«Cubanito soy señores
cubanito y muy formal,
vale más ser cubanito
que guardia municipal…»
Asina diz el canciu popular que nun falta nes escursiones, xunto colos bocatas y les cerveces. Y ye que paez qu’agora toos son «cubanitos». A lo llargo cuarenta abegosos años, los que duró l’aisllamientu al que los Estaos Xuníos sometieron a la islla caribeña, a tolos gobernantes españoles y europeos-yos paeció mui bien el duru bloquéu económicu, social y políticu que los «grandonos» norteamericanos, con presidentes republicanos o demócrates, ficieron a Cuba. Yera un país comunista, nun tenía democracia y, amás, taba a pocos quilómetros d’ellos. A ver si cundía l’exemplu y… Lo que nun dicíen yera qu’ellos -y el restu’l mundu- comerciaba y caltenía rellaciones, a nivel d’embaxador, con China y la URSS, que tamién yeren comunistes, y comerciaben con otros onde la la pallabra democracia nun-yos sonaba nin pol «forro», como Arabia Saudí o les dictadures latinoamericanes «amigues». Yá se sabe, el doble o triple raseru pa midir a unos y otros.
Lo curioso ye qu’agora, abasta con que’l «presi» norteamericanu diga que bueno, que val, que too eso del bloquéu nun valió pa nada y que vamos ver si nos entendemos tal y como somos, pa que tolos dirixentes «pelotes» d’un o otru bandu, s’apauten a da-y el vistu bonu al mandamás d’allálantrones. Claro, si yera lo que procedía, yá lo dicíen ellos cuantayá. Consíguese más poles bones que poles males, y tal y cuál, y la música en Pravia. ¡Ai que tener cara…!
El gobiernu -los gobiernos- español anduvo baillando la «yenka» (dos pasos p’alantre y dos p’atrás) col rexime castrista, con tebies aprosimaciones y cortes dafechu, según l’aire de los dirixentes y el vientu de la Historia. Ensin decatase de la so responsabilidá cola antigua colonia, y los intereses de los munchos españoles -gran cantidá asturianos- qu’entovía permanecen na islla. Talo que los ingleses o los franceses faen coles sos antigües colonies, coles que caltienen unos rexímenes especiales, España nun supo xugar esi papel mediador qu’agora otros xugaron por ella (Canadá, el Vaticano…) perdiendo, una vuelta más, el so momentu na Historia.
Too esto ye al marxe de la consideración que-yos podamos tener a los hermanos Castro. La mía, yá la dixi otres
veces, ye que va munchu tiempu que tuvieron de dar un güelpe de timón al réxime y principiar, con toles precauciones que quixeren, un xiru claru a la democracia. Ye cierto que l’enemigu americanu fue mui poderosu y tuvo siempres conspirando pa derrocalos -Bahía Cochinos, el bloquéu, los atentaos escontra Castro…- pero tiempu hubo pa dar un pasu decidíu a un réxime más abiertu, como ficieron n’otros paises del so entornu (Arxentina, Chile, Uruguay…) Los Castro nun supieron, o nun pudieron facelo, y queden como un pequeñu anacronismu qu’agora, por fin, paez movese na direición corrreuta. Veremos. Total, qu’ente toos van facer bona aquella fábula na que’l vientu y el sol apostaron a ver quien yera más poderosu. El vientu namás consiguió que’l paisanín s’envolviere más na so capa, mentanto que’l sol, sacó unos rayinos a pasiar y, nel intre, el paisano quitó la capa poles bones. Obama ta pasando de ser el vientu, a ser el sol. Yo creo que, anque tarde, acierta.