L’anunciu del recorte a les subvenciones al asturianu en más d’un 60%, amestao a los recortes anteriores (un, del propiu gobiernu del PSOE y otros dos del tiempu en que pasó, como un Fórmula 1, el señor Cascos) amuesen el gran interés por parte los nuestros gobernantes en caltener viva la nuestra cultura y la nuestra llingua. Agradecémos-yoslo. Ye verdá que les cantidaes globales que se quiten a la llingua nun paecen mui grandes, unos 60.000 euros, comparaos colos 100.000 millones del «rescate» que van a dar a los probes de los bancos, pero lo importante nun son les perres, sinón l’exemplu que se da. Que se vea que, anque probes, somos honraos. Y una perra d’equí y otra d’ellí… vamos enllenando la corexa.
Porque, a fin de cuentes ¿pa qué val la llingua asturiana? Pa ná. Pa falar ya tenemos l’español, gracies al cuál un de Les Arriondes pue entendese con un de Parres, que si non vaya problema. Y lo deseable ye que nel futuru (incluyíos los de Les Arriondes y los de Parres) toos falemos inglés pa entendenos con tol mundu mundial. Poro, ¿subvenciones a la llingua? Ye como’l dichu aquel de que «llava-y la cabeza a un burru, ye gastar tiempu y champú«. Y como l’asturianu vemos que nun val pa nada, ¿pa qué gastar perres con elli?
Pero abúltame que, dando un pasu más, podemos siguir aforrando dalguna otra perruca. Por exemplu, ¿pa qué val el Prerrománicu? Sí, ya sé que dalgún dirá que ye importante y tal y cual, pero en realidá son una serie de piedres nes que yá nun vive naide. Bono, en dalgunes ilesies sigue diciéndose misa, pero ¿nun ye meyor tirales y construyir unes más confortables con calefaición, bancos curiosos y cuadros más modernos, qu’eses antigualles enllenes de povisa…? Amás, tenemos les semeyes pa enseñar a los nuestros fíos cuando vaigan medrando: «Mira, fíu, éstes yeren unes construiciones que ficieron allá va munchu tiempu los nuestros antecesores. ¿A que yeren guapes?» Y ya ta, perres qu’aforramos de la conservación y perres que nos dan los contructores de lo que se faiga ellí, que los probes tán cuasi toos nel paro. Y col restu la cultura, lo mesmo. En serio, ¿pa qué val la cultura asturiana? Nun digo la Enseñanza, qu’hai que tar preparaos pa cuando tengamos que dir p’Alemania, pero ¿la cultura asturiana? Onde te l’Americana que se quiten toles otres, onde vas a parar: coles sos películes de superhéroes y too eso que vien na Tele. Lo del burru: Ye gastar tiempu y champú.
Asina que yo pido dende esta modesta plataforma midíes más contundentes. Por exemplu, quitar la Conseyería de
Cultura, que nun val pa nada y lo único que fai ye retrasar el momentu de que falemos n’inglés y tengamos urbanizaciones nueves nel Naranco. Y si total ya ta too condenao a morrer, pa qué dir dosificándonos la muerte, a cachinos, pa que suframos más… Que nos lo quiten dafechu. Yá sé qu’eso supondría dexar en paru a la Conseyera de Cultura y a los sos asesores, pero cualquier iniciativa, por bona que seya, tien la so parte mala. Pa iguar eso, propondría que se-yos dieren, a la Conseyera y a los asesores, los 400 euros esos de los paraos, y llueu mandalos a axudar a los llabores de llimpieza de los montes, y asina, nun sólo recortábemos gastos, sinón qu’amás, taríamos dando un exemplu positivu cara al Pueblu Asturianu, a María Dolores de Cospedal y al Bancu Central Européu. Y sobre too pa que vean que los nuestros burros, yá nun utilicen champú.
