Traime abondes alcordances esti títulu que correspuende a un poemariu de José María González Fernández “Chemag”. Y tráimeles porque “Chemag” presentónos los sos versos a los de Conceyu Bable – Xixón pa que-yos echáremos una güeyada y corrixéremos lo que nun taba bien. Corría d’aquella l’añu 1975 o 1976 y teníemos el llar social en Casa Piñera, na cai San Bernardo mui cerque del cine Albéniz. Los poemes yeren mui guapos anque ye verdá que teníen dalgunes faltuques. Tiempu depués, la Conseyería de Cultura y Deportes editó’l llibru nuna guapa edición con dibuxos de Humberto qu’agora debe tar escosada.
D’esi poemariu, el músicu y compositor xixonés Luis Vázquez del Fresno fizo un ciclu de canciones pa voz y pianu, qu’esti día fuimos a sentir nel conciertu de la Sociedá Filarmónica de Xixón, nel Teatru Xovellanos. El conciertu tuvo una primer parte solamente pianística, na que gociamos cola interpretación del propiu Vazquez del Fresno de la so composición “Yerba”, Opus 12. Nesta obra, el compositor xixonés entemez xunto con unos compases propios, una serie de pieces del cancioneru popular asturianu a les que da un interesante arropu musical camudándoles n´obres llíriques de calter más cultu. Asina, suenen arriquecíos cancios como “Dime paxarín parleru”, “La moza que a mi me quiera”, “Soy de Mieres” o “La mio neña”, ente otres más. El teatru cuayóse d’aires asturianos indentificables, pero al tiempu renovaos. Fue una parte mui prestosa.
La segunda parte dedícóse dafechamente a los “Cantarinos pa que suañes”. Pa ello cuntó cola meyor compañía posible: la guapísima voz de la soprano Beatriz Díaz. La cantante allerana (de Poo) ye la persona más cualificada pa dar voz a los poemes musicaos pues comparte los dos rexistros necesarios pa facelo: una perguapa voz llírica y, al tiempu, una voz de tonada que mamó dende la cuna. Asina, rescamplaron de mou emocionante temes como “Al son d’una gaita vengo”, “Los carros de la mio aldega”, o “Añada d’una caparina”, xunto a otros más llíricos como “La cadenina”, “El xuguete” o la que da nome a la obra “Cantarinos pa que suañes”. La voz de Beatriz Díaz foi cálida cuando fizo menester y potente nes ocasiones que lo pidía, siempre axustada y compenetrada colos versos que cantaba. Un dúo d’intérpretes que nos ficieron gociar cola música llírica asturiana.
Una cosa namái pa finar. Nun entiendo cómo tantu asturianista como hai, o seya esos 30.000 de la manifestación del otru día y los demás, nun acuden a esti tipu d’actos culturales nes que, una música propia y unos versos n’asturianu son tan reivindicativos como la oficialidá del Bable. Porque la Cultura Asturiana ye muncho más rica y amplia, y tamién necesita “oficializase”.
