La implicación como «imputáu» del secretariu de les Infantes Elena y Cristina, Carlos García Revenga, nel casu del Institutu Noos, onde’l xenru del Rei ta empantanáu hasta les oreyes, da una vuelta de tuerca más al rodiu de la institución monárquica nel nuestru país. Esti señor (namás porque va de corbata), fue Tesoreru d’esa organización «ensin ánimu de lucru» (¡manda madre!), anque diz qu’él nun tenía nenguna capacidá de decisión, polo tanto nenguna responsabilidá. O seya, como los monos esos que se tapen los güeyos, les oreyes y la boca. Nin ver, nin oyer, nin falar.
Dicíen los griegos que los dioses confunden a quienes quieren perder. Abúltame que ye una gran verdá, porque la impresión que da toa esta xente, cada vuelta más allancada nel barru, ye la del ciegu que da palos a ver si dalgún acierta. O eso, o ye que daveres piensen que la xente ye faltosa. Si non nun s’entiende cómo pretende facenos creyer que, una persona qu’exerce de tesoreru en cualquier institución, pueda nun tar al corriente de los cobros, pagos y movimientos de dineru dientro de la mésma. Por ineptu que fuere. Polos correos ellectrónicos sabemos, amás, qu’esti secretariu personal de les Infantes, yera tamién asesor del «Duque-en-Palma-do». En fin, más claro l’agua.
El comentariu que cualquier paisanu decente pue facer ye que la Casa Real, cualquiera que seya’l so carauter xurídicu si
ye que lu tien, cuenta con importantes miembros o asesores de la mésma implicaos en trampes, estafes, defraudaciones y blanqueos con deterxente, anque los vaigan quitando de la páxina web. Ente ellos a dos herederes al Tronu d’España, como son les Infantes, cualquiera que seya’l so puestu na escala de Richter de los herederos. Sí, yá sé qu’entovía nun les culpabilizaron direutamente, pero repuna a la razón pensar que la muyer del principal implicáu, y a cuyu nome tamién había munches coses, y la so hermana, cuyu secretariu personal tamién taba hasta les ceyes, nun sabíen ren de ren. Que-y lo cuenten a Rita. Y por agora tán dexando delláu al propiu Borbón, que tamién tuvo, y nun sé si tien, negocios, vamos llamar poco claros. Recordemos al so amigu Colón de Carbajal.
Aprovecho que güei ye’l cumpleaños del primer Herederu, pa repitir que la Monarquía ye una antigualla que debiere desapaecer del mundu modernu. Nun tien sentíu, por más que dalgunos «señaldosos» se garren a ella n’alcordanza de tiempos «gloriosos». Ye un sistema de gobiernu desapaecíu y les filtrayes del naufraxu, o seya, esa figura d’un Rei que nun manda y sólo sirve d’adornu, tendría tamién que desapaecer. Hasta agora aguantamos por ello porque «namás» yera una cosa inútil. Pero nesti momentu ta convirtiéndose, amás, nuna institución corrupta, y yá tenemos abonda corrupción n’España ensin necesidá de que los descendientes del mayor sirvengoña d’España, aquel nefandu Fernando VII, se paseen perequí cazando elefantes cola querida, o metiendo mano nel caxón. En cualquier de los caxones que tienen al so algame. Vamos esperar a ver en qué apara too esto, porque la cosa entovía va a trayer cola. Pero de mano, lo qu’hai que principiar a dicir ye: ¡Que se vaigan d’una vez!