Anque los medios de comunicación de tol mundu yá lo condenaron, nun ta de más qu’amestemos la nuestra condena al atentáu parasinu, nel que doce persones morrieron, nun tanto por unes ráfagues de kalashnikov, cuanto por una barbarie relixosa. Les metralletes son neutrales, elles soles nun disparen, tienen de tener detrás una mano y un celebru -nesti casu la falta d’él- que dé la orde y la execute.
¿Qué podemos dicir de nuevo qu’enantes nun dixéremos? Si hasta, por una vuelta, y ensin que sirva de precedente, paeznos bien la portada de «La Razón»… Lo que ta claro ye que nun puen buscase motivos racionales pa fechos de semeyante calaña. Ye la irracionalidá, nel so grau más altu, la qu’empuxa a unos paisanos -agora tamién muyeres- a cometer actos como esi. Que llueu estos nuevos bárbaros vengan falando de venganza, o de xusticia, o inclusive d’una forma de facer política, ye una disculpa tan probe, tan cínica, que namás unes mentes desequilibraes pol odiu y la sinrazón puen defender.
Pero hai que pescanciar que la barbarie relixosa nun ye una cosa nueva. Agora cométese por árabes, en nome del
Islam, pero durante munchos años cometióse por europeos en nome de Cristo. Y ye que’l fanatismu relixosu ye’l culpable, nun sólo d’atentaos individuales, o de xuicios inxustos y amañaos escontra disidentes, recordemos la «Santa Inquisición», sinón mesmamente de «Guerres Santes» que, de santes, nun teníen nada.
Casualmente, tenemos al nuestru fíu medianu y a la so muyer estos díes en París. Esperemos qu’ a ellos nun-yos pase nada, pero dende esti modestu blogue de provincies, quiero solidarizame coles víctimes del bárbaru atentáu del vecinu país y da-yos el pésame a los sos familiares. Y a la estrema derecha gala, a la fía del xubiláu Le Pen, que nun aproveche fechos tan abegosos como estos pa condenar a toa una xente que vien a la vieya europa, en cata d’un mou de vida que nos sos paises nun esiste. Francia siempre fue país d’acoyida y tien de siguir siéndolo. Pese a los bárbaros qu’acesmen tres les esquines coles armes preparaes.
