Llamábase Amancio Amaro Varela y ye un d’esos casos nos que lo que perdura como nome futbolísticu nun ye l’apellíu, sinón el nome de pila. Trunfó nel Real Madrid a lo llargo munchos años y llegó a la internacionalidá otres munches veces, pero’l mio recuerdu suyu ye de cuando, enantes del saltu a la capital, xugaba nel Deportivu La Coruña. Hai un partíu en concreto del que tengo mui ñidia alcordanza. Enfrentábase’l Sporting al Depor n’El Molinón. Andaben los dos en Segunda anque con caminos mui estremaos: el Depor nos puestos punteros y faciendo un xuegu allegre y goliador, y los nuestros arrastriándose pelos puesto baxos, con un equipu mui floxu, enllenu de veteranos y de xóvenes que nun daben la talla. Paezme, anque nun toi seguru, de que fue l’añu que baxamos a Tercera y llibrónos aquella repesca que se xugó en Mallorca pola renuncia (obligada) d’un equipu catalán. ¿Podría ser la temporada 1960-61 o la siguiente? Dame pereza miralo. El casu yera que llegaba’l Depor que tenía nes sos files a dos grandes fenómenos. Dos delanteros piquiñinos, rápidos y goliadores: Amancio yera’l más famosu de los dos. Xugaba d’interior derechu y yera’l másimu goliador del equipu. Xunto a elli, el delanteru centru, Veloso. Menos vistosu pero igual de mortíferu. A min encantábame. Dambos ficieron un gran partíu nel nuestru estadiu, onde’l Depor ganó por 2-4, y recuerdo sobre too un gran gol que marcó Amancio. El Sporting taba tan mal que nun teníen defensa central, depués de la retirada del gran Altisent. Asina qu’adaptaben al probe Ortiz, que yera delanteru y un de los más honraos y lonxevos xugadores que tuvimos. Diba bien de cabeza y yera pundonorosu, pero desesperaba la so llentitú y faltába-y cintura pa xugar nel puestu de Central. Asina, Amancio y Veloso superábenlu una y otra vuelta hasta marcar cuatro goles. El gol que yo digo fue pa la portería del Piles. Amancio taba d’espaldes y marcáu por atrás pol nuestru Ortiz. Llegó-y el balón rasu, parólu, y xirándo sobre si mesmu con un movimientu de cadera, regatió a Ortiz arrastriando’l balón ensin golpialu. Dalgo asemeyao al famosu regate de Romario naquel partíu escontra’l Real Madrid.
Aquel mesmu añu Amancio firmó pol Madrid onde tuvo munchos trunfos ya internacionalidaes pero, al tar arrodiáu por otres grandes figures (Di Stefano, Puskas, Gento…) quiciás nun brilló tanto como aquel maraviosu añu nel Depor nel que desllumó. Veloso siguió un tiempu más nel Deportivo La Coruña, xugando bien anque-y faltaba la pareya de baille. Entá asina, peme que fichó tamién pol Madrid un tiempu depués, anque nunca nun llegó a tener el mesmu ésitu. Y ye que tener delantre a don Alfredo Di Stefano yera una llábana demasiao pesada.
Descanse en paz don Amancio Amaro Varela, gran xugador y que me fizo recordar un tiempu mui pasáu pero enllenu de señaldá.
