Ya di la mio opinion al rodiu del llamau «Debate sobre l’estáu de la nación». O meyor, nun la di porque considero que fue un calcu teatralizáu de lo de tolos años. Nun importa lo que se diga -davezu munches mentires y desaxeraciones- sinón al final quién fue’l que «ganó». O seya, cualquiera menos el pueblu español.
Lo único que quería amestar a eso ye la observación de que les úniques referencies a la nuestra comunidá asturiana, les úniques entrugues, y les únique crítiques a lo qu’equí se ta -o nun se ta- faciendo, vinieron de parte del señor Sostres del grupu de Foro. Y ye xusto dicilo. El restu de diputaos asturianos, o seya los que se presenten polos partíos estatalistes, tán desapaecíos en combate. Non porque ellos nun intervinieren, cosa que nun puen facer por tener un portavoz xeneral pa toos ellos, sinón porque fueron incapaces d’introducir el tema de los problemes nuestros y les nuestres carencies en nenguna intervención del so líder. Poro, hai que dicir que votar n’Asturies a diputaos del PSOE o del PP ye tirar el votu porque nunca nun vamos a tener voz nesi foru. Van a facer bultu y a votar lo que-yos digan los del aparatu del partíu. Namás un partíu que nun tenga dependencies fuera d’Asturies, podrá representar la nuestra voz. Ye dalgo que yá sabíemos, pero qu’una vuelta más hai que repitir. Tenemos lo que merecemos.
Al llau d’esto, dicir tamién que nun me prestó nada esi «antidebate» que montó Podemos a mayor gloria de don Pablo
Iglesias. Ta bien facer mítines, atropar a la xente en tornu a proposiciones concretes, dir engrasando la maquinaria cara a prósimes eleiciones, pero esa especie de parodia de les instituciones, dirixéndose a un imaxinariu Rajoy y autoproclamándose xefe de la oposición nun me gustó. Esi cargu otórguenlu les urnes, y sólo les urnes. Y dar por sentao que les urnes van a dá-ylo ye arrogase un votu qu’entá nun se dio. Les encuestes son orientatives, y lo que val ye lo que’l pueblu decida cuando-y correspuenda. Paecióme una burlla al Parllamentu que, bien o mal, ye’l que representa la voluntá del pueblu. Los tiros (metafóricos) tienen que dir escontra’l qu’utiliza mal el Parllamentu, non contra la propia institución que, repito, ye la que caltién la soberanía popular. Y muncho menos me prestó esi cantar a coro de «Presidente, Presidente», como un cultu a la personalidá nun partíu que se llama asambleariu. Trae pa min mui malos recuerdos, como cuando prósimes les eleiciones de Febreru de 1936, al representante de la CEDA, o seya de les dereches españoles, Jose María Gil-Robles, lu recibíen llamándolu: «¡Jefe, Jefe…!», y les cais taben enllenes de cartelos cola so cara y debaxo lo de «El Jefe». Nun digo qu’ésti seya un casu paecíu, namás digo que’l cultu a la persona, seya ésta de dereches, izquierdes o mediopensionista, ye un grave error. Que nun caiga Podemos n’él, nin s’arrogue coses enantes de qu’asocedan. Y sobre too, que nun se convierta nuna parodia de sí mesmu.
