close
Carlos Meana

Carlos Meana

2020-12-26Carlos Meana104Visitas

Yá me comentare l’otru día’l mio hermanu que Carlos taba mui malín. Tenía’l coronavirus sobre otres dolencies anteriores que lu agravaren, asina que cuando esti día lleí que falleciere nun me pilló de nueves, lo que nun quita pa que lo sintiere igual.

Y ye que Carlos Meana, el so hermanu Adolfo (Fito) y el mio hermanu y yo fuimos amigos yá dende la época de los Xesuítes, cuando yéremos unos “bichis”. Begoña yera’l campu batalla de los nuestros alcuentros porque, amás, ellos vivíen ellí al llau y recuerdo tener xugao, los díes que tocaba muga, nuna guardilla de la so casa na que facíemos unes barricaes y disparábemos “a matar”con escopetes de corchu. So madre, que yera una señora mui guapa pa ser madre, como diríemos entós, facía unos bizcochos mui ricos qu’ellos llamaben «panete». Fíxate tu de lo que m’alcuerdo agora.

Llueu d’esos años de neñez, nosotros cambiamos de colexu y anque seguíemos saludándonos y charrando de xemes en cuando, l’amistá enfrióse. Volvimos a coincidir yá de más mayorinos na Escuela de Comercio estudiando Profesor Mercantil, y ellí dambos xugamos nel equipu de Baloncestu de la Escuela, xunto a otros conocíos como Arias (el padre de Ricardo Menéndez Salmón) o el primu de Carlos, Juan Meana, col que llueu coincidí en Bilbao estudiando Económiques. Del equipu, él yera’l meyor con diferencia.

Segui la so trayeutoria como xugador, como entrenador y como promotor del Baloncestu xixonés nel que fue figura cimera. Y nun mentiría al dicir que Carlos fue un xixonés de los de “tola vida”, d’esos que formen parte del paisaxe de la nuestra ciudá y de los que siempre presta saludar y  falucar aún de coses ensin importancia. Anque nun lo facíemos mui davezu voi a echalu de menos, por él, claro, y porque con él marcha tamién una parte d’aquellos xuegos de neños que tan felices nos facíen. Y anque yo nunca lu llamé asina, namás por esta vez voi dici-y dende equí: “Hasta siempre, Caruca”.

(Semeya: El Comercio)