Seguramente los amos nunca s’enteraron, pero la Pizzería «Las Candelas» tuvo una curiosa rellación colos primeros tiempos del grupu «Conceyu Bable-Xixón. Corría l’añu 1975 y como yá se dixo nesti espaciu (y en dellos otros), el recién creáu grupu asturianista xixonés tenía un programa en EAJ-34 Radio Gijón llamáu: «Asturies na so cultura y na so llingua». Salía un par de díes a la selmana, martes y vienres, y a lo llargo bastante tiempu una parte variable de la redaición, entre los que nunca faltaben Monchu, Amalia, Tere y yo, al finar l’actividá díbemos a «Las Candelas» a tomar «una pizzina», lo cuál yera toa una novedá en Xixón. Hasta pocu tiempu depués, unos meses, nun tuvimos «un llocal social» y depués de vagamundiar per dellos chigres y cafés, acabemos aterrizando en «Casa Piñera», asitiáu na cai San Bernardo, cuasi al llau del «Albeniz». Pero enantes, como dixi, avezábemos a parar nesa pizzería qu’agora cierra. El llocal nun yera como ye, sinón un espaciu mui pequeñu qu’ocupaba la parte de l’actual la barra, con media docena de mesines siempre animaes. Depués ampliaron al altillu que taba al final, y ya muncho más tarde siguió lo que ye’l comedor de la pizzería. Ehí comentábemos incidencies de la grabación que, como nun yéremos profesionales, daba pa munches y simpátiques anéudotes. Y d’ehí tamién salién dalgunes nueves idées pa siguir trabayando pola llingua y la cultura asturianes. Toi falando de los años 1975 y 1976. Perehí andaben les ames y cocineres, María y Maruja Ramos, colos sos maridos, y perehí andaba tamién l’actual responsable, Juan Carlos, que daquella yera un neñu, siempre sentáu nuna mesina faciendo los deberes. ¡Qué prestosos recuerdos tengo d’aquella época!
Como una anéudota pa zarrar esta alcordanza, fue mui simpático un día que taba cenando cola mio muyer, Amalia, yá col altillu incorporáu, cuando vimos qu’una pareyina sentada nuna mesa cercana nun paraba de miranos. Al tiempu, el rapaz púnxose de pies, allegóse y empobinándose a min dixo: «Oiga, ¿usté ye’l famosu escritor Vicente García Oliva?». Nunca naide me dixo nada asemeyao y entróme la risa: «Bueno, yo soi Vicente García Oliva, nun sé si seré un famosu escritor». Non contentu con ello, tuvi que firma-y una dedicatoria nuna servilletina de papel de la pizzería. Tovía cuando nos alcordamos reímonos d’aquella historia.
Agora «Las Candelas» anuncia’l cierre. Y dame un tastu de tristura por ellos, polos dueños, y quiciás más por aquellos tiempos nos que, sobre un mantel de papel, proyeutábemos una Asturies con llingua oficial, cultura respetada ya identidá reconocida. Poro, siempre la recordaremos.
