A les dos anuncies qu’enllenaron el día dándo-y una dimensión «histórica», el fin de la llucha armada por parte d’ETA, y la muerte del Coronel Gadafi, podríamos da-yos el nome de «Comedies Bárbares», sinón fuere pol númberu de muertos que costaron. Más entovía, de la famosa triloxía de don Ramón María, mereceríen llevar el de «Romance de llobos», que ye’l que meyor se-yos axusta.
L’anuncia d’ETA ye una mala traxicomedia, escenificada cola collaboración d’actores estranxeros (que nun tuvieron demasiao bien nel so papel) y actores nacionales, más bien secundarios. Peor fueron los protagonistes, con un disfraz ridículu, que fadría riir, sinon tuvieren tantos asesinatos al llombu. Dicen que too ello foi necesario pa poder mirar pal futuru. Ya veremos. De momentu ETA nun se disuelve, y pretende ser interllocutor, na menos que colos gobiernos de Francia y España. Ta claro qu’esi conceutu de «democracia» que citen un par de veces nel so comunicáu, nun ye’l mesmu que tenemos el restu la sociedá. Entovía recuerdo cuando nun queríen siquier falar col gobiernu español, porque l’interlocutor que pidíen yera l’Exércitu. Nesti intre ETA ya taba amortizada. Yera una alcordanza del pasáu. Sedría un fallu volver agora a resucitala y facela interllocutora de nada.
Pese a la crueldá d’esi personaxe estrambóticu llamáu Coronel Gadafi, que foi amigu de munchos de los gobernantes
que güei aplauden la so muerte, nun dexen de dame voltures les semeyes del calabre y el vidiu correspondiente. Que los supuestamente «lliberadores» de Libia, los que van llantar la democracia nesi maltratáu país, solucionen el tema pegándo-y un tiru na vidaya al dictador, sigue siendo un actu bárbaru y refugable. Lo que teníen que facer yera detenelu y xulgalu nel Tribunal Penal Internacional. Y qu’esti dictare la pena que mereciere. Eso de tomar la xusticia pola propia mano, podría entendese, pero nun consentise. En fin, si viviera agora, Valle Inclán podría escribir otres «Comedies» muncho más bárbares.
