Yá di la mio opinión, n’otru llugar d’esti blogue, al rodiu del tema de les hipoteques y los desahucios. En resume dicía que ye mui gordo que a ún lu echen de la so casa, porque la casa, el llar, ye dalgo mui sagrao. Anque tamién opinaba qu’hubo muncha xente responsable de metese nuna hipoteca, con unes condiciones de precaridá llaboral, a unos precios de mercáu dafechamente inflaos y con unos plazos de 40 años del too inasumibles. Y ponía l’exemplu de los mios tres fíos que, inclusive con un trabayu medianamente estable, tán viviendo d’alquiler.
En cualquier casu’l fechu ta ehí, y hai una probe xente de la qu’abusaron nel momentu de constituyir el préstamu hipotecariu, que llueu tuvo mala suerte na vida, y que s’alcuentra nunes llamentables condiciones por mor del tema del desahuciu. Ello llevó a una gran parte d’ellos a aconceyase nuna asociación denomada «Plataforma de afectados por la hipoteca» (PAH). Y ye que resulta mui humano tratar de xunise con otres persones que carecen el to mesmu problema, por eso de «la xunión fai la fuercia» y esi sofitu material y sentimental de sintise arropáu por otros como tu.
Nun sé mui bien, o meyor nun lo sé n’absoluto, cómo funciona esa plataforma, pero persabiendo les causes que la crearon atalanto que ye del too aconfesional y apartidista, por tratase de muncha xente diferente nel so orixe. Pero esta PA H ta agora mui de moda (llamentablemente), porque con gran aparatu de medios de comunicación, acúsasela d’acosar a determinaos políticos individuales, llevando’l so acosu hasta los propios domicilios d’estos individuos.
Hai que tener munchu cuidáu con estes coses porque, una bona causa, como en principiu ye ésta, pue vese esbayada
por unes actuaciones descomanaes, que se tresformen en «matonismos» o intentos de tomase la xusticia pola mano, y onde, seguro, finaríen tamién pagando xustos por pecadores. Pero con esto del acosu asocede como col tema de la violencia: ¿quién ye’l responsable últimu de la violencia: el que, depués de tar tragando y pasando per situaciones dramátiques termina llevantándose y revolviéndose na so propia defensa, o aquel/aquellos otros que son los que producen les situaciones anteriores? ¿O ye que, acasu, nun ta habiendo nestos momentos una violencia institucional que ta afeutando a miles de persones? Munches de les lleis que se tán promulgando, munches de les situaciones que se tán xenerando col empléu, colos aforros, colos pisos… ¿nun tán exerciendo tamién un «acosu» escontra l’individuu…?
Hai que tener, repito, munchu cuidáu de que les actuaciones defensives de la xente nun se descontrolen, pero munchos de los políticos que charren escontra esi acosu que sufren agora, quiciás son responsables, xunto colos sos partíos, d’otru acosu de signu contrariu que fai que la xente termine saltando. Lo cuál nun ye nunca xustificable, pero si ye entendible cuando falamos de xente desesperanzada. Y, claro, babayaes como les de la representante del gobiernu na comunidá de Madrid, acusando a la PAH d’aidar a los terroristes, nun deberín pasar ensin castigu del so propiu partíu, porque como se diz nestos casos, ta echando más lleña al fueu. Másime cuando lleíemos l’otru día que Bildu ta sacando alantre munches de les sos propuestes nel País Vascu, col sofitu de los socialistes vascos y, dacuando, del propiu PP, si nun lleí mal la noticia. Y esos, según ellos, sí que yeren los «amigos de los terroristes».
