Toa guerra, en sí mesma, ye un crimen, un fracasu de la civilización, del desarrollu humanu, del diálogu y la hermandá ente habitantes d’un mesmu planeta. Y al tiempu, ye un trunfu de lo arcaico, de lo selvaxe, de la cueva, de lo primitivo, de la barbarie. El poder, l’ambición, el dineru…tán detrás de la mayoría les guerres polo menos en dalgún de los bandos que s’enfrenten. Porque inclusive nes que se llamen “guerrres de lliberación”, un de los bandos llucha por caltener los sos privilexos.
Pero si toles guerres tienen un aquello de crimen, hai detarminaos fechos que se producen en dalgunes que lleven, a los que se denominen “mundu civilizáu”, a aborrecelos particularmente y bautizalos con una fras redundante: Crimen de guerra. Los autores d’esos crímenes que rescamplen penriba de tolos demás, son acusaos y estigmatizaos por esi mundo civilizáu, llegando a xulgalos delantre’l Tribunal Penal Internacional. Pero eso namás pasa colos perdedores. Los que ganen nun tienen que dar cuentes a nadie y siempre suelen ser los más poderosos esos que ganen.
Nel casu del conflictu Palestinu-Israelí nun pue falase, propiamente, d’una guerra, porque pa qu’ésta esista tien d’haber dos
exércitos en combate. Equí sólo hai un. Un poderosu exércitu, armáu hasta los dientes cola meyor teunoloxía, que s’enfrenta a eso que se llama “les milicies”, unos grupos desesperaos d’habitantes d’unos territorios que son como una gran cárcel, colos sos murios arrodiándolos y too. Unos territorios que, como un quesu suizu, tán afuracaos poles posesiones que tienen los colonos que, como un andaz que carcome’l cuerpo, sigue avanzando pesie a les promeses de pone-y fin de los socesivos gobiernos d’Israel.
Nun quiero dicir, y nun lo digo, que l’odiu, la rebelión o cualquier otru motivu nun empuxaran a les milicies de Hamás a facer actos indeseables. Ellos tienen tamién parte de culpa de que, les poques ocasiones en que la paz tuvo cerque, a la fin nun se llograra por unviar missiles caseros, secuestrar dalgún soldáu o cualquier otru actu d’enemistá. Pero eso nun xustifica, nun pue xustificalo, el barbarismu del exercitu israelí escontra población civil, muyeres y neños incluyíos. Nestos caberos díes, hospitales, escueles y hasta centros de minusválidos físicos y siquícos fueron atacaos como si fuesen contendientes nuna guerra ente iguales. Nun ye asina. Y nada, ni la llamada “autodefensa”, pue xustificar la barbarie y l’asesinatu d’inocentes.
Nun sé ónde pondrá’l llistón esi autoproclamáu “mundu civilizáu”, pero si toes eses barbaridaes nun constituin crímenes de guerra, que baxe Dios y lo vea.
