Poco más de lo que yá se dixo pue amestase sobre la muerte de la escritora y gran muyer que fue Almudena Grandes. Muncha xente y mui importante sopelexó la so opinión sobre ella y los munchos valores que tenía. Pero sí podíemos añadir dalgo más, porque quiciás nun se dixo bastante, sobre los silencios que’l dichu socesu traxo consigo. Silencios como’l de la «señora» Ayuso, o el «señor» Almeida, Presidenta de la so Comunidá y Alcalde de la so ciudá, respeutivamente, que nun tuvieron a bien asoleyar nin una mísera nota de prensa llamentando’l fallecimientu d’una conciudadana que, como se diz muncho agora, «punxo a Madrid nel mapa». Hai que tener una increyible baxeza moral pa nun ser a salise de les sos miseries polítiques y reconocer los méritos d’una persona como Almudena anque tuviere nes antípodes del so pensamientu. El cargu debiere tar siempre p’enriba de la opinión personal de los que lu detenten. Y ye que tamos aportando a un finxu, a un puntu tal, nel que la pallabra «política» fiede tanto que nun te queden ganes, non yá de participar activamente nella, sinon mesmamente de lleer o falar sobre ella. En fin, dicho queda. Y poco más. Nun yera Almudena Grandes una de les mios novelistes preferíes, pero siempre la tuvi por una persona intelixente, simpática, consecuente y que dio voz a munchos que non la tuvieron. Los gustos de caún son una cosa, pero’l reconocimientu de la calidá humana d’una persona ta p’enriba de too. Y ésa teníala abondo la popular escritora. Que la tierra-y seya leve a Almudena Grandes y el mio más sentíu pésame al so viudu, Luis G.Montero, un gran poeta.
Almudena Grandes
