El mediudía del domingu, y ante la vista de tolos españoles que quixeron velo, prodúxose un escandalosu atracu nun llugar denomáu “Riazor”, situ na llocalidá gallega de La Coruña (ensin L pa los d’allá). Yá ta identificáu l’autor de dicha felonía que respuende al vulgar nome de José María Sánchez Martínez. Él, y la so banda murciana, pertrechaos con xiblatos, palos con banderes, y otros instrumentos agresivos (como cronómetros y tarxetes) cometieron el brutal actu delictivu qu’esti xulgáu pasa a enumberar:
1) Pitar infinites faltes a unos probes llegaos d’Asturies ensin más afán que xugar al fútbol, ensañándose con ellos.
2) Xiblar un penalti inxustu, por unes manes involuntaries teniéndoles detrás del cuerpo y ensin cortar la trayeutoria del balón.
3) Anular un gol llegal a los probes llegaos d’Asturies, pitando un fuera de xuegu inesistente. Pa cometer esti delitu fue axudáu por un de los sos secuaces del palu cola bandera.
4) Dar por válidu un gol consiguíu yá pasáu’l tiempu qu’él mesmu dispunxere, precedíu por varies faltes escontra los probes llegaos d’Asturies que vieron cómo, ensin comelo nin bébelo, robáben-yos dos puntos de la corexa incitando, con ello, a la violencia.
Por too ello, esti Ilustre Tribunal depués de tener vistos repetíes veces los fechos y dándolos por probaos, y persabiendo que son reincidentes nos delitos cometíos escontra los probes llegaos d’Asturies n’otres paecíes circunstancies, tien de condenar, y condena, al susodichu murcianu y la so banda criminal a siete díes y una hora de cárcel dixital, durante los cualos nun se podrá falar más d’ellos, pena dura onde les haya. Nun queda probao, anque hai fundaes sospeches, que los instigadores de los dichos delitos fueren los propietarios del sitiu denomáu “Riazor”, n’otru tiempu comandaos por un célebre “cantamañanes”, agora desapaecíu por obra del Sumiciu, pa mayor gloria de Dios.
En Xixón, a tantos de tantos de dos mil tantos.
El xefe d’esto
