Yera llóxico. Va un par de díes, comentaba nesti blogue la necesidá de tomar midíes pa cortar el rumbu erráticu, por non llamalu suicida, del Sporting, midíes que pasaben por una dimisión del entrenador o, casu contrariu, por un cese. Igual yá ye tarde pa encarrilar el futuru del equipu, pero polo menos hai que lo intentar. Llegaos a esti finxu siempre hai la tentación d’entrugase si ello ye xusto, pero esa ye una entruga que nesti deporte/espeutáculu «carnivoru» nun tien sentíu. La culpa d’Abelardo, que per otru llau pue caenos personalmente bien, ye bien ñidia: nun supo o nun pudo dotar al equipu d’un sistema coherente, nin tresmitir a los xugadores la motivación y el puxu necesarios pa suplir lo anterior. D’ehí esa cuesta abaxo pindia que nos llevó a facer un númberu de puntos ridículu, al tiempu que somos de los más goleaos y de los menos goleadores. Direutos pa Segunda. Non tola culpa ye d’él, claro, los mangantes de los xugadores y la ineptitú de la Direutiva, como siempre mal aconseyada nel tema fichaxes, collaboraron al desastre. Pero como se diz nesti mundu futboleru tan enllenu de tópicos y frases heches: «como nun vas a echar a los 24 xugadores, lo más fácil ye echar al entrenador».
A Abelardo habrá que-y agradecer los servicios prestaos, que nun fueron pocos: un ascensu a Primera col que naide contaba, y poder mantenese un añu, colo que tampoco nun se contaba. Ye verdá que tamién influyeren la Santina, el Lugo, un delanteru arxentinu llamáu Caballero, San Betis Balompié de Sevilla, Marcelinín Primeru de Careñes y dellos milagros más, pero había que tar ehí pa que los milagros surtieren efeutu. Abelardo y los xugadores aidaron. Pero -otru tópicu- la vida sigui, y lo que güei ye cara mañana ye cruz, y a tomar por ehí la bicicleta.
Agora llega un entrenador nuevu. Un tal Rubi al que nun conozo, pero que tien fama de facer equipos duros, incómodos, a los que cuesta ganar. A estes altures de la Lliga nun se pue andar con esquisiteces, hai que se plantegar cada partíu como una batalla onde hai que dexar la pelleya. Y el que nun tea dispuestu a ello, que marche pa so casa. Y nun sigo, porque paez que soi yo’l nuevu entrenador del Sporting. Un equipu rotu, ensin condición física nin táutica y ensin moral. Si esti Rubi pue facer dalgo, que lo demuestre. Ye’l momentu.
