close
¡Adiós Cánovas, adiós Sagasta!

¡Adiós Cánovas, adiós Sagasta!

2015-12-21551Visitas

canovas-y-sagastaYa sé que les comparaciones son odioses y nesti casu, amás, falses. Porque aquella España de finales del S. XIX en que Partíu Conservador y Partíu Lliberal repartíense artificialmente los gobiernos, nada tien que ver con ésta. Ellí’l votu yera, primero restrinxíu, y llueu namás pa los paisanos, mentanto agora tamos nuna democracia dafechu y el votu ye universal, anque como se lleva tiempu denunciando, non tolos votos valen lo mesmo. Habrá qu’igualo. En cualquier casu, el titular d’esti pequeñu comentariu pretende ilustrar un fechu nuevu no que  llevamos de democracia. Por primer vez, el bipartidismu ta tocáu del ala. Hasta agora, podía gobernar el PP o el PSOE y al otru tocába-y exercer d’oposición. Y al cabo d’una o dos llexislatures, dicíen aquello de «llegó’l cambiu» y camudábense los papeles. Los demás partíos facíen de comparses, anque delles veces necesarios pa poder gobernar, como pasó col PNV o con Converxencia i Unió cuando Aznar tuvo que falar catalán cola criada.

Agora, hai un panorama que dicen «ingobernable» nel Parlamentu. Bueno, fue lo que quixo’l pueblu español, o seya que tendrán qu’arreglase pa gobernar porque repetir les eleiciones dientro un par de meses ye una chifladura y, amás, previsiblemente volveríen dase unos resultaos asemeyaos. O seya, qu’habrá que facer eso que se fai n’otros paises: pactar, negociar, gobernar en minoría y tratar d’aprobar  les lleis consensuando colos más afines. L’otro, claro, les mayoríes absolutes o los «pactinos» colos amigos (como’l PSOE ya Izquierda Xunida n’Asturies) ye lo más fácil, pero eso nun siempre ye lo meyor pa la xente.

En cuantes a los resultaos en sí, tán mui claros. Batacazu del PP, anque lleguen a gobernar en minoría. Batacazu del PSOE, anque tean mui contentos, yá que por primer vez na democracia baxen -notoriamente- de los 100 diputaos. Bon resultáu de Podemos, peor de les previsiones d’ hai munchos meses, pero meyor que nes últimes encuestes. Cumplió, a la baxa, Ciudadanos, que  cuntaben con ser llave del nuevu gobiernu y nun lleguen a tanto. Y batacazu d’Izquierda Xunida, que queda como un partíu residual, practicando pa cada eleición un inventu nuevu. Yá nun se sabe a qué se vota. Los nacionalistes, lo  esperao. Dame la impresión de que’n Cataluña pierden puxu, anque tamién tán mui contentinos, como correspuende. ¿Daveres con eses mayories quieren facese independientes? Ellos dicen que sí. Y nel nuestru País, gana la coalición de dereches, pierden el PSOE ya I.X. y apunta maneres Podemos pa ser la primer vez que se presenten. Y ye que los  «bastiones» socialistes ximiélguense, como les barandielles del puente. Esto ye como yo lo veo. Otros veránlo d’otra manera, claro.