close
Adiós a Liana

Adiós a Liana

2012-03-12415Visitas

Hai veces que les males notices vienen enriestraes, como les panoyes. A la muerte, en pocu tiempu, de Jose Luis Iglesias y del cura Bardales, súmase agora la de l’amiga y compañera d’estudios Liana Martínez: Liana «la de Mercurio», como la conocía la xente. Con Liana y el so maríu Adolfo Vena, «Adolfín», caltuvimos una llarga y prestosa amistá dende los tiempos en que finamos xuntos los estudios de Profesor Mercantil n’antigua Escuela de Comercio. Tolos años nos xuntábemos los d’aquella promoción, en dos o tres ocasiones, alredor d’una mesa y unes botellines de sidra. La vida llevanos a toos per caminos y circunstancies distintes, pero siempre tuvimos un tiempu p’aconceyanos y charrar de les coses d’anguaño y, sobre too, de les d’antaño. Les mil y una aventures que pasamos na escuela y nel viaxe de fin de carrera que ficimos xuntos. Momentos imborrables, pese a la so cenciellez, n’aquellos años de mocedá. Esti añu, cuando volvamos a xuntanos, habrá una gran perda. Una ausencia que naide podrá enllenar, porque Liana yera una moza irrepetible. Descanse en paz y un abrazu, que-y daré en persona, pal so maríu, l’amigu Adolfo.