El pasáu martes, día 27 de payares de 2012, cumpliéronse 75 años desque’l recién nomáu Ayuntamientu franquista de Xixón (añu 1937) aprobó nun plenu la incautación total de los bienes del Atenéu Obreru. Entidá que venía funcionando, xunto coles sos sucursales, dende l’añu 1881. Entovía taba reciente la entrada de les tropes franquistes na nuestra ciudá (21 d’ochobre), lo cual nun supunxo la paz, como dicen dalgunos, sinón l’empiezu d’una época de represiones, persecuciones, xuicios sumarísimos y execuciones que duraron abondos años.
El patrimoniu espoliáu al Atenéu yera mui grande. Vamos referinos namás al «material», porque sedría imposible valorar l «‘inmaterial», compuestu polos años d’instruición pública, y de fomentu de la cultura en toles sos diverses estayes. Ensin escaecese, tamién, de que l’Atenéu Obreru de Xixón fue’l referente nel que se fixaron el restu los ateneos obreros, populares o agrarios d’Asturies que, en númberu superior al centenar, s’espardieron per tolos requexos del nuestru País nos años previos a la guerra. En cuantes al «material», consistía nun edificiu principal de cuatru plantes: un semisuétanu onde taba’l Ximnasiu, una planta baxa col Salón d’actos y la sala esposiciones, y dos pisos superiores con Sala d’axedrez, sales de llectura, estudiu y reunión, y la biblioteca. Llueu, nel sobráu, la casa’l conserxe. L’edificiu taba decoráu con muebles modelu «art-decó», como espeyen les semeyes feches por Constantino Suárez (tamién represaliáu por ser sociu del Atenéu) y poseyía una perinteresante pinacoteca con cuadros de Valle, Piñole, Lavilla, Solana, Moré, Regoyos, etc. Cuadros qu’agora tarán en casas particulares a onde diríen a parar depués de ser incautaos. De la biblioteca, calculada nunos 30 mil llibros, cuasi la metada fueron quemaos poles Escuadres Negres Falanxistes nos díes siguientes a la ocupación, y la otra metada que se consiguió rescatar, pasó a engrosar los de la Biblioteca Xovellanos onde entá permanecen, y tamién a delles biblioteques particulares. A ello hai qu’amestar lo espoliao nes sucursales del Atenéu, nel Llanu y La Calzada.
Esti sábadu, un grupu de socios del Atenéu, xunto con otros simpatizantes, protagonizamos un actu delantre’l monolitu qu’hai nel Muro, n’alcordanza del llugar onde taba la so sede principal, y onde colocamos un ramu flores cola bandera republicana, tres unes intervenciones del nuestru Presidente, Luis Pascual, y el direutivu ya historiador Boni Ortiz. La intención agora, ye reclamar la devolución del patrimoniu incautáu, al igual que ficieron otres instituciones, partíos y sindicatos. Porque nun pue ser qu’aquel espoliu cometíu peles fuercies franquistes, nun tenga güei una reparación material. La moral ya la tuvo, anque a vegaes nun lo paeza pues entovía se nos ta negando un llocal dignu, tal y como se tenía apautao col Ayuntamientu de la villa. Esperemos que dambes devoluciones se cumplan, porque n’ello va a volcase dende agora l’esfuerzu de los socios del Atenéu y, seguro, d’otres persones ya instituciones democrátiques que nos van a sofitar. Habrá noticies.
(Semeyes del autor)