. O dicho d’otru mou, una oficina d’una sucursal de Madrid. Porque los nuestros gobernantes, y nesto nun estremo ente partíos, recibieron esto de l’autonomía como dalgo llovío del cielu y que nun sabíen mui bien qué facer con ello.
Quiero recordar, agora que tamos pa ello, que yá nel añu 1976 los que conformábemos aquel grupu aniciador de Conceyu Bable-Xixón, entamamos la primer manifestación llegal en Xixón embaxo dos peticiones: «Bable a la escuela» y «Estatu d’Autonomía». Y ello yera porque yá principiaba a falase del dibuxu del futuru Estáu, salíu de les catacumbes franquistes, nel que se prevía que a les llamaes «nacionalidaes históriques» diben da-yos un estatutu d’autonomía propiu. Nosotros reivindicábemos p’Asturies el títulu de «nacionalidá histórica», polo que pidíemos un Estatutu d’Autonomía. Llueu la cosa fue a menos, y finaron dando’l famosu «café pa toos», o seya, estatutu pa tou quisque. Colo qu’agora nun paez tener munchu méritu aquel petite que, nel so momentu sí lu tuvo porque fue pioneru.
Pero anque hubo «café pa toos», los nuestros illustres representantes quixéronlu «descafeináu», y asina, en llugar
d’acceder a esi estatutu pola vía del artículu 151 de la Constitución, o seya, el reserváu pa les comunidaes históriques, como forma d’afirmación histórica y política, ficiéronlo pola puerta d’atrás, pol artículu 144, el que-yos daben a les comarques o rexones ensin nenguna importancia histórica: La Rioja, Murcia… Y esi actu xurídicu y políticu podemos dicir que «marcó carauter», tolo que vieno depués fue ramplón, secundario, probe, sucursalista… y yá naide nos tomó en serio.
Venir, entós, a estes altures, festexando los 30 años de Nada, nun tien sentíu. Lo meyor que podíen facer yera nun salir de casa o enzarrase nesi guapu edificiu neoclásicu a llorar como Boabdil cuando perdió Granada. Ye una paradoxa qu’esi Sanjurjo, a la sazón Presidente de la Nada, diga «que reivindica el papel de la Junta y sus diputados». Seguro que don Álvaro Flórez Estrada y aquellos illustres diputaos que declararon la guerra a Napoleón y unviaron embaxadores a Llondres, tarán nestos momentos revolviéndose nes sos tumbes.
