Nun recuerdo mui bien d’onde vien esa frase que pongo nel títulu, pero sí sé que, en dalgún momentu d’un partíu de fútbol de los que xugábemos de neños -fútbol o «cuadrín»- decíamosla. Posiblemente fuere pol pocu espaciu, o pola diferencia de xugadores, nun sé. Pero había dalgo -tres faltes, tres corners…- qu’a la de tres orixinaba un penalty. Y ye que’l penalty siempre fue la falta másima, el castigu mayor del fútbol. El «fusilamientu» del porteru.
Vi esti domingu la parodia que ficieron dos grandes xugadores del Barsa, Messi y Suárez, na execución d’un penalty escontra’l Celta. Diome pena. Tengo de ser de los pocos que lo siente asina, pues hai cuasi unanimidá n’afirmar lo maravioso que fue, el gran espectáculu que dieron, y cómo esi ye’l camín d’engrandar esi deporte, en llugar de dar pataes o facer faltes. Y esa cuasi unanimidá atropa inclusive al equipu contrariu, pues al so entrenador y a dellos xugadores paeció-yos mui bien. Nun digamos yá a los de la «cursi» prensa deportiva que lo xulga como una obra d’arte.
Pa esti modestu observador del balompié, con munchos años d’andamiu, ye un sinsentíu que puestu un xugador solu,
delantre’l porteru, col balón paráu y a una distancia de once metros, se dea un pase llateral pa que venga otru detrás a completar una acción que, de mou muncho más direutu, pue executar el que lu tira. Nun ye que seya antirreglamentario, como tampoco lo sería tirar el penalty cola cabeza, pero paez que se trata d’un «rizar el rizu» dafechamente inútil y estravagante.
Quier comparase esa babayada col penalty estilu «Panenka», y nun tien nada que ver. Nel penalty «Panenka», lo qu’hai ye un engañu col cuerpu al porteru que, paeciendo que se va a chutar fuerte, descolócalu pa un de los llaos pa llueu tirar suave pol centru. L’acción ye única y direuta. Otros amaguen col cuerpu pa un llau y llueu tiren pa otru, o otres distintes maneres d’engañar al guardameta. Pero lo de, pudiendo tirar direutamente, ensin nenguna estorbisa, dar un pase llateral o hacia alantre abúltame que ye una «frivolité» que, si nun s’acerca al despreciu, poco-y falta. Facer un supuestu espectáculu a costa d’un rival yá derrotáu.
Yo entiendo’l fútbol d’otra manera. L’espectáculu vien de la llucha de dos fuerces y dos intelixencies al serviciu d’un oxetivu, que ye’l gol. Lo demás, el llucimientu, el regate, el «gambetéu»… tien de tar al serviciu d’eso: marcar goles y evitar que te los marquen. Si non, que contraten a esos que dan doscientos mil toques col balón, ensin que-yos caiga al suelu. Entovía vi l’otru día un interesante partíu de Rugby européu nel que xugaba España. Fue un gran espectáculu, nel que dos equipos lluchaben hasta l’agotamientu, nun campu enllenu repla, por derrotar al contrariu. Ellí naide diba a cayer en frivolidaes, nin engañifes, anque nun tuvieren prohibíes. El mayor respetu pa ti mesmu y pal contrariu ye la llucha noble. Qu’un equipu multimillonariu, con dalgunos de los meyores xugadores del mundu, tenga que cayer neses pachangues d’entrenamientu pa exhibise delantre’l públicu abúltame que ta de más. Fáigalo Cruyff, Messi, Cristiano o el panaderu de la esquina. Si al Celta nun-y da más, a mí sí. Pa l’otro, que vayan al circu.