Esta guapísima espresión vien recoyida nel DALLA (Diccionariu de l’Academia de la Llingua Asturiana) col siguiente significáu: fam. Fracasar dafechu, del too. Pues bien, al mio modestu talantar, eso ye lo que-y ta pasando al PP xixonés dende va yá un tiempu: que ta «dando col culu na rodera». Podíemos espurrilo un poco más y falar tamién del fracasu del PP n’Asturies, que cuando goció de la oportunidá d’afianzase de mou definitivu, con aquelles eleiciones que ganaron con Serxu Marqués a la cabeza, tiráronlo too pela borda col famosu «Cascazu» (non de «cascar», que tamién, sinón de Cascos) que-y punxo’l poder nes manes al PSOE, ensin más méritu que «veles pasar» mentanto los populares se desangraben. Postura por demás sinvergoña porque, na realidá, la que se desangraba yera la propia Asturies. Pero eso ye yá agua pasao, de la que podíen tener sacao dalguna moralexa, como ficimos dalgunos que ya calamos al personal. Nun fue asina.
Y nun lo fue porque la ínclita Mercedes Fernández, perdedora de toles batalles nes que se metió, polos motivos qu’ella sabrá, emperróse nuna guerra ensin cuartel con doña Pilar Fernández Pardo que, enantes de l’apaición de FORO, tuvo nun tris d’arrebata-yos l’alcaldía a los socialistes sacando cuasi los mesmos votos qu’ellos. Llueu, la nueva división de «casquistes» y «anticasquistes» dio con tola so estratexa en baxo, perdiendo bona parte de los votos algamaos. Pero la «inquina» de doña Mercedes yá vien d’enantes, cuando quixo facese col control de la Xunta Llocal xixonesa, congresu pente medies, fracasando estrepitosamente. Y lo que nun llogró colos votos de los populares xixoneses, fue a rectificalo nos despachos, defenestrando con un «güelpe d’estáu» a la susodicha señora Pardo que, mui dignamente (nun tenía otru remediu) marchó pa so casa.
Lo que vieno depués ye un total sinsentíu, con una Xestora que lleva meses nel poder ensin facer elleiciones, ensin un programa nin de gobiernu nin d’oposición, pegando bandazos, votando colos sos eternos enemigos (Psoe y IX) y dexando tol campu de la drecha en manes de Foro. Les últimes andances alrodiu de los presupuestos fueron penoses, escluyendo de les conversaciones a los representantes reales de los xixoneses, o seya, al grupu municipal del PP, y desixendo pa xustificar la falta de sofitu a los presupuestos, un tema que paez llegalmente duldosu cuando non dafechamente illegal, como ye’l del cambiu del IBI nun exerciciu yá empezáu.
El resultáu de too ello ye que tán faciendo bonu a un partíu conservador en Xixón y, sobre too, dexándo-y el camín n’abertal pa que nes prósimes eleiciones atropen la mayoría del votu de les dreches xixoneses. Mentanto les izquierdes tampoco nun tienen nidia una oposición seria, enfotaos en babayaes, como que l’alcaldesa diga o nun diga lo que piensa privadamente sobre l’albuertu, cosa qu’a min me trai al pairo. O afirmando, como fai esi «premiunobel» del señor Argüelles que la prorroga presupuestaria amuesa’l que nun saben gobernar, cuando ye lo que ta pasándo-yos a ellos nel gobiernu d’Asturies. En fin, que si Dios o la Santina nun lo igüen, vamos tener un gobiernu municipal de dreches pa llargo, cosa que me rincha bastante los dientes viviendo nuna ciudá que siempre presumió de ser d’izquierdes. Pero, amiguinos, hai más d’ún que ta «dando col culu na rodera».
