Como comenté yá notres ocasiones, Ian McEwan pertenez al grupu d’escritores ingleses que tengo como llectures de cabecera. Xunto a otros nomes como David Lodge, Julián Barnes, Anthony Burgess, o el gran Graham Green, formen parte d’una subclase dientro de los escelentes autores ingleses, que son los que yo llamo «escritores católicos». Póngolo entre comines porque seguro que a ellos nun-yos prestaría esa etiqueta. Dame igual. De toos ellos, quiciás el más diversu en cuantes a la so temática seya McEwan, porque ente les sos noveles hai drama y comedia y, en dalgunes d’elles les dos coses xuntes. Esti ye un exemplu d’ello.
A lo llargo de munchos años de llectura, cuasi tantos como años de vida porque fui mui madrugador, atopéme con narradores de toles clases. Por narrador refiérome non al escritor en sí, sinón al que cuenta la historia. Ya sábéis, el narrador omnisciente, que ta fuera de la historia pero conozla y cuéntala; el narrador en primer persona, seya parte o non de la historia. Hai narradores plurales y otros que cuenten pero escuenden el so verdaderu protagonismu. D’estos fue un exemplu na so época la novela «El asesinato de Rogelio Ackroyd», de la gran Ágatha Christie, onde’l que cuenta va engañándonos hasta descubrir qu’él mésmu ye l’asesín. Pero lo que nunca nun vi hasta agora fue que la historia la cuntare un «fetu», o seya un embrión d’unos ocho meses que permanez sollerte a too cuanto asocede fuera, atentu dende’l vientre de so madre. Asina, como la madre tien el vezu de poner la radio pa dormir y sentir noticiarios y programes de debate, el futuru neñu ta bien informáu de lo que pasa pel mundu. Pero, amás, tamién ye a enterase de lo qu’asocede alredor d’él escuchado al traviés de la membrana que lu separa del vientre so ma. Y ye d’esti mou como s’entera de qu’ella y el so amante quieren «cargase» a so padre natural. Asesinalu pa quedase cola casa y les perres. Mayor orixinalidá imposible.
Pero ye que, amás de lo orixinal, la novela toca, dacuando con humor, dacuando con esmolición, temes del nuestru interés: el cambiu climáticu, les identidaes sexuales, les rellaciones padres-fíos… temes sobre los que l’autor reflexona, por boca del tovía «nonnatu» pero que yá tien ganes de ser «neonatu». Un panorama, por demás, abondo desolador.
La «cáscara de nuez» ye la semeyanza que’l pequeñu narrador ve cola so situación presente, dando asina títulu a una guapísima novela del estraordinariu autor inglés Ian McEwan, mecia de novela filósofica, d’humor, de terror o de novela negra, según el prisma pol que va trescurriendo la historia, hasta algamar un final que nun desmerez, n’absoluto, a tolo que tuvimos lleendo. Da pena despidise d’un contador d’histories tan divertíu. Por supuesto, recomiendo la so llectura encesamente.
