close
«De cáncer, xenomes y sidrón»

«De cáncer, xenomes y sidrón»

xose-anton-suarez-puenteEl pasáu martes cellebróse nel Atenéu Obreru de Xixón una interesantísima conferencia a cargu de Xosé Antón Suárez Puente col títulu qu’encabeza esta entrada. Xosé Antón ye Profesor Titular de Bioquímica y Bioloxía Molecular na Universidá d’Uviéu, y miembru del Institutu Universitariu d’Oncoloxía (IUOPA). A lo llargo la so carrera vien estudiando’l cáncer mediante la identificación de nuevos xenes humanos implicaos nesa malura. Como investigador del Scripps Research Institute de California, ente los años 1999 y 2002, estudió los mecanismos moleculares polos que los cáncanos son a facer qu’espoxiguen nuevos vasos sanguíneos pa llevar alimentu y osíxenu a les célules tumorales. Ya de vuelta n’Asturies, dende l’añu 2002 vien peñerando’l xenoma humanu y el d’otres especies pa pescanciar los mecanismos implicaos nel desendolcu d’un cáncanu, y nel añu 2011, l’equipu del Dr. Carlos López Otín al que pertenez, fue’l primer grupu español en secuenciar un xenoma humanu, y el primeru del mundu en secuenciar el xenoma de 4 tumores. Anguaño tan acabantes de completar la secuenciación de más de 500 xenomes del cáncer, y d’otres enfermedaes como cáncer de mama familiar, síndromes d’avieyamientu o miocardiopatíes. Estes investigaciones, llevaes a cabu dende l’Institutu d’Oncoloxía de la Universidá d’Uviéu, tán revolucionando’l nuesu conocimientu del cáncer, y creando, dende Asturies, parte de lo que sedrá la medicina del futuru. El Dr. Puente ye autor de más de 80 publicaciones en dalgunes de les revistes de mayor prestixu, incluyendo numberosos artículos en Nature, Nature Genetics o Blood, y ye autor de varios llibros científicos o de divulgación en llingua asturiana. Los sos trabayosana-cano_xoptimizadax-575x323 tienen una enorme repercusión, siendo citaos más de 11.000 vegaes, lo qu’amuesa la relevancia de les investigaciones llevaes a cabu dende esta pequeña universidá de nueso. Amás de la so actividá como investigador, ye profesor de Bioquímica nos Graos de Bioloxía y de Química, y ye Coordinador del Máster en Biomedicina y Oncoloxía Molecular nel que se formen les futures xeneraciones d’investigadores nestes materies.

La conferencia -dafechamente n’asturianu- tuvo mui interesante, anque los «legos» como yo, seguro que perdimos munchos detalles que nos ficieren de mayor provechu. En cualquier casu, norabona al prestixosu investigador, que l’añu pasáu fue nomáu miembru correspondiente de l’Academia de la Llingua Asturiana, y tamién a l’asociación asturianista «Ástura» que, como siempre, trae a los llocales del Atenéu charres mui interesantes.