Canal Lector ye un portal de la prestixosa Fundación Germán Sánchez Ruipérez, que cunta cola collaboración financiera del Ministeriu d’Educación, Cultura y Deporte y de la Federación de Gremios d’Editores d’España. Ta empobináu a la llectura de los mozos y moces y orientáu a la globalidá del espaciu de fala española. Ufierta un conxuntu completu de recursos a los profesionales: profesores, bibliotecarios, promotores de llectura, llibreros, escritores, ilustradores, editores o cenciellamente interesaos. Como tal, ye una gran basa de datos y una web de recomendación de llibros infantiles y xuveniles editaos n’español nos estremaos paises que comparten la llingua. Los llibros son seleicionaos por equipos d’especialistes en LIJ ente les novedaes qu’espubliza la industria editorial col oxetivu d’ufiertar una información básica sobro los títulos afayaízos pa cada edá.
Nesi sen, la seleición de llibros y conteníos fáese conxuntamente ente la Fundación (pa los que s’editen n’España), Ibby México/ A Leer, Biblioteques escolares CRA de Chile, Bancu del Llibru de Venezuela, Fundación El Llibru d’Arxentina, Fundalectura de Colombia, Ibby Uruguay, etc. pa constituyir un productu dixital con algame global nel tarrén de la llectura.
Apárome en toos estos detalles pa que se valore dafechamente la descomanada importancia que tien esti portal. Y de pasu pa dicir, con arguyu, qu’ente les caberes novedaes incorporaes al Canal Lector ta «Páginas del diario de Simón», esi llibru editáu por Pintar-Pintar con ilustraciones d’Inés Sánchez Nadal y testu míu. Un llibru escritu de mano n’asturianu y que na so versión castellana tantu ruxe-rux ta teniendo. Asina pues, tolos que collaboramos na fechura del llibru tamos percontentos d’esti últimu ésitu de la historia d’ Héctor, esi neñu autista vistu dende los güeyos del so amigu Simón que nos la cuenta nes páxines del so diariu. La verdá, ando mui gayoleru colos mios amigos lliterarios pol so percorríu nel mundu de fala hispánica. Que siga.
