close
Cruciéme con Prendes…

Cruciéme con Prendes…

Sporting con PrendesDiba yá munchu tiempu que nun lu vía. Venía estiráu, como davezu, calteniendo esi bon tipu que siempres tuvo, anque esta vez nun me paeció tan altu. Custiones de perspeutiva, seguro. O el pasu’l tiempu que nos va amenguando. Falo de Prendes, el gran Prendes, el delanteru centru del Sporting nos años cincuenta. Cuando yo lu vi xugar, yá empezare’l so declive, la so cuesta abaxo, pero asina y too entovía lu vi meter goles guapos.

La so especialidá yera’l remate de cabeza. Y nun sólo porque yera altu, que lo yera, sinón porque dirixía el balón como si lu colocare cola mano. Quini yera un aficionáu comparándolu con Prendes. Siempre lu almiré porque, anque’l tiempu pasaba, él siempre se pasió por Xixón cola mesma planta que si tuviere xugando. Y eso que’l mio empiezu con él nun pudo ser peor. Teníalu visto dalguna vez, diendo con mio padre a la vieya tribunona de los socios, la única que, d’aquella, taba cubierta. Pero yo yera mui pequeñu y nun guardo memoria d’él. De lo que si la guardo, por desgracia, ye de cuando principié a dir al fútbol colos amigos. Aquel primer partíu que recuerdo yera, na menos, qu’escontra’l Real Uviéu. Rivalidá dientro y fuera del campu. Tengo equí na biblioteca varies histories del Sporting y podría mirar los detalles del partíu, pero préstame más cuntalo como lo recuerdo, anque pueda meter la pata. El partíu xugóse de martes, porque’l domingu cayere una nevadona tan grande qu’ hubo que lu suspender. Yera la temporada 1955-56. Si digo’l resultáu, ya queda too dicho. Perdió’l Sporting 0-6, y diéronnos una «mexada» apavoriante. Anque me duela dicilo, poques veces vi xugar tan bien al fútbol como aquel equipu carbayón. Entovía recuerdo a aquella delantera que volvió lloca a la defensa del Sporting, y al porteru que yera Sionín: Cuervo, Alsua, Aloy, Lalo y Castro. Lalo, que yera un poco «chuleta» y siempre tenía dalguna engarradiella colos nuestros, xugó aquel día de cine. ¿Y Prendes…? Pues Prendes tuvo aquella tarde la posibilidá de cambiar el partíu. Col empate a cero nel marcador, viéno-y un centru dende la derecha, cuasi a ras del suelu, y en llugar de rematar col pie, que yera lo aconseyao, y que cuasi seguro marcaría gol, tiróse en plancha y remató cola cabeza faciendo un «escorzu» preciósu… pero’l balón salió percima’l llargueru. Depués comentóse que la selmana anterior marcara un gol asina en Zaragoza, y que quixo repitir la xugada. La cosa salió mal y llueu llegó «la mexada».

Anque paeza mentira con esi precedente, siguí diendo al Molinón y al añu siguiente pudi tomame la revancha. GanamosPrendes al Uviéu 5-1 y fue l’añu que xubimos a primera con record de goles: 107. De los cualos 47 metiólos Ricardo, un delanteru fantásticu del qu’igual falo otru día, porque fue un casu mui curiosu nel fútbol español. Nesi partíu nun xugó Prendes, pero sí en dalgún otru d’aquella temporada na que marcó dellos goles, non munchos porque perdiere la titularidá, ya nel final de la so carrera. En cualquier casu, creo que a Prendes, y a otros dos xugadores de la dómina que veo dacuando perehí, Molinucu y Germán, que deben ser los únicos vivos d’aquel equipu, habría que-yos facer un homenaxe públicu, agora que se-yos fai a cualquier «mexanís» que vien de fuera y que se queda un par d’años perequí. Los tres son de Xixón y equí entregaron la so vida deportiva y, cuasi seguro, van a entregar tamién la otra.

Prestóme muncho ver esti día a Prendes, mientres salía del Club Santa Olaya cola muyer. Depués que nos sobrepasó díxi-y a la muyer con arguyu: «Mira, esi ye Prendes, una gloria del Sporting». Cuasi me dio pena qu’él nun me sintiera…

(Na semeya d’enriba Prendes ye’l que ta de pie col balón nes manes, na fila d’embaxo a la manzorga, Molinucu, y a la mandrecha Germán. Na semeya d’abaxo, Prendes xugando en México, na espedición del Sporting a América en 1953. Prendes llego a ser internacional cola Seleición B n’una ocasión)