Lleo na prensa con gran esmolición los datos -alarmantes- d’acosos escolares, y los índices de suicidios en rapazos xóvenes. Como diría Jerónimo Granda: «¡Mete mieu!» Ye curioso que, cuantes más s’anuncia y se denuncia’l tema, más paecen medrar los índices. ¿Qué facer, entós?
Lo primero que quiero dicir -y digo- ye que’l tema del acosu nun ye dalgo d’agora, una novedá qu’azota a los rapazos y rapaces d’anguaño. Con esi nome o con otros, siempres esistió acosu na escuela, lo qu’ocurre ye qu’enantes nun lo llamábemos asina. Yo recuerdo, por tolos colexos que pasé en Xixón (Inmaculada, Institutu Xovellanos, Corazón de María) que’n cada cursu había l’abusón de turnu, el que menazaba, el bravucón qu’emplegaba la fuerza bruta. Tenía con él a dalgunos de los «pelotas» que siempre van col poder, pero la verdá ye que munches de les posibles víctimes xuntábemos les nuestres fuercies pa facer frente, o polo menos defendenos de los abusadores. Nun facía falta nin ponenos d’alcuerdu, yera dalgo instintivo: cuando un grandón se metía con «un de los nuestros», saltábemos detrás d’elli y principiábemos a grita-y: «¡Fulanitu, abusón! ¡Fulanitu, abusón!», ya inclusive había dalgún conatu d’escorribanda. Nun sé si se perdió esi espíritu de solidaridá escolar, pero fue dalgo que siempre detuvo a los agresores y ayudó a les víctimes. ¿Qué ye, que yá nun hai empatía colos débiles, colos diferentes, con los que nun son como nosotros, escontra esos otros qu’ataquen? Y los ataques nun tienen por qué ser solamente físicos. En fin, sería cosa de volver a recuperalo.
Otru tema que paez que causa munchu problema y considérase una forma d’abusu son los motes. Nun sé cómo los padres y güelos preparen en casa a los neños pa salir al mundu de fuera, pero na nuestra familia (y comprende a los Trancho-Menéndez y a los García-Oliva) una constante que se repite ye’l reínos de nosotros mésmos. De les nuestres pifies, de les metedures de pata, de la pinta que llevamos en determinaes circunstancies. ¡Probe del que nun tenga sentíu del humor! ¡Va dau! D’esi mou, nada de lo que puedan dicinos los de fuera va a llastimanos, porque yá lo tenemos entrenao. Nun se puede tratar a los neños como dalgo intocable, qu’hai que llevar ente algodones, porque’l primer golpe, el primer revés, la primer contrariedá que tengan fuera yá los funde y los descoloca. Nel colexu la mayoría teníemos motes, nun digamos na mili o na pandilla d’amigos. Hai barrios enteros en que, nun sólo esisten, sinón que se lleva a arguyu el tenelos, como pue ser en Cimavilla o el Natahoyo. En Cimavilla yá sustituyen al nome verdaderu que munches veces nin se recuerda. Poro, y a nun ser que seya una cosa ofensiva n’estremu, el mote nel colexu nun tien por qué llevanos al suicidiu nin causanos grandes esmoliciones. Hai que deprender a reíse d’un mesmu y asina naide se reirá de ti.
Otru aspeutu al que se-y da muncha importancia ye l’abusu «dixital», el de les redes sociales y eses plataformes de móviles y ordenadores. Igual ye porque yo soi d’una xeneración que vivió ensin too eso, pero paezme que si se meten conmigo por internet la solución ye mui fácil: salgo d’internet. Lo mesmo en Whatsapp. Voi tar sólo nos grupos colos que me lleve bien y m’aporten coses positives. Si hai dalgún elementu «tóxicu», o lu borro o me salgo. Yo toi en varios chats de Facebook, y de dalgún yá me salí y tamién borré como «amigu» a xente que nun lo ye.
Seguro que tolo que yo digo equí yá lo pensó xente más intelixente, pero colos problemes propios que yá tienen los rapazos a esa edá, vamos a nun tratalos como si fueren «El licenciado vidriera», que camentaba que cualquiera que s’allegare a él, podía rompelu. Hai munchos dramas na vida que nun podemos evitar, pero otros munchos de menor calter habrá que los reconducir. Y aprender a los mozos y moces a endurecese un poco y a tomar les coses con tranquilidá y sentíu del humor. Seguro que dalgo meyoraríemos.
Imaxe: PNGWing
