Va yá un tiempu, anuncié nesti mesmu blogue, la prósima salida d’una antoloxía de cuentos al rodiu d’un tema social de muncha fondura: el problema de les persones con Trestornos del Espectru Autista o Trestornos Xeneralizaos del Desarrollu. O seya, los neños y neñes «autistes». Un piñu d’escritores, comandaos pol periodista y narrador Rubén Serrano, escribimos un cuentu sobre’l tema. Los beneficios de la publicación de los cuentos son pa l’Asociación PROTGD, empobinada a «promover y proteger la calidad de vida de les persones con TEA/TGD».
Pues bien, puedo anunciar y anuncio, que’l llibru recopilatoriu de toos esos cuentos yá ta na cai. La portada ye esa que podéis ver xunto con esta anuncia. Trátase d’un prestosu dibuxu d’Ana González, que ye mui evocador. Veis una especie de puzzle, colos rostros d’un garapiellu de neños con xeitu feliz. Abaxo hai una pieza que nun cuadra, una pieza cola cara d’un neñu que nun ye feliz. Ye’l neñu autista. Lo que l’Asociación pretende ye qu’esa pieza encaxe nel restu del puzzle. Que seyamos capaces de facilitar la vida a esos neños y neñes con problemes, pa que seyan ún más dientro del total. Que, anque tengan peculiaridaes propies, y tengan que s’esforzar pa favorecer esi «encaxe», nosotros nun los marxinemos. Y la primer manera de nun los marxinar ye conociéndolos. Sabiendo cómo son, qué sienten, cuales son les sos reaiciones individuales y sociales. Nun ye llabor sólo de los padres, nin de la escuela, sinón de tola sociedá la preparación p’acoyer a esos neños con normalidá. Respetando la so forma de ser, pero dándo-yos confianza, paciencia y cariñu.
Estos cuentos traten de divulgar aspeutos distintos de los neños y les neñes autistes. Creo que los que los escribimos ficimos un esfuerzu de comprensión y de divulgación, pa dar una imaxen aprosimada del neñu autista. Unos cuentos son tristes, otros simpáticos, otros sentimentales o pedagóxicos, pero toos ellos tienen un fondu común: el cariñu col que tán escritos y la intención de que sirvan pa dalgo.
Voi citar equí a tolos autores que participemos col títulu de cada cuentu. Ye’l mio homenaxe a estos compañeros de profesión que dedicaron el so tiempu y el so talentu pa esta causa solidaria: Dorina Clrak (Entre violines y amapolas); Lydia Alfaro (Mario); Vicente García Oliva (Páginas del diario de Simón); Ana Gonzalez (Teresa y su Gran Dilema); Mª Sagrario Saelices Almendros (Diferentes e iguales); Roque Pérez Prados (El niño que observaba la luna); Loli González (Gabriel, sus ideas y nuestra ropa); José Carlos Atienza (El mundo al revés); Obed González Moreno (Las manecillas del reloj); Megan Maxwell (Mi sueño y el de Adrián); Lydia Syquier (La niña que soñaba con mariposas); Pedro Escudero Zumel (Rosa rara); Angélica Santa Olaya (Telma y las arañas); María Delgado (El héroe de Laurita); María Victoria Albornoz (El canto del niño pájaro); Sergi Llauger (El despertar); Melanie Taylor Herrera (Ayudando a Pepe a encontrar palabras); Magnus Dagon (El explorador) y Rubén Serrano (El pequeño profesor y el dragón del caos). Hai ente toos ellos xente de diverses nacionalidaes: Colombia, Panamá, México, España… espresándonos toos na llingua común.
El llibru va a distribuyise per llibreríes, pero si dalgún quixera tenelu yá, pue pidilu a: Asociación PROTGD. Calle Crisantemo, 20 – 3º B 28933-Móstoles (Madrid), al preciu de 10 euros. El teléfonu de l’Asociación ye 607 216 324 y 675 081 075 y la direición e-mail: protgd@telefonica.net Ye pa una bona causa.
