Esti día l’Academia de la Llingua Asturiana fízo-y un merecíu homenaxe a la caderalga de la Universidá d’Uviéu doña Ana María Cano González. Pero esti importante reconocimientu, que se cellebró nel Salón d’Actos del Edificiu Históricu, nun fue tanto polos sos méritos filolóxicos en dicha Universidá, con ser estos munchos, sinón sobre too polos contrayíos a lo llargo tantos años dientro la propia Academia de la Llingua. Miembru de númberu dende la so creación, foi responsable a lo llargo munchos años del so programa formativu, ayalguera, mienbru de les comisiones redactores de les Normes Ortográfiques, de la Gramática normativa, del Diccionariu… y una combativa, al empar que dialogante, Presidenta de la institución por más de 16 años.
Conozo a Ana dende los primeros tiempos de Conceyu Bable. Dende aquel cursín que se fexo nel Salón d’Actos del antiguu Institutu Xovellanos en Xineru de 1975, y que foi l’aniciu de Conceyu Bable-Xixón y l’entamu de tolo que vieno dempués. Y siempre almiré nella los sos conocimientos, la so cercanía como persona y la so firmeza a la hora defender tolo rellacionao cola nuestra llingua y la nuestra cultura. Tuvi la suerte de compartir con ella munches hores dientro los trabayos de l’Academia y siempre atopé na so persona una compañera intelixente y una amiga. Y nes munchísimes Xuntes a les qu’asistí, pese a que yo avezo a ser un poco repunante pa según qué temes, el so comportamientu foi de comprensión y respetu.
Munchos camentamos que, a la fin de la presidencia de Xosé Lluis García Arias, col llistón tan altu como quedare, díbemos a echalu muncho en falta. Enquivocámonos. Ana Cano nun rebaxó nin un milímetru la collecha granible d’Arias, dándo-y al so mandatu la mesma firmeza y, sicasí, la so impronta personal. Por suerte, nun llegamos a echalu de menos pese al so gran valir.
Agora l’Academia fai un emotivu homenaxe a la que lo fue too na institución y que va a siguir siéndolo, si Dios quier, per munchos años entovía. Porque pese a los homenaxes que se-y faigan, Ana ye de les que nun se xubila. Sobre too cuando se trata de les coses que llevamos nel corazón. Como Asturies, por exemplu.
